Maeke Fefe ia Tautolu ke Lagomatai?
1 Ko e huhu “Maeke fefe ia tautolu ke lagomatai?” kua fa huhu he Tau Fakamoli a Iehova ka logona e lautolu ha lekua tupu pauaki he falu matakavi he lalolagi. Tuga ne fakakite he tala ia Gahua 11:27-30, ne foaki he tau Kerisiano he senetenari fakamua e tau fakaholoaga lagomatai ke he tau matakainaga ne nonofo i Iutaia he to e hoge.
2 He tau vaha fou, kua fakaata he tau matafakatufono he fakatokatokaaga ha tautolu e tau tupe ke fakaaoga ma e tau gahua foaki fakaalofa mo e foaki lagomatai ki a lautolu ne matematekelea he tau lekua tupu pauaki po ke he taute he tagata mo e he falu magaaho ne manako lagomatai ai.
3 Ma e fakatai, he tau kua mole ne tokologa e tau matakainaga ne foaki lagomatai ma lautolu ne lauia he peau kula i Asia Toga. Ko e tali mafanatia nei ne puhala he tuku tupe lagomatai ke he potaaga tupe lagomatai he fakatokatokaaga kua fakaaue lahi ki ai. Ka e, ka tuku pauaki e mena fakaalofa ke he taha matematekelea, ko e falu motu kua fakaaoga ni e tupe ia fakamahao ke he matematekelea ne talahau he tagata foaki ke fakaaoga ki ai mo e he kotofa magaaho, pete he fita e leveki he motu e tau manako he tau matakainaga ha tautolu po ke nakai.
4 Ko e mena ia, kua pulega atu kia tuku e tau tupe lagomatai ma e gahua foaki fakaalofa mo e tau foaki lagomatai matematekelea ke he gahua he lalolagi katoa. Na fakaaoga foki e tupe nei ma e tau gahua lagomatai matematekelea pihia mo e fakaholo ki mua he tau manako fakaagaga he tau matakainaga Kerisiano he lalolagi katoa. Kaeke, he ha kakano ni, kua manako e tagata ke tuku tupe lagomatai, kehe mai he tupe foaki ke he gahua he lalolagi katoa, to talia agaia ni mo e fakaaoga ai ke he ha gahua foaki lagomatai. Ka e, mitaki ka tuku e tau tupe lagomatai pihia mo e nakai fakamahao ni ke he matakavi mo e puhala ne liga ke fakaaoga aki e tau mena foaki.
5 Ko e pulega ha mautolu ke tuku e tau tupe lagomatai fakahako ke he gahua he lalolagi katoa ke maeke ke fakalahi hake e tupe mo fakaaoga ke he tau gahua oti he Kautu ka e nakai toka ni ma e tau manako lagomatai i mua. Kua lautatai e mena nei mo e aga he Efeso 4:16, ke gahua auloa a tautolu ke foaki e tau mena kua lata ke “ati hake ai he tino e ia a ia ni ke he fakaalofa.”