Kua Fakaatā Kia e Koe e Agaaga he Atua ke Takitaki a Koe?
“Kia takitaki au he hāu a [a]gaga mitaki ke he kelekele molemole.”—SALA. 143:10.
1, 2. (a) Talahau falu magaaho ne fakaaoga e Iehova e agaaga tapu ke lata mo e tau fekafekau haana. (e) Kua fakakaupā ni kia e gahuahua he agaaga tapu ke he tau magaaho pauaki? Fakamaama.
KO E heigoa kua manatu e koe ka manamanatu ke he gahuahuaaga he agaaga tapu? Manamanatu nakai a koe ke he tau gahua lalahi ha Kiteona mo Samisoni? (Fakafili 6:33, 34; 15:14, 15) Liga manamanatu a koe ke he loto malolō he tau Kerisiano fakamua po ke milino he fofoga ha Setefano he tū a ia ki mua he Saneheturini. (Gahua 4:31; 6:15) He vahā foou nei, ka e kua e fiafia ne pukeina ke he tau fonoaga he tau atu motu, ko e mahani fakamooli he tau matakainaga ha tautolu kua tuku he fale puipui ma e tū uho ha lautolu, mo e tupuaga ofoofogia he gahua fakamatala? Ko e tau fakafifitakiaga oti nei kua fakakite e fakamooliaga he gahuahuaaga he agaaga tapu.
2 Kua gahuahua ni kia e agaaga tapu he tau magaaho pauaki po ke i lalo he tau tuaga matakehe? Nakai. Ne tutala e Kupu he Atua hagaao ke he tau Kerisiano kua ‘mahani ke lata mo e agaga,’ ‘takitaki he agaga,’ mo e ‘moui ke lata mo e agaga.’ (Kala. 5:16, 18, 25) Ko e tau talahauaga nei ne fakakite kua maeke e agaaga tapu ke fakaohooho tumau ke he tau momoui ha tautolu. He tau aho takitaha, lata ia tautolu ke olelalo ki a Iehova ke takitaki ha tautolu a tau manamanatuaga, tutalaaga, mo e tau gahua he puhala he agaaga haana. (Totou Salamo 143:10.) He fakaatā e tautolu e agaaga ke gahuahua mitaki he tau momoui ha tautolu, to fakatupu ia tautolu e fua kua atihake ke he falu mo e fakaheke ai ke he Atua.
3. (a) Ko e ha kua lata a tautolu ke takitaki he agaaga tapu? (e) Ko e heigoa e tau hūhū ka fakatutala a tautolu ki ai?
3 Ko e ha kua latatonu ke takitaki he agaaga tapu a tautolu? Ha kua lali e taha malolō ke pule ki a tautolu, ko e malolō kua totoko e gahuahua he agaaga tapu. Ko e taha malolō foki ne talahau he tau Tohiaga Tapu ‘ko e tino,’ ne hagaao ke he tau fatuakiloto hala he tino agahala ha tautolu, ko e tufaaga he nakai mitaki katoatoa ne moua e tautolu ko e tau hologa ha Atamu. (Totou Kalatia 5:17.) Ko e heigoa mogoia ne putoia he fakaatā e tautolu a tautolu ke takitaki he agaaga he Atua? Ha ha i ai nakai e tau lakaaga aoga ka taute e tautolu ke totoko e tohoaga he tino agahala ha tautolu? Kia onoono la tautolu ke he tau hūhū nei he fakatutala a tautolu ke he ono foki e vala he ‘fua he agaga,’ ko e “fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.”—Kala. 5:22, 23.
Mahani Molu mo e Fakauka kua Fakatupu e Mafola he Fakapotopotoaga
4. Maeke fēfē he mahani molu mo e fakauka ke lafi ke he mafola he fakapotopotoaga?
4 Totou Kolose 3:12. He fakapotopotoaga, kua tuilima e mahani molu mo e fakauka ke fakatupu e mafola. Ko e tau vala ua nei he fua he agaaga kua lagomatai a tautolu ke fehagai fakamitaki mo e falu, ke tumau e totoka ka fakaita, mo e nakai taui atu ka talahau po ke taute he falu e mahani nakai totonu. Ka fai kehekehe a tautolu mo e matakainaga Kerisiano, to lagomatai he fakamanavalahi po ke, fakauka a tautolu ke nakai tiaki e matakainaga ha tautolu ka e taute e tau mena oti ke fakamafola e matalekua. Kua lata mooli kia e mahani molu mo e fakauka he fakapotopotoaga? E, ha kua nakai mitaki katoatoa a tautolu oti.
