Lagomatai e Falu ke Fakaheke a Iehova
1 Kua fita e fakailoa e fekau aoga ke he tau tagata he lalolagi katoa: “Kia matakutaku a mutolu ke he Atua; mo e ta age kia ia e fakahekeaga, ha kua hoko mai e magaaho he hana fakafiliaga; kia hufeilo foki a mutolu kia ia ne eke e lagi, mo e lalolagi, mo e tahi, mo e tau vai puna.” (Fakakite. 14:6, 7) Ko e kotofaaga ha tautolu ke uta e fakailoaaga ia. Ko e heigoa kua lata he tau tagata ke iloa hagaao ki a Iehova ke maeke ke matakutaku mo e tapuaki ki a ia?
2 Higoa Hana: Kua lata e tau tagata ke iloa e higoa he Atua moli tokotaha mai he tau atua fakavai loga ne tapuaki ki ai he vaha nei. (Teu. 4:35; 1 Kori. 8:5, 6) Moli, ne fakaaoga he tau tagata tohia Tohi Tapu e higoa lilifu ha Iehova ke molea e laga 7,000. He fakailoilo a tautolu ka fakaaoga he magaaho ka talahau e higoa he Atua, kia nakai fuafuakelea a tautolu he fakaaoga ai. Ko e finagalo he Atua ke he tau tagata ke o mai ke iloa hana higoa.—Sala. 83:18.
3 Aga Hana: Ke fakaheke a Iehova, kua lata e tau tagata ke iloa ko e faga Atua fefe a ia. Kua lata ke fakamahani a tautolu ki ai fakalataha mo e hana fakaalofa ue atu, pulotu tokoluga ue atu, fakafili tonu katoatoa, mo e malolo mua ue atu, putoia ki ai e fakaalofa noa, fakaalofa totonu, mo e falu fua homo ue atu. (Esoto 34:6, 7) Kua lata foki ia lautolu ke ako ke moua e matakutaku mitaki he Atua, ke taofi fakatokoluga a ia he mailoga ko e tau momoui ha lautolu kua fakave ke he taliaaga ha Iehova.—Sala. 89:7.
4 Fakatata ke he Atua: Ke hao mai he fakafiliaga he Atua hane hau, kua lata e tau tagata ke ui ki a Iehova he tua. (Roma 10:13, 14; 2 Tesa. 1:8) Kua lahi atu e mena kua putoia mai he moua hokoia e iloilo ke he higoa mo e tau fua he Atua. Kua lata ke lagomatai e tautolu e tau tagata ke feaki e fakafetuiaga fakatagata mo Iehova, he falanaki ki a ia mo e tau loto katoa ha lautolu. (Fakatai 3:5, 6) He fakagahua e lautolu e tau mena kua ako e lautolu, kia fuluhi atu ke he Atua he liogi nakai noa, mo e moua e lagomataiaga hana ke he tau momoui ha lautolu, to tupu e tua ha lautolu, he lagomatai a lautolu ke fakatata ki a Iehova.—Sala. 34:8.
5 Kia fakamakai a tautolu ke fakailoa e higoa he Atua mo e lagomatai e falu ke tuku e falanakiaga katoatoa ha lautolu ia ia mo e ke matakutaku ki a ia. Maeke foki agaia ia tautolu ke lagomatai e tokologa ke o mai ke iloa a Iehova mo e fakaheke a ia ko e ‘Atua he fakamouiaga’ ha lautolu.—Sala. 25:5.