Fiafia a Tautolu ke Eketaha ke he Gahua a Iehova!
1 Kua fiafia e aposetolo ko Paulo ke ‘fakaoti mo e fakaotioti’ ke lata mo e taute he fekafekauaga Kerisiano haana. (2 Kori. 12:15) Pihia foki he vahā nei, tokologa e tau Kerisiano ne gahua fakamakutu ko e tau paionia. Ko e falu ne mamafa e tau matagahua fakamagafaoa ne fai magaaho he setulu lavelave ha lautolu ke gahua he fekafekauaga he tau faahi tapu takitaha. Falu ne nakai mitaki e tau malolō tino kua fakaaoga e vala malolō ha lautolu ke fakaholo ki mua e tau mena he Kautu. Ko e atihake ha ia ke kitia e tau tagata ha Iehova, pete ne momotua po ke tau tutūaga hane eketaha a lautolu ke he gahua a Iehova!
2 Fakaalofa ke he Katofia: He foaki katoa a tautolu ke fekafekau ki a Iehova, kua foaki ki a tautolu e loto manamanatu meā, ha kua fakatātā e fakaalofa ma e Atua mo e tau katofia. Ha kua foaki e Paulo e moui haana ke taute e tala mitaki, ati fiafia a ia he pehē: “Kua talahau atu ai e au kia mutolu ke he aho nai ni, kua mea na au he toto he tau tagata oti.” (Gahua 20:24, 26; 1 Tesa. 2:8) He gahua ke he fekafekauaga ka maeke he tau tutūaga ha tautolu ke puipui a tautolu neke hili ki luga ha tautolu e toto.—Eseki. 3:18-21.
3 He gahua malolō ke lagomatai e falu kua tamai ki a tautolu e fiafia. (Gahua 20:35) Taha e matakainaga taane ne pehē: “Ka hoko ke he magaaho afiafi, ti liu au ki kaina he oti e gahua ki a Iehova, ne mategūgū mooli au. Ka e fiafia au, ti fakaaue au ki a Iehova he foaki mai ki a au e olioli ne nakai maeke he taha ke utakehe ia au.”
4 Fakaalofa ke he Atua: Ko e kakano ne mua atu e aoga he eketaha a tautolu ke he gahua a Iehova ko e fakafiafia ha tautolu a Matua he lagi. Kua omoi he fakaalofa ke he Atua a tautolu ke omaoma e tau poaki haana, ne putoia e fakamatala mo e taute tutaki. (1 Ioa. 5:3) Pihia foki ka vale mo e totoko mai e tau tagata, kua fakatumau a tautolu ke gahua malolō ki a Iehova.
5 Nakai ko e magaaho anei ke fakalolelole. Kua nonofo a tautolu ke he magaaho he heleheleaga. (Mata. 9:37) Fa mahani e tagata gahua fonua ke gahua loa he magaaho helehele ha kua fakakaupā ni e magaaho ke fakaputu e tau fua he fonua ato kamata ke popo. Kua fakakaupā foki e magaaho ne fakaatā ma e gahua helehele fakaagaaga. He tokaloto e magaaho ne nonofo ai a tautolu, kia matutaki oti a tautolu ke eketaha fakamalolō ke he fekafekauaga.—Luka 13:24; 1 Kori. 7:29-31.