Vala 3—Taute e Tau Fakaakoaga Tohi Tapu Holo ki Mua
Fakaaoga Lauia Mitaki he Tau Tohiaga Tapu
1. Ko e ha kua lata ia tautolu ke peehi e tau Tohiaga Tapu ka taute e tau fakaakoaga Tohi Tapu?
1 Ko e kakano ha tautolu he taute e tau fakaakoaga Tohi Tapu ko e ‘taute tutaki’ he lagomatai e tau tagata ke maama mo e talia e tau fakaakoaga he Kupu he Atua mo e fakagahua ke he tau momoui ha lautolu. (Mata. 28:19, 20; 1 Tesa. 2:13) Ko e mena ia, kua lata ke fakamatapatu e fakaakoaga aki e tau Tohiaga Tapu. Fakamua, liga lagomatai ka fakakite age ke he tau tagata fakaako e puhala ke kumi aki e tau kupu pauaki he Tohi Tapu ni ha lautolu. Puhala fe mogoia kua maeke ia tautolu ke fakaaoga e tau Tohiaga Tapu ke lagomatai a lautolu ne pihia ke holo ki mua fakaagaga?
2. Fifili fefe e tautolu e tau kupu Tohi Tapu ka totou mo e fakatutala ki ai?
2 Fifili e Tau Kupu ke Totou: Ke he tauteute tuai hau, kumi ko e felauaki fefe e tau kupu tohi takitaha mo e manatu he vala kua fakatutala ki ai, ti fifili ko e tau kupu fe hau ka veu mo e fakatutala ki ai ka fakaako. Fa mitaki ke totou e tau kupu ne fakakite e fakaveaga faka-Tohi Tapu ke he tau taofiaga ha tautolu. Maeke ke nakai totou e tau kupu tohi ne hagaao ke he tau vala tala he tupumaiaga he manatu. Kia manamanatu ke he tau manako mo e tau tutuaga he tau tagata fakaako takitaha.
3. Ko e heigoa e aoga he fakaaoga e tau huhu, mo e taute fefe e tautolu e mena nei?
3 Fakaaoga e Tau Huhu: He nakai fakamaama e tau kupu Tohi Tapu ke he tagata fakaako, toka a ia ke fakamaama atu ki a koe e tau kupu. Maeke ia koe ke fekau a ia ke taute pihia he fakaaoga fakailoilo he tau huhu. Ka maaliali e fakagahuaaga he kupu tohi, liga huhu a koe ke he puhala ka lalago he kupu e talahauaga he paratafa. He falu tutuaga, ko e huhu fakahako po ke tau fufuta huhu ka liga lata ke huhu ke he tagata fakaako ke takitaki a ia ke moua e fakahikuaga hako. Kaeke lata ke fai fakamaamaaga lafi ki luga, talahau ka oti e tali he tagata fakaako.
4. Lahi fefe e fakamaamaaga kua lata ma e tau kupu tohi ne totou e tautolu?
4 Kia Fakamukamuka: Kua fa mahani e tagata makaka he fana fiti ke taha ni e matatao ka fakaaoga ti lau he mena ne fakatonutonu a ia ki ai. Pihia foki, ko e faiaoga makaka kua nakai lata ke loga e tau kupu ke fakakite aki e manatu. Maeke ia ia ke talahau fakamukamuka, fakamaama, mo e fakahako e fekau. He falu magaaho, kua lata ia koe ke kumikumi ke he tau tohi faka-Kerisiano ke maama e kupu tohi mo e fakamaama fakahako ai. (2 Timo. 2:15) Ka e kalo mai he lali ke fakamaama e tau vala oti he kupu tohi he fakaakoaga. Putoia ni e mena kua latatonu ke fakamaama aki e manatu kua tutala ki ai.
5, 6. Lagomatai fefe e tautolu e tau tagata fakaako ke fakagahua e Kupu he Atua he tau momoui ha lautolu, ka e ko e heigoa ha tautolu ka kalo mai i ai?
5 Talahau e Fakagahuaaga Aoga: Ka latatonu, lagomatai e tagata fakaako ke kitia e puhala kua maeke e kupu tohi ke gahua fakatagata ki a ia. Ma e fakatai, ka fakatutala ke he Heperu 10:24, 25 mo e tagata fakaako ne nakaila hau ia ke he tau feleveiaaga, liga talahau e koe taha he tau feleveiaaga ti uiina a ia ke fakalataha ki ai. Ka e kalo mai he peehi ki a ia. Fakaata e Kupu he Atua ke fakaohooho a ia ke taute e tau mena kua lata ke fakafiafia a Iehova.—Hepe. 4:12.
6 He taute e tautolu e poakiaga ke taute tutaki, kia taute e tautolu ke “hoko e omaoma ke he tua” he fakaaoga lauia mitaki e tau Tohiaga Tapu.—Roma 16:26.