‘Kia Nonofo Tauteute ke he Tau Gahua Mitaki Oti Kana’
1 He kamata e Iesu e matagahua foou he fakamatala, ne fai magaaho a ia ne fakaaoga ke tauteute e tau tutaki haana. (Mata. 10:5-14) Pete ne lavelave a tautolu oti, ko e fai minuti gahoa ke tauteute ato fakalataha ke he fekafekauaga he taha gutuhala ke he taha gutuhala ka lagomatai a tautolu ke helehele e tau fua mitaki.—2 Kori. 9:6.
2 Puhala ke Tauteute: Kua kamata e tauteuteaga mitaki he fakamahani ke he tohi ne pulega a tautolu ke foaki. Kua lata foki ia tautolu ke manatu hagaao ke he tau tagata he fonua ha tautolu. Ko e heigoa e tau lekua ne tupetupe ai a lautolu? Ko e heigoa e tau taofiaga fakalotu kua liga fehagai mo tautolu? Maeke ia tautolu ke fakakia ke he tau fakataitaiaga fakatai he Ha Tautolu a Fekafekauaga he Kautu mo e Reasoning From the Scriptures ma e tau manatu.
3 He fanogonogo fakamitaki ke he tau fakatātāaga ne foaki mai he Feleveiaaga Fekafekau ka lagomatai aki foki a tautolu. He mahani a tautolu ke fakaaoga e fakataitaiaga, to tote e magaaho ha tautolu ke tauteute. Pete ia, he tau magaaho takitaha to ō a tautolu ke he fekafekauaga, ka manamanatu a tautolu ke he mena ka talahau mo e fakatumau ke fakatolomaki ki mua e fakataitaiaga ha tautolu, to lauia mitaki lahi a tautolu. Kua lata foki ia tautolu ke fai magaaho ke fakakia e kato fakamatala ha tautolu ke he tau mena kua lata ke uta.
4 Ko e heigoa ka lagomatai a tautolu ke manatu e fakataitaiaga? Ko e fakataitai fakaleo lahi ko e taha puhala ke tokaloto e mena ka manako a tautolu ke talahau. Falu ne olioli e tau magaaho fakataitai ka taute he fakaakoaga fakamagafaoa ha lautolu. Lagomatai lahi ke he falu ke tohi e vala tala kū he fakataitaiaga ha lautolu he laupepa mo e fakakia ki ai ato hoko ke he gutuhala.
5 Kakano ne Aoga Ai: He tauteute fakamitaki kua fakatupu e lauia mitaki mo e olioli ha tautolu he fekafekauaga. Kua lagomatai a tautolu ke fakatotoka mo e ke nakai hopoate he gutuhala. Kua maeke ia tautolu ke fanogonogo fakalahi ke he tagata he kaina ka e nakai lavelave he manamanatu ke he mena ha tautolu ka talahau. Lafi ki ai, he mahani mo e tohi ka lagomatai a tautolu ke hakahakau lahi ka foaki ai.
6 Kua fakamalolō he tau Tohiaga Tapu a tautolu ‘kia nonofo tauteute ke he tau gahua mitaki oti kana.’ (Tito 3:1) Fai gahua foki nakai ne mua atu ke he fakamatala e tala mitaki? He tauteute fakamitaki, to fakakite e tautolu e fakalilifu ke he tagata he kaina ne talia ke fanogonogo, mo e ki a Iehova, ko e Atua ne hukui e tautolu.—Isaia 43:10.