“Ko e Kupu he Atua kua . . . Gahua Malolo”
1 “Ko e kupu he Atua kua moui ia, mo e gahua malolo,” he tohi he aposetolo ko Paulo. (Hepe. 4:12) Ko e heigoa e kakano hana? Ko e kupu, po ke fekau he Atua ne moua i loto he Tohi Tapu kua maeke ke fakaohooho malolo ke he tau tagata. Ko e pulotu kua moua he Tohi Tapu kua malolo ke hiki e moui he taha ma e mitaki. Ko e mafanatia mo e amaamanakiaga kua foaki ne futiaki e tau tagata ke he Foaki Moui, ko Iehova ko e Atua. Maeke he fekau i loto ke fakatoka atu e tau tagata loto fakamoli ke he puhala he moui tukulagi. Pete ia, ke kitia e tau lauiaaga nei, kua lata ke fakaoga e tautolu e Tohi Tapu ka fakamatala a tautolu ke he falu.
2 Totou e Kupu Tohi he Tau Magaaho Oti: Kua tuga ke tokologa e tau tagata fakailoa ne nakai fakaaoga e Tohi Tapu he gutuhala. Moli kia e mena nei ki a koe? Ha kua tokologa e tau tagata kua nakai fai magaaho ke fakatutala loa, liga ke aga mau a koe ke foaki ni he tau tohi po ke talahau noa falu kupu tohi. Fakamalolo e mautolu e tau tagata fakailoa oti ke lali eketaha ke totou taha e kupu mai he Tohi Tapu ka fakamatala e tala mitaki, he fakaata e tagata ke kitia ko e fekau ha tautolu kua moua moli i loto he Kupu he Atua.
3 Pete ne tokogahoa e tagata ne totou e Tohi Tapu, kua fakalilifu agaia ni ki ai. Maeke foki he tau tagata lavelave ke fakatoka taha po ke ua e minuti ke fanogonogo ke he fekau ka totou fakahako mai he Kupu he Atua. Ka totou e kupu kua latatonu aki e mafanatia mo e fakamaama fakaku, ko e malolo he kupu ha Iehova ka lauia mitaki ke he tagata fanogonogo. Ka e fakamatutaki fefe e koe e vahaloto mai he fakafeleveiaaga hau ke totou e kupu mai he Tohi Tapu?
4 Fakaaoga e Mena Nei he Gahua Mekasini: Kua fakaaoga fakamitaki he leveki ahiahi e tau Tohiaga Tapu ka taute e gahua mekasini. Ne uta e ia e Tohi Tapu tote hao he kato tapulu hana. He fakakite e tau mekasini mo e talahau fakaku e vala tala, ne hafagi e ia e Tohi Tapu mo e totou e kupu kua felauaki mo e vala tala nei. Liga taute e mena nei he huhu, “Fefe e manatu hau ke he maveheaga fakamalolo nei?” ti fakaholo atu ke totou e kupu tohi kua fifili.
5 Taute mo foliaga hau ke totou taha po ke ua e kupu mai he Tohi Tapu ke he tau tagata fanogonogo oti. Ko e malolo gahua i loto ka hafagi e puhala ma e tau tagata tokologa ke fakatata ke he Atua.—Ioane 6:44.