5. Ko e heigoa ne tupu ke he vahāloto ha Paulo mo Panapa, ti ko e heigoa ne fakamaama he mena nei?
5 Manamanatu ke he mena ne hoko ki a Paulo mo Panapa. Kua gahua tokoua a laua ke he loga e tau tau ke fakaholo ki mua e tala mitaki. Igatia a laua mo e tau mahani kua atihake. Ka e, he taha magaaho, ne tupu ke he vahāloto ha laua e “hukia [ita] lahi ai e tau loto, kua mavehe kehekehe ai a laua.” (Gahua 15:36-39) Kua fakamaama he mena nei ne tupu kua hoko foki ke he tau fekafekau fakamooli he Atua e tau fekehekeheaki he falu magaaho. Ka fai kehekehe e Kerisiano mo e matakainaga, ko e heigoa ka taute e ia ke puipui e tuaga mai he tupu lahi e taufetoko ka fua mai e hagahaga kelea tukulagi?
6, 7. (a) Ko e heigoa e fakatonuaga faka-Tohi Tapu ka muitua e tautolu ato hoko e fakatutalaaga mo e matakainaga ke he ita lahi? (e) Ko e heigoa e tau aoga he “alumaki ke fanogonogo, kia fakatuai ke vagahau atu, kia fakatuai ke he ita”?
6 He fitā e fakakite he talahauaga e “hukia lahi ai,” ko e fekehekeheaki he vahāloto ha Paulo mo Panapa ne fakaofo mo e kelea lahi. Ka mailoga he Kerisiano kua kamata a ia ke ita ka fakatutala e matalekua mo e matakainaga, kua iloilo a ia ke omaoma e fakatonuaga ne moua ia Iakopo 1:19, 20: “Kia takitokotaha e tau tagata mo e alumaki ke fanogonogo, kia fakatuai ke vagahau atu, kia fakatuai ke he ita. Ha ko e mena nakai tupu e tututonu mai he Atua mai he ita he tau tagata.” Fakavē ke he tau tuaga, liga lali a ia ke hiki e matakupu, oti e fakatutalaaga, po ke fano kehe a ia ato hoko e fakatutalaaga ke he ita lahi.—Fakatai 12:16; 17:14; 29:11.
7 Ko e heigoa e tau aoga he muitua ke he fakatonuaga nei? He fai magaaho ke fakatotoka hifo, liogi hagaao ke he matakupu, mo e manamanatu ke he puhala mitaki lahi ke tali, kua fakaatā he Kerisiano a ia ke takitaki he agaaga he Atua. (Fakatai 15:1, 28) I lalo he fakaohoohoaga he agaaga, maeke ia ia ke fakakite e mahani molu mo e fakauka. Ko e mena ia kua lagomatai a ia ke omaoma ke he fakatonuaga ia Efeso 4:26, 29: “Ka ita a mutolu, aua neke hala ai . . . Aua neke hopo mai ha kupu kelea he tau gutu ha mutolu, ka ko e tau kupu mitaki ke ati hake ke he mena ke aoga ai, kia tupu ai e mitaki kia lautolu kua fanogonogo ki ai.” Mooli, ka fakatapulu a tautolu ke he mahani molu mo e fakauka, to lafi atu e tautolu e mafola mo e kaufakalataha ke he fakapotopotoaga.
Fakahauhau Haau a Magafaoa ke he Totonu mo e Mahani Mitaki
8, 9. Ko e heigoa e totonu mo e mahani mitaki, ti ko e heigoa e lauiaaga ne ha ha i ai ke he takatakaiaga he kaina?
8 Totou Efeso 4:31, 32; 5:8, 9. Tuga e hahau mitaki mo e inu momoko he aho vela, kua fakahauhau e mahani totonu mo e mitaki. Ki loto he magafaoa, to lafi atu ke he takatakaiaga mitaki. Ko e totonu ko e mahani atihake ne puna mai he fiafia mooli ke he falu, ko e fiafia ne fakakite e tau gahua lagomatai mo e tau kupu manamanatu. Ko e mahani mitaki, tuga e totonu, ko e mahani atihake ne fakakite he tau gahua kua aoga ke he falu. Ne fakamailoga ai he aga fakamokoi. (Gahua 9:36, 39; 16:14, 15) Fai mena foki ne putoia he mahani mitaki.
