Puha Hūhū

◼ Ko e heigoa e tau hagahaga kelea he fakaaoga e Internet ke matutaki mo e tau tagata ne nakai iloa e tautolu?

Kua loga e tau faahi Web ne taute ma e tau tagata ke feleveia mo e matutaki he Internet. Loga he tau faahi nei ne fakaatā e tau tagata ke taute mo e tuku i loto e tau tala hagaao ki a lautolu ni, ti liga putoia e tau ata fakatino mo e falu vala tala fakatagata. Kua maeke mogoia e tau tagata ka kitekite ke he tau vala ia ke matutaki ki a ia. Ko e tau faahi Web pihia kua talahaua lahi ki a lautolu ne fuata mui, ti kua fakaaoga foki he falu fuata he fakapotopotoaga ke matutaki mo lautolu ne totoku ko e Tau Fakamoli a Iehova.

Kua mukamuka he tagata ne feleveia mo tautolu he Internet ke fakavai e higoa, tuaga fakaagaaga, po ke tau manako haana. (Sala. 26:4) Ko e tagata ne totoku ko e taha he Tau Fakamoli a Iehova kua liga ko e tagata nakai talitonu, tagata kua tuku ki tua, po ke tagata kua malolō lahi ke he tiaki taofiaga. (Kala. 2:4) Ne hokotaki ai, kua tokologa e tagata ne ekefakakelea e tau fanau hane fakaaoga e tau faahi Web pehēnei ke faiola aki a lautolu.

Pete foki kua mauokafua a tautolu ko e tagata hane matutaki a tautolu ki ai kua mitaki haana a tuaga he fakapotopotoaga, ko e tau fetutalaaki he tau tuaga pihia kua mukamuka lahi ke hihiga ke he tau mena nakai atihake. Kakano anei ha kua nakai maimainā e tau tagata ke he falu ne nakai la feleveia fakatagata mo lautolu. Kua liga onoono a lautolu ke he matutakiaga he Internet ko e mena fakatagata ti logona hifo ko e tau mena ha lautolu ne talahau to nakai iloa he falu, tuga e tau matua ha lautolu po ke tau motua. Momoko ai, kua tokologa e tau fuata he tau kaina Kerisiano kua mokulu ke he matahele ia mo e putoia ke he tau kupu kelea. (Efeso 5:3, 4; Kolo. 3:8) Kua tuku he falu e tau ata fakatino ha lautolu ni ne fakaohooho e mahani fakataane mo e fifine, tau higoa ui ne fakalialia, po ke matutaki atu ke he tau vitiō lologo ne kitia maaliali e aga he mahani fakataane mo e fifine he tau tala ki a lautolu ni i loto he komopiuta.

He onoono ke he tau mena ia i luga, kua latatonu e tau matua ke matakite ke he tau gahua he tau fanau ha lautolu he komopiuta. (Fakatai 29:15) Kua hagahaga kelea ke uiina e tagata kehe ki loto he kaina ha tautolu po ke fakaatā a ia ke nofo tokotaha mo e tau fanau ha tautolu. Tatai foki, kua hagahaga kelea ki a tautolu po ke tau fanau ha tautolu ke taute kapitiga mo e tau tagata kehe i loto he Internet, pete kua totoku ko e Tau Fakamoli a Iehova a lautolu.​—Fakatai 22:3.