Fakaako e Falu ke Fakaalofa ki a Iehova
1. Ko e heigoa ne futiaki e falu ki a Iehova?
1 Manatu nakai e koe e magaaho fakamua ne logona e koe hagaao ki a Iehova? Ko e heigoa ne futiaki a koe ki a ia? Tokologa e tagata loto fakamooli ka tala atu ki a koe kua futiaki fakatata a lautolu ke he Tufuga ha tautolu he moua e iloilo hagaao ke he tau mahani homo ue atu haana, mua atu ke he haana fakaalofa hofihofi noa mo e fakaalofa.—1 Ioa. 4:8.
2, 3. Fakaaoga fēfē e tautolu e tohi Fakaako he Tohi Tapu ke lagomatai e tau tagata fakaako Tohi Tapu ke tupu e fakaalofa ha lautolu ma Iehova?
2 “Ko e ha Tautolu a Atua Hanai”: Kua fakamau he tohi Fakaako he Tohi Tapu e fakaalofa ha Iehova mo e lata ke fai fakafetuiaga fakatagata mo ia. Fakaaoga fēfē e tautolu e tohi nei ke fakaako e falu ke tupu e fakaalofa ha lautolu ma e Atua? Ka hagaaki ke he manatu foou, maeke ia tautolu ke hūhū e tau hūhū fakalagalaga manatu, tuga anei: “Ko e heigoa he kupu mooli nei ne fakakite hagaao ki a Iehova?” po ke “Ko e puhala fe he manatu nei kua fakakite ko Iehova ko e Matua mitaki lahi mahaki kua manako ki ai e tau tagata?” He fakaako ke he puhala nei ka lagomatai e tagata fakaako ke kamata e fakafetuiaga tukulagi mo Iehova.
3 Ka lagomatai e tautolu e tau tagata fakaako Tohi Tapu ke loto fakaaue he lilifu ke moua e iloilo hagaao ke he Atua mooli tokotaha mo e moui, to maeke ia lautolu ke talahau tuga e tau kupu ha Isaia, “ko e ha tautolu a Atua hanai.” (Isaia 25:9) Ka fakamaama e Kupu he Atua, kua lata ia tautolu ke fakamaama e puhala ka fakamonuina ha ko e fakamooliaga he tau finagalo ha Iehova he puhala he fakatufono fakapatuiki haana i lalo hifo a Keriso Iesu.—Isaia 9:6, 7.
4, 5. Ko e heigoa e kakano he fakaalofa ki a Iehova?
4 Fakamooliaga he Fakaalofa ma Iehova: Kua iloa e tautolu ko e fakaalofa ki a Iehova mo e loto, solu, mo e manatu katoa kua nakai ni ko e tau logonaaga malolō hagaao ke he Atua. Ka kua lata ia tautolu ke talia mo e tapiki mau ke he puhala manamanatu haana. (Sala. 97:10) Kua kitia e fakaalofa ma e Atua he omaoma katoatoa e tau poakiaga haana mo e matutaki ke taute e “tau mahani mitaki mo e tau mahani Atua,” pihia foki ka feleveia mo e tau kamatamata mo e totokoaga.—2 Pete. 3:11; 2 Ioa. 6.
5 Ko e taute e finagalo he Atua mai he fakaalofa ki a ia ko e mena fiafia lahi. (Sala. 40:8) Kua latatonu e tagata fakaako Tohi Tapu ke loto fakaaue ke he tau poakiaga oti he Atua ne taute ma e mitaki tukulagi he Haana tau fekafekau. (Teu. 10:12, 13) He momoui fakatatau ke he takitakiaga ha Iehova, kua fakatātā he tagata e loto fakaaue hokulo ke he tau gahua homo ue atu oti Haana. Lagomatai e tagata fakaako ke maama ko e o he tau puhala tututonu ha Iehova ka hao mai e tagata he loto mamahi.
6. Ko e heigoa e tau monuina ka moua he tagata he fakaalofa ki a Iehova?
6 Tau Monuina ma Lautolu kua Fakaalofa ke he Atua: Kua leveki fakalahi e Iehova a lautolu ne fakatokolalo ne fakaalofa ki a ia, ti fakakite e ia ki a lautolu e ‘tau mena hokulo he Atua.’ (1 Kori. 2:9, 10) Mo e iloilo pihia ke he tau finagalo ha Iehova, kua ha ha ia lautolu e onoonoaga maaliali he vahā anoiha mo e amaamanakiaga mauokafua. (Iere. 29:11) Ko lautolu ne fakaalofa ki a Iehova kua eke mo tau tagata totonu lahi mahaki haana. (Esoto 20:6) Kua ofania e lautolu e amaamanakiaga he moui tukulagi ha ko e fakaalofa lahi he Atua ki a lautolu.—Ioane 3:16.
7. Fēfē e logonaaga haau he fakaako e falu ke fakaalofa ki a Iehova?
7 Ka iloa lahi e tautolu e Matua ha tautolu he lagi, to fakailoa fakalahi atu foki e tautolu ke he falu. (Mata. 13:52) Ko e lilifu lahi mahaki mooli ke fakaako e falu, mo e mua atu ke he tau fanau ha tautolu, ke fakaalofa ki a Iehova! (Teu. 6:5-7) Kia matutaki a tautolu ke fakalataha mo e tau tagata fakaako Tohi Tapu ha tautolu ke kalaga fiafia mo e fakaheke he iloa e tautolu e ‘mitaki lahi ha Iehova.’—Sala. 145:7.