9 Ko e mahani mitaki ko e aga ne mua ue atu. Kua nakai putoia ni e tau mena ne taute e tautolu ka e mua atu ko e vahega tagata fēfē a tautolu. Manamanatu ke he fifine hane tauteute e tau fua lakau ma e magafaoa haana, ti kitekite e tau vala takitaha he ihiihi e ia ke kitia kua humelie mo e momoho oti e tau vala mo e nakai popo a loto po ko fafo. Pihia foki, ko e mahani mitaki ne fakatupu he agaaga tapu kua fakalagalaga e puhala moui katoa he Kerisiano.
10. Ko e heigoa ka taute ke lagomatai e tau tagata he magafaoa ke feaki e fua he agaaga?
10 He kaina Kerisiano, ko e heigoa ka lagomatai e tau tagata he magafaoa ke fefakakiteaki e totonu mo e mahani mitaki? Kua aoga lahi e iloilo tonu he Kupu he Atua. (Kolo. 3:9, 10) Fai ulu magafaoa ne putoia e fua he agaaga mo vala he fakaakoaga he afiafi he Tapuakiaga he Magafaoa. Ko e tutalaaga pihia kua nakai uka ke taute. He fakaaoga e tau puhala kumikumi kua moua ke he vagahau ha mutolu, fifili e tau tohi ke he tau vala takitaha he fua he agaaga. Liga fakatutala e mutolu e tau paratafa gahoa he tau faahi tapu takitaha, mo e fakaaoga loga e faahi tapu ma e tau vala takitaha. He fakaako a mutolu ke he vala tala, totou mo e fakatutala ke he tau kupu tohi ne tutū ai. Kumi puhala ke fakagahua e tau mena ne fakaako e mutolu, ti liogi ki a Iehova ke fakamonuina e tau laliaga ha mutolu. (1 Timo. 4:15; 1 Ioa. 5:14, 15) Maeke kia he fakaakoaga pihia ke fai lagomataiaga ke he puhala ne taute he tau tagata he magafaoa e taha mo e taha?
11, 12. Maeke fēfē e tau hoa Kerisiano tokoua ke aoga mai he fakaako e mahani totonu?
11 Ko e hoa fuata, ne manako ke kautū e fakamauaga ha laua, ne fifili ke taute e fakaakoaga hokulo ke he fua he agaaga. Aoga fēfē ai ki a laua? Pehē e hoana: “He iloa ko e totonu kua putoia e falanaki mo e mahani fakamooli ne fai kehe lahi ke he puhala ne fakafetui a maua ke hoko mai ke he aho nai. Ne fakaako a maua ke fakatokatoka atu mo e fakamagalo foki. Ti kua lagomatai ai a maua ke pehē ‘fakaaue’ mo e ‘fakamolemole atu au’ kaeke kua lata.”
12 Ko e taha hoa Kerisiano ne lekua e fakamauaga, ne mailoga ko e mahani totonu kua galo he fakafetuiaga ha laua. Ne fifili a laua ke fakaako tokoua e matakupu he mahani totonu. Ti ko e heigoa e fua? Ne manatu he taane: “Ko e fakaako ha maua ke he mahani totonu kua lagomatai a maua ke kitia e lata ke fakaatā e taha ke fakakite e manatu ka e nakai manamanatu kelea ki ai, ke kumi e mitaki ia maua ni. Kua kamata a maua ke mailoga mitaki e tau manako he taha. Ko e totonu kua putoia e uiina ke he hoana haaku ke atāina ke talahau e mena ne toka he loto haana mo e nakai ita au ke he mena ne talahau e ia. Ne kakano ai kua lata ia au ke tuku kehe e fakatokoluga haaku. He kamata a maua ke fakagahua e mahani totonu he fakamauaga ha maua, ne tote hifo fakahaga e fetotokoaki ha maua. Kua fakaohooho mooli ai.” To aoga nakai e magafaoa haau mai he fakaako e fua he agaaga?
