Foaki e Amaamanakiaga ke he Tau Nonofogati
1 Ne fiafia pauaki a Iesu ki a lautolu ne nonofogati. Fai magaaho ne foaki fakamana e ia e lagomataiaga fakatino mo e fakamaulu a lautolu ne gagao, ka ko e hagaaki haana ko e fakapuloa e “vagahau mitaki” ki a lautolu ne nonofogati. (Mata. 11:5) Ko e fekafekauaga faka-Kerisiano he vahā nei kua matutaki ke aoga ki a lautolu ne nonofogati ti pihia mo e falu foki.—Mata. 24:14; 28:19, 20.
2 Amaamanakiaga Mooli: Ko e tau fekafekau he Kerisitenitome kua fa mavehe ki a lautolu ne nonofogati to monuina a lautolu ka foaki fakamokoi ke he lotu. Ka e, fakaako mai e Tohi Tapu ko e Kautu he Atua hokoia ka fakaoti e mativa mo e fakamafola e tau lekua he tagata. (Sala. 9:18; 145:16; Isaia 65:21-23) He fakakite ki a lautolu ne nonofogati e mena ne fakaako mooli he Tohi Tapu, kua foaki e tautolu e amaamanakiaga mo e lagomatai a lautolu ke fakamakona aki e tau manako fakaagaaga ha lautolu.—Mata. 5:3, NW.
3 Ko e tau Farasaio he vahā a Iesu ne onoono hifo ki a lautolu ne nonofogati, ti fakahigoa a lautolu ko e ‘am-ha·’aʹrets, po ke “tau tagata he motu.” Pete ia, ne onoono a Iesu ke he “ha lautolu a tau toto” po ke moui kua “uho foki.” (Sala. 72:13, 14) Maeke ia tautolu ke fifitaki a Iesu mo e ‘fakakite e fakaalofa’ ki a lautolu ia ne nonofogati he totonu mo e fiafia fakatagata ki ai. (Fakatai 14:31) Nakai manako a tautolu ke vagahau fakateaga hagaao ke he tau tagata ne nonofo mativa he tau tuuta kaina po ke tehatehaua ke fakamatala ki a lautolu. Tokologa ne tali atu ke he fekau he Kautu kua nakai muhukoloa.
4 Lagomatai Mogonei: Ko e fakaako e tautolu e tau matapatu fakaakoaga he Tohi Tapu ki a lautolu ne nonofogati he fonua ha tautolu kua lagomatai foki a lautolu ke fakatote hifo e tau lauiaaga he mativa he magaaho tonu nei. Ma e fakatai, kua nakai talia he Tohi Tapu e konahia, pelē tupe, teva, mo e fakaaoga he tapaka, mo e falu gahua foki ne takitaki ke he mativa. (Fakatai 6:10, 11; 23:21; 2 Kori. 7:1; Efeso 5:5) Kua fakamalolō he tau Tohiaga Tapu e mahani fakamooli mo e gahua “mo e loto,” mai he tau tagata gahua. (Kolo. 3:22, 23; Hepe. 13:18) Ti, he taha kumikumiaga ne tokologa e takitaki gahua ne tuku mua e mahani hakohako mo e mahani fakamooli ko e tau aga ne nava lahi a lautolu ke he tau tagata kumi gahua.
5 Kua nakai fakateaga a Iehova ke he tau matematekelea ha lautolu ne nonofogati. Nakai leva to laveaki e Iesu Keriso a “ia ne nofogati he hana kalaga mai.” (Sala. 72:12) Ato hoko ke he magaaho ia, ha ha ia tautolu e monuina ke fakamafana e falu, putoia a lautolu ne nonofogati, aki e fekau he amaamanakiaga he Tohi Tapu.