Fakatolomaki ki Mua e Lotomatala Haau he Fekafekauaga—Mautauteute e Tau Kupu Hafagi

Kakano kua Aoga Ai: Ka nakai fakalagalaga e fiafia he tau kupu hafagi ha tautolu, to fakaoti he tagata he kaina ha tautolu a fakatutalaaga ato fakamatala ai. Ti tokologa e tau tagata fakailoa ne manamanatu ko e tau kupu hafagi ha lautolu kua mua e aoga he ha lautolu a fakafeleveiaaga. Pete ni kua moua e tau fakafeleveiaaga fakataitai i loto he tau Ha Tautolu a Fekafekauaga he Kautu mo e he tohi Reasoning, kua nakai putoia tumau e fakafeleveiaaga katoatoa, ke maeke ke hikihiki ai. Pete kua katoatoa e fakafeleveiaaga fakataitai, maeke e tau tagata fakailoa ke fifili ke fakaaoga ai po ke tauteute ni ha lautolu. To lauia mitaki e tau kupu hafagi ha tautolu kaeke ke mautauteute fakamitaki e tau kupu ha tautolu ka e nakai tala noa he mogo ka hafagi he tagata he kaina e gutuhala.—Fakatai 15:28.

Puhala ke Taute Ai:

Fifili e matakupu haau. Kua lata ke fakavē ke he tohi ne foaki e koe mo e ke he mena kua fiafia e tau tagata he fonua haau.
Mautauteute fakamitaki e tala fakamua po ke ua to talahau e koe he mogo ka oti e fakafeleveiaaga fa mahani. Liga kamata a koe he pehē: “Kua hoko mai au ha ko e . . . ,” “Tokologa e tagata kua tupetupe hagaao ke he . . . ,” “Fia loto au ke moua haau a manatu . . . ,” po ke taha mena kehe. Ko e tau tala kukū mo e mukamuka kua mitaki lahi. Falu tagata fakailoa ne fifili ke ako manatu e tau fakafeleveiaaga ha lautolu.
Tauteute e hūhū ke takitaki ai e tagata he kaina ke kamata e fakatutalaaga. (Mata. 17:25) Manatu ne liga nakai manamanatu a ia ke he falu mena foki ato hoko a koe, ti lata e hūhū ke nakai uka po ke fakatupetupe aki a ia.

Fakatai e Mena Nei he Mahina Ia:

Fakatoka pauaki e taha magaaho he tapuakiaga magafaoa ke tauteute mo e fakamahani ke he tau kupu hafagi.
Ka ha ha he fonua tutala auloa mo e tau tagata fakailoa foki e tau mena kua amanaki a koe ke talahau. (Fakatai 27:17) Hiki haau a fakafeleveiaaga ka nakai lauia mitaki ai.