Fakakite Hau a Fakaaue Lahi
1 Pete ne nonofo a tautolu he ‘tau aho uka ke fehagai ki ai,’ ha ha ia tautolu e tau kakano ke fakaaue lahi ki a Iehova. (2 Timo. 3:1) Mua atu ke he tau mena nei e mena fakaaalofa uho he hana Tama ke lata mo tautolu. (Ioane 3:16) Lafi ki ai, ko lautolu he lotu fakavai hane hoge fakaagaga, kua olioli a tautolu ke he tau mena kai fakaagaga loga. (Isaia 65:13) Ko tautolu ko e vala he fakamatakainaga he lalolagi katoa ti kua monuina ke fakalataha he fakalaulahiaga fiafia he tapuaki moli. (Isaia 2:3, 4; 60:4-10, 22) Maeke fefe a tautolu ke fakakite e fakaaue lahi ha tautolu ki a Iehova ma e tau monuina ne fofola e ia ki luga ha tautolu?—Kolo. 3:15, 17.
2 Fekafekauaga Loto Katoa ne Olioli: Ka fakatutala ke he foakiaga fakatino, ne tohi he aposetolo ko Paulo: “Kua fakaalofa e Atua kia ia kua foaki mo e fakamakai.” (2 Kori. 9:7) Ko e matapatu fakaakoaga kua fakagahua foki ke he ha tautolu a fekafekauaga ke he Atua. Ko e fakaaue lahi kua fakaata e ukufakina ha tautolu ma e kupu moli, ha tautolu a olioli ke he tau feleveiaaga Kerisiano, ha tautolu a makai ke he fekafekauaga he fonua, mo e ha tautolu a loto fiafia he taute e finagalo faka-Atua.—Sala. 107:21, 22; 119:14; 122:1; Roma 12:8, 11.
3 I Isaraela i tuai ne nakai fafati he Fakatufono e lahi he tau foakiaga pauaki. Igatia e tagata tapuaki mo e fakakite hana fakaaue he foaki “ke lata mo e monuina kua foaki mai ai e Iehova” ne kua moua e ia. (Teu. 16:16, 17) Pihia he vaha nei, ko e loto fakaaue to fakalagalaga a tautolu ke lahi e mena ke taute ka fakaata he tau tutuaga ha tautolu ke fakamatala e Kautu mo e gahua taute tutaki. Maeke nakai ia tautolu ke fakaaoga katoatoa e tau magaaho okioki mai he gahua tupe, tau okioki tuku aoga, po ke tau matahiku vahatapu ke fakamalikiti ha tautolu a tau magaaho ne fakaaoga he gahua he fonua, ke paionia fakaku foki? Maeke ia tautolu mogoia ke fakatata e fakaaue lahi ha tautolu ke he puhala fakalaulahi atu foki.
4 Pukeina he Tau Fakaaue: Ko e puhala lahi ke fakakite e tautolu e tau fakaaue ki a Iehova ko e liogi. (1 Tesa. 5:17, 18) Kua fakamalolo he Kupu he Atua a tautolu ke ‘pukeina ke he tua he fakaaue.’ (Kolo. 2:7) Pete foki ka lavelave lahi a tautolu po kua tupetupe, kua lata ke putoia tumau e tautolu e fakaaue ke he tau liogi ha tautolu he tau aho takitaha. (Filipi 4:6) E, he puhala he ha tautolu a fekafekauaga fakalataha mo e tau liogi ha tautolu, kia “fakalahi ai foki e fakahekeaga ke he Atua he loga e tau fakaaue.”—2 Kori. 9:12.