Fakaaoga Fakamitaki e Tohi Tapu
1. Ko e heigoa hau ka liga taute he tauteute tuai ma e fekafekauaga he fonua?
1 Ko e tohi fe ni ka amanaki a tautolu ke foaki he fekafekauaga, kua aoga ke fifili e kupu tohi kua fakalagalaga e manatu ha lautolu ka fanogonogo. (Hepe. 4:12) Ko e fifili ke fakaaoga e kupu tohi i loto he tohi hau ka foaki ka lafi ke he lauia mitaki he mogo ka holo ke he tohi. He falu matakavi, kua mailoga he tau tagata fakailoa kua aoga ke toto e Tohi Tapu he lima ka fina atu ke he tagata po ke ka gahua he taha fale ke he taha fale.
2. (a) Kamata fefe e tautolu e fakatutalaaga ha tautolu aki e kupu tohi? (e) Ko e heigoa e tau mataulu faka-Tohi Tapu kua fiafia ki ai e tau tagata he matakavi?
2 Kamata Aki e Kupu Tohi: Falu tagata fakailoa ne kamata e fakafeleveiaaga ha lautolu he huhu ke he tagata he kaina e huhu fakalagalaga mukamuka ke he kupu Tohi Tapu ka mole ia ti totou mogoia e lautolu. Kua mafiti e puhala nei ke haga atu ke he Kupu he Atua. To liga fai nakai he tau fakafeleveiaaga nei ka lauia mitaki he matakavi hau?
◼ “Kaeke ha ha ia koe e malolo ke taute pihia, to taute nakai e koe e tau hikihikiaga nei?” Totou Fakakiteaga 21:4.
◼ “Ko e ha kua nonofo a tautolu he tau vaha uka pihia?” Totou 2 Timoteo 3:1-5.
◼ “Manatu nakai a koe to eke e matakavi ha tautolu mo matakavi mitaki kaeke mumuitua e tau tagata oti ke he fakatonuaga nei?” Totou Mataio 7:12.
◼ “Manatu nakai a koe to maeke e tau fanau hau ke olioli e tau tutuaga ne fakamaama mai he mena nei?” Totou Salamo 37:10, 11.
◼ “Manatu nakai a koe to hoko e magaaho ka fakamoli e tau kupu nei?” Totou Isaia 33:24.
◼ “Kua mahani nakai a koe mo e tau hikihikiaga he fakatufono ne tokutoku he mena nei?” Totou Tanielu 2:44.
◼ “Kua fa manako nakai a koe ke huhu ke he Atua e huhu nei?” Totou Iopu 21:7.
◼ “Maeke nakai ke liu kitia e tau fakahele ha tautolu ne mamate?” Totou Ioane 5:28, 29.
◼ “Iloa nakai he tau tagata mamate e tau mena he tau tagata momoui ne taute?” Totou Fakamatalaaga 9:5.
3. Maeke fefe ia tautolu ke lagomatai e tau tagata ke maama e kupu Tohi Tapu ne totou age e tautolu?
3 Fakamaama, Fakataitai, Fakagahua: Ka makai e tagata ke tutala, ua fakatepetepe e fakatutalaaga. Fakaaoga taha magaaho ke fakamaama, fakataitai, mo e fakagahua e kupu tohi kua totou e koe ke maeke he tagata ke maama. (Nehe. 8:8) Ka maama mo e talia he tau tagata e mena ne fakaako he Kupu he Atua, to maeke ke tamai e tau hikihikiaga homo lahi ke he tau momoui ha lautolu.—1 Tesa. 2:13.
4. Maeke fefe ia tautolu ke fakaaoga fakamitaki e Tohi Tapu he tau liu ahi atu?
4 Matutaki ke fakaaoga fakamitaki e Tohi Tapu he feaki e koe e fiafia. Maeke ia koe ke fakaaoga e puhala taha nei ka taute e tau liu ahi atu: (1) Fifili e kupu tohi kua lata. (2) Talahau e huhu fakalagalaga mukamuka hagaao ke he kupu tohi. Ti totou ai. (3) Fakamaama, fakataitai, ti fakagahua ai. Eketaha ke fakalahi e iloilo he tagata ke he Kupu he Atua he tau magaaho takitaha ka ahi atu a koe. To liga nakai leva ti kamata e koe e fakaakoaga Tohi Tapu!