Aoga Lahi e Fakaako Tohi Tapu Fakatagata mo e Fakamagafaoa!
1. Ko e heigoa e mena kua manamanatu pauaki e Kau Fakatufono ki a tautolu he magaaho nei, ti ko e ha ne pihia ai?
1 Tuga he senetenari fakamua, ne manamanatu hokulo e Kau Fakatufono ke he tuaga he tau tagata ha Iehova. (Gahua 15:6, 28) He tata lahi mai e matematekelea lahi, kua aoga lahi ma e tau tagata fakailoa takitaha he Kautu ke moua e fakafetuiaga mauokafua mo Iehova. To fakaaoga fēfē e koe e magaaho ne fakatoka ma e Fakaakoaga Tohi he Fakapotopotoaga he magaaho fakamua? Kua fakamafana ke he tau tagata oti ke fakaaoga e magaaho nei ma e tapuakiaga fakamagafaoa. Ko e fakaaoga fakailoilo he magaaho nei ka fakaatā a tautolu ke keli hifo fakahokulo ke he Kupu omoomoi he Atua ti moua e tau vai foaki moui i ai.—Sala. 1:1-3; Roma 11:33, 34.
2. Liga fakatokatoka fēfē e afiafi tapuaki fakamagafaoa ha tautolu?
2 Tapuakiaga Afiafi he Magafaoa: Kua fakamalolō ke he tau ulu magafaoa ke hahamo ha lautolu a kotofaaga ki mua ha Iehova ke taute fakamitaki e fakaholoaga kakano lahi mo e tumau he fakaakoaga Tohi Tapu he magafaoa. (Teu. 6:6, 7) Ko lautolu e tau matakainaga takitokotaha ne nakai fai matagahua fakamagafaoa ka fakaaoga e magaaho nei ma e fakaako mo e kumikumi fakatagata ke he Tohi Tapu. Kua aoga lahi ma tautolu oti ke [“fakatau e tau magaaho,” NW] ma e fakaako mo e manamanatu fakahokulo ke maeke ke fakatumau e malolō fakaagaaga ke fehagai mo e ‘tau aho kelea.’—Efeso 5:15, 16.
3, 4. Ko e heigoa e tau lagomataiaga ne foaki ko e tau koloa ke liga fakaaoga e tautolu, mo e ko e heigoa ka tokaloto?
3 Tau Mena ke Fakaako: Ko e Watch Tower Publications Index po ke Watchtower Library he CD-ROM ka lagomatai a koe ke moua e tau vala tala ke fakalagalaga e fiafia he tau magaaho fakaako Tohi Tapu haau. Maeke e tau magafaoa ke fakaaoga e tau vala tala mai he Ko e Kolo Toko, tuga ne fa kitia tumau “Tau Kei ke Fiafia e Magafaoa,” “Fakaako e Tau Tama ha Mutolu,” mo e “Ma e Tau Fuata ha Tautolu.” Ha ha foki he Awake! e tau fufuta “Young People Ask” mo e tau vala tala fulufuluola hagaao ke he homo ue atu he tau tufugatia.
4 Kua maeke e totou fakahautoka he Tohi Tapu ke peehi e tau matapatu fakaakoaga mahani Atua mo e tau fakatonuaga ke he tau manamanatuaga mo e tau loto ha lautolu oti he magafaoa. (Hepe. 4:12) He falu magaaho, liga kitekite mo e fakatutala a koe ke he taha he tau vitiō ne taute he fakatokatokaaga. Lahi e magaaho ke fakagahua e makaka mo e makutu. Ko e ha he nakai hūhū ai ke he magafaoa haau ko e heigoa ha lautolu ne manako ke fakatutala ki ai?
5. Ko e ha kua aoga lahi ke he tau momoui ha tautolu mogonei e fakaako he Tohi Tapu fakatagata mo e fakamagafaoa?
5 Kakano ne Aoga Mogonei: Ko e fakamalolō e tuaga fakaagaaga ha tautolu ka tauteute a tautolu ke ‘tutu mau mo e kitekite ke he fakamouiaga mai ia Iehova.’ (Esoto 14:13) Kua lata e tau matua ke moua e takitakiaga faka-Atua ke feaki aki e tau fanau “he hau fakakeukeu mo e faliuliu.” (Filipi 2:15) Kua lata e tau fanau ke lagomatai ke fehagai mo e tuaga kelea he tau mahani he tau aoga he vahā nei. (Fakatai 22:3, 6) Kua mitaki ma e tau hoa mau ke fakamalolō ha lautolu a “toua kave tolu” mo Iehova. (Fakama. 4:12) Kia fakaaoga fakapulotu ā e tautolu e tau magaaho ne toe ke atihake e tautolu ha tautolu “a tua kua tapu ue atu”!—Iuta 20.