Puha Huhu

◼ Ko e heigoa e puhala mitaki ke taute aki e tau tupe foaki fakaalofa ke aoga e tau matakainaga ne matematekelea he falu motu?

Falu magaaho, ne logona e tautolu hagaao ke he tau matakainaga he falu motu ne manako fakatino ha ko e favaleaga, matematekelea, po ke falu tutuaga uka. Kua omoomoi falu matakainaga ke fakafano fakahako e tau tupe ke he tau la ofisa he tau motu pihia, ti ole ke fakaaoga e tupe ke lagomatai aki taha tagata, taha fakapotopotoaga, po ke matagahua ta fale ne kotofa.​—2 Kori. 8:1-4.

Pete kua mitaki lahi e manamanatu fakaalofa pihia ma e tau katofia talitonu, ka e ha ha ai foki e tau manako ne mua atu ke he tau mena ia ne ole he tagata foaki. Ke he falu mena, ko e manako ne ole kua fita he leveki. Moli, lata ia tautolu ke mauokafua ka fakafano e tau tupe foaki fakaalofa ke he la ofisa he matakavi ma e gahua he lalolagi katoa, ko e Kingdom Hall Fund, po ke lagomatai matematekelea, to fakaaoga e tau tupe foaki pihia tuga ni he manako he tagata foaki.

Ko e tau matakainaga he tau la oti kua fakaako fakamitaki ke tali fakaave ke he tau manako fakalutukia. Ke he tau mena oti, kua fakailoa he la ke he Kau Fakatufono hagaao ke he mena tupu. Ka manako lagomatai foki, to uiina he Kau Fakatufono e tau la ne tata ke lagomatai po ke fakafano fakahako e tau tupe mai he tau matapatu ofisa.​—2 Kori. 8:14, 15.

Ti kua lata e tau tupe foaki fakaalofa ma e gahua he lalolagi katoa, tau matagahua ta fale he falu motu, po ke lagomatai matematekelea ke fakafano ke he la ofisa he motu ne nofo ai a koe, pete kua puhala he fakapotopotoaga po ke fakahako. He puhala nei, ko e “fekafekau fakamoli mo e loto matala,” ha ko e tau fakaholoaga he fakatokatokaaga ne fakatu he Kau Fakatufono, kua leveki e tau manako he tau matakainaga he lalolagi katoa ke he puhala maopoopo.​—Mata. 24:45-47; 1 Kori. 14:33, 40.