Puhala ke Tauteute e Tau Fakafeleveiaaga Lauia Mitaki
1. Aoga fēfē ke mitaki e fakafeleveiaaga?
1 Tuga ni e kai tote ne lolo he kamataaga ti amaamanaki lahi mogoia ke he kai lahi ka mui mai, ko e fakafeleveiaaga mitaki kua hafagi e gutuhala ke he tau fakatutalaaga atihake faka-Tohi Tapu. Ko e tau fakafeleveiaaga lauia mitaki kua nakai tatai e loa mo e kakano, ka kua lata tumau ke manamanatu tuai mo e tauteute fakamua. (Fakatai 15:28) Ko e heigoa ne taute e fakafeleveiaaga ke lauia mitaki?
2. Tauteute fēfē e tautolu e fakafeleveiaaga omoomoi?
2 Fifili e Tau Manatu Omoomoi: Kua lata e fakafeleveiaaga ha tautolu ke fakatupu e fiafia, neke fakaoti he tagata he kaina e fakatutalaaga. Ti ka tauteute ai, manamanatu ke he tau mena tutupu he matakavi. Manamanatu nakai e tau tagata he matakavi ke he mitaki e fakatufono, fiafia e moui he magafaoa, po ke fakaoti e felakutaki? Kua fa fiafia e tau tagata ke talahau e manatu ha lautolu, ati tauteute e hūhū fakalagalaga. Maeke nakai ia koe ke fakaaoga taha he tau fakafeleveiaaga fakataitai mai he Ha Tautolu a Fekafekauaga he Kautu ti hikihiki ai ke felauaki mo e fonua ha mutolu? He ha he fakataitai ai he falu magaaho e tau fakafeleveiaaga ka taute e Tapuakiaga Magafaoa he afiafi?
3. Fatifati fēfē e tautolu e fakafeleveiaaga ha tautolu ke felauaki mo e aga motu mo e feakiaga he tau tagata he fonua ha tautolu?
3 Manamanatu ke he Aga Motu mo e Feakiaga: He falu matakavi, kua amanaki ki a tautolu ke hoko atu ti talahau e fekau ha tautolu. He falu matakavi, tuga nakai fai mahani ka nakai hūhū e tagata ne ahiahi atu ke he tuaga he magafaoa ti liga talahau e ia falu tala hagaao ki a ia ni. He falu matakavi, ko e feakiaga fakalotu he tau tagata ka fakaatā a tautolu ke atāina ke fakaaoga e Tohi Tapu he fakafeleveiaaga ha tautolu. (Gahua 2:14-17) Pete ia, ko e tau tagata ne fakalataha ke he lotu nakai faka-Kerisiano po ke nakai fai lotu, liga mitaki ke tutala ke he Tohi Tapu ka liu aahi atu, ka e nakai he mogo fakamua.—Gahua 17:22-31.
4. Lata a tautolu ke mataala fēfē ke he tau kupu fakafeleveia ha tautolu he kamataaga?
4 Tau Kupu Fakafeleveia: Tauteute fakamitaki e tau kupu fakafeleveia. Kua fa mitaki lahi ke fakakū mo e fakamukamuka e tau tala. Kua aoga lahi foki e puhala ka talahau aki e tau kupu fakafeleveia ha tautolu. Kia makaukau. Kua fakakite he mamali mooli mo e mafanatia e fiafia ha tautolu ke he tagata he kaina. Ko e muitua ke he tau puhala nei ka lagomatai a tautolu ke tauteute e tau fakafeleveiaaga ka amaamanaki lahi ki ai ka fakamalolō e tau tagata he fonua ha tautolu ke fakalataha ke he “tufaaga he laulau he Iki [Iehova].”—1 Kori. 10:21.