Lagomatai Falu ke ‘Omaoma mo e Tau Loto’
1. Ko e heigoa ha Iehova ne manako mai he tau tagata tapuaki hana?
1 Ko e omaoma e matapatu he tapuakiaga kua talia ki a Iehova. (Teu. 12:28; 1 Pete. 1:14-16) Nakai leva, to hoko mai e fakafiliaga he Atua “kia lautolu kua nakai iloa e Atua, mo lautolu kua nakai omaoma ke he vagahau mitaki.” (2 Tesa. 1:8) Lagomatai fefe e tautolu falu ke ‘omaoma mo e tau loto’ ke he tau fakaakoaga he Kupu he Atua?—Roma 6:17.
2. Ko e ha kua aoga ke lagomatai falu ke atihake e tua malolo?
2 He Lagomatai ke Atihake e Tua mo e Fakaalofa: He tau Tohiaga Tapu, kua fakatata e omaoma mo e tua. Ne tutala e aposetolo ko Paulo ke he “poaki he Atua tukulagi, kua fakailoa ai ke . . . omaoma ke he tua.” (Roma 16:26) Kua fakakite ia Heperu veveheaga 11 e tau fakafifitakiaga loga he tua, laulahi ne putoia ke he gahua fakatatau mo e finagalo ha Iehova kua totoku mai. (Hepe. 11:7, 8, 17) Ke he taha fahi, ko e faliuliu kua lafi fakalataha mo e temotemoai e tua. (Ioane 3:36; Hepe. 3:18, 19) Lata ia tautolu ke iloa ke fakaaoga e Kupu he Atua ke maeke ke lagomatai falu ke feaki e tua ke moua e omaoma.—2 Timo. 2:15; Iako. 2:14, 17.
3. (a) Matutaki fefe e omaoma mo e fakaalofa? (e) Lagomatai fefe e tautolu e tau tagata fakaako Tohi Tapu ke feaki e fakaalofa ma Iehova?
3 Kua matutaki foki e omaoma mo e fakaalofa ke he Atua. (Teu. 5:10; 11:1, 22; 30:16) “Ko e fakaalofa ke he Atua hanai,” he talahau he 1 Ioane 5:3, “kia omaoma a tautolu ke he tau poaki hana; nakai mamafa foki hana tau poaki.” Lagomatai fefe e tautolu e tau tagata fakaako Tohi Tapu ke feaki e fakaalofa ma Iehova? Kumi magaaho he mogo ka fakaako ai ke feaki e loto fakaaue ma e tau mahani ha Iehova. Talahau hau a tau logonaaga hokulo ma e Atua. Lagomatai e tagata fakaako ke manamanatu ke feaki e fakafetuiaga fakatagata hana mo Iehova. Mua atu ke he tau mena oti, ko e fakaalofa ma Iehova ka fakaohooho falu—pihia mo tautolu ni—ke omaoma ki a ia mai he loto.—Mata. 22:37.
4. (a) Ko e ha e fakafifitakiaga ha tautolu ne aoga ai? (e) Ko e heigoa kua latatonu ia tautolu ke taute ke feaki e ‘loto omaoma’?
4 He Fakafifitakiaga ha Tautolu: Taha puhala malolo lahi ke maeke ia tautolu ke fakamalolo falu ke omaoma ke he tala mitaki ko e tau fakafifitakiaga ha tautolu. Ka e, kua lata ia tautolu ke lali tumau ke feaki e ‘loto omaoma.’ (1 Patu. 3:9; Fakatai 4:23) Ko e heigoa kua putoia he mena nei? Fagai e loto hau he fakaako tumau e Tohi Tapu mo e fano ke he feleveiaaga. (Sala. 1:1, 2; Hepe. 10:24, 25) Lali ke lafi mo lautolu ne kua fakamau e tau loto ke he tapuakiaga moli. (Fakatai 13:20) Fakalataha tumau ke he fekafekauaga he fonua, mo e manako moli ke lagomatai e tau tagata he matakavi hau. Liogi ma e lagomataiaga ha Iehova ke takitaki e feakiaga he loto mitaki. (Sala. 86:11) Kalo mai he tau mena ke fakakelea e loto hau, tuga e tau fakafiafiaaga kelea mo e vale. Tutuli e tau mena ka fakatata lahi a koe ke he Atua mo e ka fakamalolo e fakafetuiaga hau mo ia.—Iako. 4:7, 8.
5. Kua hane fakamonuina fefe e tau tagata omaoma?
5 Ne fakamafana e Iehova e tau tagata hana i tuai to lahi mahaki e fakamonuinaaga ka moua e lautolu kaeke omaoma a lautolu ke he leo hana. (Teu. 28:1, 2) Tuga he vaha nei, hane fakamonuina fakalahi e Iehova “ke he tau tagata kua omaoma kia ia.” (Gahua 5:32) He puhala fakaako mo e fakafifitakiaga ha tautolu, mogoia, kia lagomatai e tautolu falu ke omaoma mo e loto.