Fakapuloa e Lilifu a Iehova
1 Ne fakapuloa he salamo: “Ko mutolu gotoa ha he lalolagi, kia lologo atu kia Iehova. . . . Kia tokutoku atu hana lilifu ke he tau motu kehe, mo e hana tau mana ke he tau motu oti kana.” He manamanatu a tautolu ke he mena ne taute, hane taute, mo e to taute e Iehova ma tautolu, kua fakalagalaga e tau loto ha tautolu ke fakapuloa e lilifu hana!—Sala. 96:1, 3.
2 He Fekafekauaga ha Tautolu: Kua ha ha he Tau Fakamoli a Iehova e lilifu ke fua e higoa he Atua mo e ke fakaheke ai ke he tau tagata he lalolagi oti. (Mala. 1:11) Ko e kehekehe ha ia mo e tau akoako he Kerisitenitome, ne utakehe pauaki e higoa he Atua mai he ha lautolu a tau liliuaga he Tohi Tapu! Ko e gahua he fakailoa e higoa he Atua kua mafiti, ha kua lata e tau tagata ke ui ke he higoa ia he tua ke maeke ke hao mai he matematekelea lahi ha i mua. (Roma 10:13-15) Lafi ki ai, ko e mafola katoatoa, putoia e mafola ke he tau tagata ne nonofo he lalolagi, kua falanaki ke he fakatapuaga he higoa he Atua. Moli, ko e tau gahua oti he Atua kua matutaki ke he higoa hana.
3 “Ha kua homo a Iehova, ti lata ni ke fakaheke fakalahi kia ia.” Ka ke maeke he tau tagata ke “ta atu kia Iehova e fakahekeaga he hana higoa,” kua lata ia lautolu ke iloa e kupu moli hagaao ki a ia. (Sala. 96:4, 8) Pete ia, kua fakatikai he falu kua fai Atua. (Sala. 14:1) Fai ne pikopiko ki a ia kua tote e malolo, po ke talahau e lautolu kua nakai fiafia a ia ke he tau gahua he tagata. He lagomatai e tautolu a lautolu ne loto fakamoli kua moua e iloilo moli hagaao ke he Tufuga ha tautolu, ko e finagalo hana, mo e aga fakahele hana, kua fakaheke e tautolu a Iehova.
4 He Mahani ha Tautolu: He momoui fakalautatai mo e tau tutuaga tututonu a Iehova nukua fakaheke a ia. Ko e mahani mitaki ha tautolu kua nakai galo noa. (1 Pete. 2:12) Ma e fakatai, ko e foliga fakatagata kua mea mo e maopoopo ha tautolu nukua fakalagalaga e tau talahauaga mitaki mai he falu, he foaki ki a tautolu e magaaho ke tutala hagaao ke he tau aoga he momoui ke he tau matapatu fakaakoaga ne moua he Kupu he Atua. (1 Timo. 2:9, 10) Ko e fiafia ha ia ha tautolu ka ‘kitia ai e lautolu ha tautolu a mahani mitaki ati fakaheke atu ai ke he Matua ha tautolu he lagi.’—Mata. 5:16.
5 He tau kupu mo e tau gahua, kia fakaheke e tautolu e Atua mua ue atu ha tautolu he tau aho takitaha, ti tali ke he uiaga olioli: “Kia fakamatala atu e mutolu hana fakamouiaga ke he taha aho mo e taha aho.”—Sala. 96:2.