Fakagahua e Tua ka Haia Tokotaha
13. Ko e heigoa e hagahaga kelea ke he tuaga fakaagaaga ha tautolu kua lata ia tautolu ke puipui mai i ai?
13 Kua lata e tau Kerisiano ke fakaatā e agaaga he Atua ke takitaki a lautolu ki mua he toloaga mo e takitokotaha. He lalolagi a Satani he vahā nei, ko e tau fakatino fakalialia mo e tau fakafiafiaaga fakateteki kua tupu lahi mahaki. Kua fakalagā he mena nei e hagahaga kelea ke he tuaga fakaagaaga ha tautolu. Ko e heigoa he Kerisiano ka taute? Kua fakatonu he Kupu he Atua a tautolu: “Kia tiaki ai e tau mena oti kua pilo, mo e tau mena kua puke he kelea, ka kia talia mo e mahani molu e kupu ne to, kua maeke ke fakamomoui ha mutolu a tau agaga.” (Iako. 1:21) Kia fakatutala la tautolu ke he puhala he tua, ko e vala foki he fua he agaaga, ka lagomatai a tautolu ke fakatumau e meā ki mua ha Iehova.
14. Maeke fēfē e nakai tua ke takitaki ke he mahani hehē?
14 Kakano he tua kua matapatu ai na mooli a Iehova ko e Atua ki a tautolu. Ka nakai mooli e Atua ki a tautolu, kua mukamuka lahi a tautolu ke taute e mahani hehē. Manamanatu ke he mena ne tupu ke he tau tagata he Atua he vahā i tuai. Ne fakakite e Iehova ke he perofeta ko Esekielu e tau mena fakateteki ne taute fufū, he pehē: “Ko e tama he tagata na e, kua kitia nakai e koe e tau mena ne eke he tau patu he magafaoa a Isaraela ke he pouli, takitaha e tagata ke he hana poko ne toka ai e tau fakatino? ha kua pehe a lautolu, Nakai ni fioia e Iehova a tautolu; kua tiaki e Iehova e lalolagi.” (Eseki. 8:12) Mailoga nakai e koe e mena ne lafi ke he lekua? Ne nakai talitonu a lautolu kua mailoga e Iehova e tau mena ne taute e lautolu. Nakai mooli a Iehova ki a lautolu.
15. Puipui fēfē he tua malolō ki a Iehova a tautolu?
15 Ke he taha faahi, manamanatu ke he fakataiaga ha Iosefa. Pete he mamao mai he magafaoa mo e tau tagata haana, ne nakai fakaatā e Iosefa ke taute e mahani faivao mo e hoana a Potifara. Ko e ha? Pehē a ia: “To maeke fefe ia au ke eke e mena kelea lahi ia mo e hala au ke he Atua?” (Kene. 39:7-9) E, kua mooli a Iehova ki a ia. Ka mooli e Atua ki a tautolu, to nakai onoono a tautolu ke he tau fakafiafiaaga kiva po ke taute fakatagata falu mena ne iloa e tautolu kua nakai fakafiafia e Atua. Ko e fifiliaga ha tautolu ke tuga he salamo ne lologo: “To mahani au mo e loto hako ki mua he magafaoa haku. Nakai tuku e au ki mua haku ha mena kelea.”—Sala. 101:2, 3.
Puipui e Loto Haau he Fakagahua e Manako Fakalatalata
16, 17. (a) He fakamaama he tohi he Tau Fakatai, maeke fēfē he “taha fuata, kua nakai fai manamanatu” ke kototia he agahala? (e) He fakatino he lau 26, maeke fēfē he taha mena pihia ke tupu foki he vahā nei pete ne tau tau he moui he tagata?
16 Ko e mahani fakalatalata, ko e vala fakahiku he fua he agaaga, kua fakamalolō a tautolu ke pehē nakai ke he tau mena ne vihiatia he Atua. Maeke ai ke lagomatai a tautolu ke puipui e tau loto ha tautolu. (Fakatai 4:23) Manamanatu ke he tuaga ne moua ia Tau Fakatai 7:6-23, ne fakamaama e puhala he “taha fuata, kua nakai fai manamanatu” ne mahala ke he tau lagatau he mahani fakataka. Ne kototia a ia he mole e “fina age . . . ke he puhala kua tata age ke he mafegahala ne nofo ai e fifine.” Liga fina atu a ia ke he matakavi haana he fia iloa. Mafiti ai, ne kaumahala a ia ke iloa kua takitaki a ia ke he puhala goagoa ne “taute ia ke mate ai a ia.”
