Fakatumau ke “Fua Loga Mai”
1 He fakaaoga e tau kupu fakatai, ne fakakite e Iesu a ia ko e vine mooli, haana Matua ko e Gahua Vine, mo e haana tau tutaki fakauku he agaaga ko e tau la vine ne fua loga. He fakamaama e matagahua he Gahua Vine fakatai, ne peehi e Iesu e aoga he pipiki malolō tumau ke he vine. (Ioane 15:1-4) Ko e fakaakoaga ke moua he tau tagata oti e fakafetuiaga tata fakatagata mo Iehova kua lata ke eke mo la ne fua loga he “vine mo[o]li,” ko Iesu Keriso. Kua lata ke fakatumau a tautolu ke moua mai loga e “fua he [a]gaga” mo e fua he Kautu.—Kala. 5:22, 23; Mata. 24:14; 28:19, 20.
2 Fua he Agaaga: Ko e holo ki mua fakaagaaga ha tautolu kua fakatatai fakalahi ai ke he puhala kua fakakite e tautolu e fua he agaaga. Kua gahua nakai a koe ke feaki e tau fua he agaaga he Atua he fakaako tumau mo e manamanatu hokulo ke he Kupu he Atua? (Filipi 1:9-11) Ua fakauaua ke liogi ma e agaaga tapu, ke moua mai e tau fua kua fakaheke a Iehova ti lagomatai he mena ia e tumau ke tupu ki mua fakaagaaga.—Luka 11:13; Ioane 13:35.
3 He feaki e tau fua he agaaga ka lagomatai foki a tautolu mo tau fekafekau fakamakai lahi. Ma e fakatai, kua omoi he fakaalofa mo e tua a tautolu ke fai magaaho mai he setulu lavelave ha tautolu ke gahua tumau he fekafekauaga. Ko e tau fua tuga e mafola, fakamanavalahi, totonu, mahani molū, mo e manako fakalatalata kua lagomatai a tautolu ke tali fakamitaki ke he tau tagata totoko. Kua fakamalolō he fiafia a tautolu ke moua e makona he fekafekauaga pete ne nakai talia he tau tagata.
4 Fua he Kautu: Manako foki a tautolu ke moua mai e tau fua he Kautu. Lauia ai e foaki he ‘poa fakaheke, ko e fua haia he tau laugutu kua fakaaue atu ke he higoa a Iehova.’ (Hepe. 13:15) Taute e tautolu e mena nei he fakapuloa fakamakai mo e mauokafua e tala mitaki. Kua lali nakai a koe ke moua loga e tau fua he Kautu he fakaholo ki mua e fekafekauaga fakatagata haau?
5 Ne fakakite e Iesu ko e tau tutaki tua fakamooli haana to moua mai e tau fua loga kehekehe. (Mata. 13:23) Ko e mena ia, kua nakai lata ia tautolu ke fakatatai a tautolu mo e falu ka e foaki katoatoa a tautolu ki a Iehova. (Kala. 6:4) Ko e kumikumi hifo fakamooli ke he tau tutūaga fakatagata ha tautolu he fakaaoga e maama he Kupu he Atua ka lagomatai a tautolu ke fakatumau e fakaheke ki a Iehova he “fua loga mai.”—Ioane 15:8.