Kua Hina e Fonua ke Helehele
1. Ko e heigoa e gahua aoga hane taute?
1 He mole e fakamatala ke he fifine Samaria, ne tala age a Iesu ke he tau tutaki haana: “Haga hake a ha mutolu a tau mata, mo e kitekite ke he fonua kua hina mai nai ke he heleheleaga saito.” (Ioane 4:35, 36) Ko e helehele fakaagaaga hane taute, ti kua kitia tuai e Iesu e lahi he gahua ia ke he lalolagi katoa. Mai he tuaga ha Iesu he lagi, ne fakatumau a ia ke putoia fakalahi ke he heleheleaga. (Mata. 28:19, 20) Ko e heigoa e tau fakakiteaga i ai kua fakatumau e gahua nai ke tupu lahi ke hoko ke he tapunu?
2. Ko e heigoa e tau mena tutupu kua fakakite ko e gahua helehele he lalolagi katoa kua tupu lahi mahaki?
2 Ko e Heleheleaga he Lalolagi Katoa: He tau he fekafekauaga he 2009, ne 3.2 e pasene ne malikiti e tau tagata fakailoa he lalolagi katoa. Ko e tau motu ne nakai fakaatā e gahua fakamatala ne kitia ko e 14 e pasene ne malikiti. Ko e numera he tau fakaako Tohi Tapu he kaina ne hokotaki he tau mahina takitaha ne molea e 7,619,000—ko e numera ne lahi atu ke he tapunu he tau tagata fakailoa mo e teitei hafa e miliona ne molea he numera he tau fakaako ne hokotaki he tau kua mole. He tupu mafiti e gahua he tau maagamotu loga, kua loga lahi e ole kua moua ma e tau misionare ne fakamahani i Kiliata. Ko e tau fonua vagahau kehe hane tupu lahi mahaki he tau motu loga. Maaliali ai, kua fakamafiti e Iehova e gahua he matahiku he heleheleaga. (Isaia 60:22) Ha ha nakai ia koe e onoonoaga mitaki he “fonua” ha mutolu?
3. Ko e heigoa kua fakahiku he falu hagaao ke he helehele he fonua ha lautolu?
3 Helehele he Matakavi ha Mutolu: “Nakai lahi e fua he fonua haaku,” he liga talahau he falu. Mooli kua liga nakai lahi e fua ne kitia he falu fonua po ke fua mitaki tuga he tau magahala kua mole. Falu Fakamoli ne liga fakahiku mogoia ko e helehele kua hoko ke he tapunu he tau matakavi ia ti ko e mogonei ko e gahua ha lautolu kua tote hifo ke moua a lautolu ne toe. Pihia mooli nakai e mena ne tupu?
4. Ko e heigoa e aga mitaki ke he ha tautolu a fonua kua lata ia tautolu ke feaki, ti ko e ha?
4 Mai he kamataaga ke he otiaga, ko e helehele ko e magaaho gahua malolō lahi. Mailoga e aga mafiti he tau kupu nei a Iesu: “Kua loga e tau saito ke helehele, ka ko e tau tagata gahua, kua tokogaogao a lautolu. Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.” (Mata. 9:37, 38) Ko Iehova ko e Iki he heleheleaga, kua fakalago ki a ia e magaaho mo e matakavi ke taute. (Ioane 6:44; 1 Kori. 3:6-8) Ko e heigoa e kotofaaga ha tautolu? Tali he Tohi Tapu: “Kia gana e koe hāu a tau fua saito ke he magaaho pogipogi, ti aua neke okioki ai hāu a lima ke he afiafi.” (Fakama. 11:4-6) E, ka hokotia e helehele ke he tapunu kua nakai ko e magaaho ke okioki e tau lima ha tautolu!
5. Ko e ha kua lata ia tautolu ke matutaki ke fakamatala fakamakutu he tau fonua ne tuga e nakai fai fua?
5 Fakatumau ke Helehele: Pete ko e fonua ha tautolu kua gahua tumau ti tuga kua nakai talia, kua fai kakano mitaki ke gahua fakamakutu mo e aga mafiti. (2 Timo. 4:2) Ko e tau tuaga kelea he lalolagi kua fakatupu e tau tagata ke hiki e tau aga ha lautolu mo e manamanatu fakahokulo ke he vahā anoiha. He lalahi e tau fuata, liga logona hifo e lautolu e lata ke moua e haohao mitaki mo e mafola he manamanatuaga. Ko e fakatumau ha tautolu ka fakalagalaga agaia e falu. E, ko lautolu ne nakai fanogonogo he mogo kua mole ka talia he tau mogo i mua. Mo lautolu foki ne fakaheu pauaki e ogo ha tautolu kua lata ke hataki.—Eseki. 2:4, 5; 3:19.
6. Ka uka e fonua ha tautolu, ko e heigoa ka lagomatai a tautolu ke fakatumau e fakamakutu?
6 Ka uka e fonua ha tautolu, ko e heigoa ka lagomatai a tautolu ke fakatumau e fakamakutu? Liga lafi ke he fakamatala he taha fale ke he taha fale ha tautolu e falu puhala he gahua he fonua, tuga e fakamatala he matakavi pisinisi po ke telefoni. Po ke fakakehekehe e tautolu e fakatātā ha tautolu ke maeke ke foou e puhala. Liga hiki e tautolu e fakaholoaga ha tautolu mo e taute e gahua he fonua he afiafi po ke falu mogo ka haia e tau tagata he kaina. Liga lali a tautolu ke fakaako e vagahau foou ke maeke ke hoko atu e tala mitaki ke he tokologa. Liga maeke ia tautolu ke fakalahi e gahua ha tautolu he fonua he paionia tumau. Po ke maeke ke hiki atu a tautolu ke he taha matakavi ne tokofiha ni e tagata helehele. Ka ha ha ia tautolu e aga hako ke he heleheleaga, to eketaha a tautolu ke fakalataha katoatoa ke he gahua aoga nei.
7. Lata ke oti a fe e matutaki ha tautolu ke he gahua fakaputu?
7 Kua fakakaupā ni e magaaho he tau tagata gahua fonua ke fakaputu e tau fua, ti nakai okioki po ke fakalolelole a lautolu ato oti e gahua. Kua lata e helehele fakaagaaga ke pihia e aga mafiti. Lata ke oti a fe e matutaki ha tautolu ke he gahua fakaputu? He magaaho he fakaotiaga he lalolagi mo e ato “hoko ni ke he fakaotiaga.” (Mata. 24:14; 28:20) Tuga e Fekafekau mua atu ha Iehova, manako a tautolu ke oti e gahua ne tuku mai ki a tautolu ke taute. (Ioane 4:34; 17:4) Kia fakatumau a tautolu ke taute e gahua ha tautolu he fonua mo e fakamakutu, fiafia, mo e aga mitaki ato hoko e fakaotiaga. (Mata. 24:13) Nakaila oti e helehele!
[Blurb he lau 2]
Mai he kamata ke he otiaga, ko e helehele ko e magaaho gahua malolō lahi