Fakalataha Katoatoa ke he Heleheleaga
1 Ko e tau perofeta ha Iehova i tuai ti pihia mo Iesu Keriso ne tutala ki ai he gahua fakapotopoto. (Isa 56:8; Eseki. 34:11; Ioane 10:16) Ko e gahua pihia he magaaho nei nukua fakamoli he fakamatala e tala mitaki he Kautu he lalolagi katoa. (Mata. 24:14) Ko e kehekeheaga ha lautolu kua fekafekau ke he Atua mo lautolu kua nakai fekafekau ki a ia kua kitia maaliali. (Mala. 3:18) Ko e heigoa e kakano he mena nei ma tautolu?
2 Matagahua Fakatagata: Maeke ia tautolu ke ako mai he fakafifitakiaga ha Paulo, nukua putoia katoatoa ke he matamua he fekafekauaga Kerisiano. Ne logona hifo e ia e kotofaaga ke fakamatala ke maeke he tau tagata oti ke moua e magaaho ke logona e tala mitaki mo e hao ai. Kua omoi he mena nei a ia ke gahua tumau ke lata mo lautolu. (Roma 1:14-17) He mailoga e tuaga matematekelea ne fehagai mo e tau tagata he vaha nei, nakai kia ha ha ia tautolu e matagahua lahi ke fakamatala ki a lautolu he matakavi ne kotofa ki a tautolu?—1 Kori. 9:16.
3 Magaaho ma e Gahua Mafiti: Fakatatai e gahua fakamatala ke he gahua kumikumi mo e fakahao. Kua lata ke kitia e tau tagata mo e lagomatai ke hao, ato mule lahi. Tote lahi e magaaho. Hagahagakelea lahi e tau momoui! Ko e mena ia ati fakamafana e Iesu hana tau tutaki ke “olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.”—Mata. 9:38.
4 Mailoga ai e mafiti he vaha nei, tokologa e tau tagata gahua he Kautu ne fakatolomaki e gahua ha lautolu ke he gahua fakamoui nei. Ko e fuata mui ne higoa ko Hirohisa ne nofo mo e matua tokotaha he kaina fakalataha mo e tokofa e lafu ikiiki. Ne lagomatai e ia e magafaoa hana ke uhu matike he matahola tolu he magaaho pogipogi ke tufa e tau nusipepa. Ne manako foki a Hirohisa ke fakalahi atu e fekafekauaga, ti kamata a ia ke paionia mau. Fai puhala nakai a koe ke fakalataha katoatoa ke he gahua nai ka nakai liu taute foki?
5 “Kua gahoa e tau aho.” (1 Kori. 7:29) Ko e mena ia, kia taute e tautolu e tau mena oti ke lata mo e gahua aoga nukua taute he vaha nei he lalolagi—ko e fakamatala e tala mitaki he Kautu mo e taute tutaki. Ne fakatatai e Iesu hana fekafekauaga ke he gahua helehele. (Mata. 9:35-38) He fakalataha katoatoa ke he heleheleaga, ko e tau fua he gahua ha tautolu kua lauia he lagomatai e taha ke fai vala he moto tagata tokologa he tau tagata tapuaki ne fakamaama he Fakakiteaga 7:9, 10.