17 Maeke fēfē he fuata taane ke kalo kehe mai he hehē kelea lahi mahaki nei? He omaoma e hatakiaga: “Aua neke fano kehe a koe ke he hana tau puhala loto.” (Fakatai 7:25) Ha ha i ai e fakaakoaga ma tautolu: Ka manako a tautolu ke he agaaga he Atua ke takitaki a tautolu, kua lata ia tautolu ke kalo kehe he tuku e tautolu a tautolu ke he tuaga kamatamata. Taha puhala ka fano kehe e tagata ke he puhala goagoa he “taha fuata, kua nakai fai manamanatu” ko e hiki nakai fai fakatauaga he taha ata ke he taha ata he televisoni po ke kitekite ke he Internet. He taute pauaki po ke nakai, liga to kitia e ia e tau fakatino ne fakalagalaga e mahani feuaki. To fakahiku a ia ke feaki e aga kiva he onoono e tau ata telefua, mo e tau fua kelea lahi mahaki ke he haana a loto manamanatu mo e haana a fakafetuiaga mo e Atua. Liga to lauia e moui katoa haana.—Totou Roma 8:5-8.
18. Ko e heigoa e tau mena ka taute he Kerisiano ke puipui e loto haana, ti putoia fēfē e tau mena nei ke he fakagahua he mahani fakalatalata?
18 Mooli, maeke ia tautolu mo e kua lata ia tautolu ke fakagahua e mahani fakalatalata he taute fakamafiti taha mena ka fehagai a tautolu mo e tau fakatino fakalialia. Ka kua mua e mitaki ane mai kalo kehe a tautolu he tuaga he magaaho fakamua! (Fakatai 22:3) He fakatoka e tau puipuiaga kua latatonu mo e pipiki mau ki ai kua putoia e fakagahua he mahani fakalatalata. Ma e fakatai, ko e toka tumau e komopiuta he tau mena ke kitia oti ka eke mo puipuiaga. Falu kua mitaki ke fakaaoga e komopiuta po ke kitekite e televisoni ka fai tagata he fale. Kua fifili e falu ke nakai fakaaoga e Internet. (Totou Mataio 5:27-30.) Kia taute e tautolu e tau mena oti kua lata ke puipui a tautolu mo e magafaoa ha tautolu ke maeke ia tautolu ke tapuaki ki a Iehova “mai he loto mea, mo e loto manamanatu hifo mitaki, mo e tua fakamoli.”—1 Timo. 1:5.
19. Ko e heigoa e tau aoga he fakaatā e agaaga tapu ke takitaki a tautolu?
19 Ko e fua ne fakatupu e gahuahua he agaaga tapu kua moua mai e tau aoga loga. Ko e mahani molu mo e fakauka kua lafi ke he mafola he fakapotopotoaga. Ko e totonu mo e mahani mitaki kua fakaholo ki mua e fiafia he magafaoa. Ko e tua mo e manako fakalatalata kua lagomatai a tautolu ke fakatumau e tata ki a Iehova mo e meā ki mua haana. Mua atu, fakamafana he Kalatia 6:8 a tautolu: “Ko ia kua gana e tau mena ke lata mo e [a]gaga, to helehele mai ai e ia ke he [a]gaga e moui tukulagi.” E, he fakavē ke he lukutoto he Keriso, to fakaaoga e Iehova e agaaga tapu ke fakatoka mai e moui nakai fai fakaotiaga ki a lautolu kua fakaatā a lautolu ke takitaki he agaaga.
To Tali Fēfē e Koe?
• Fakaholo ki mua fēfē he mahani molu mo e fakauka e mafola he fakapotopotoaga?
• Ko e heigoa ka lagomatai e tau Kerisiano ke fakakite e totonu mo e mahani mitaki i kaina?
• Lagomatai fēfē he tua mo e manako fakalatalata e Kerisiano ke puipui e loto haana?
[Fakatino he lau 24]
Maeke fēfē a koe ke puipui e fakatutalaaga mai he ita lahi?
[Fakatino he lau 25]
Ko e fakaako e fua he agaaga ka aoga ke he magafaoa haau
[Fakatino he lau 26]
Ko e heigoa e tau hagahaga kelea ka kalo kehe e tautolu he fakagahua e tua mo e manako fakalatalata?