Fakamalolō Fakaagaaga Tumau he Gahua Fakamatala a Tautolu
1. Ko e heigoa e aoga ne moua e tautolu ke he gahua fakamatala?
1 Maeke he taute fakamakutu e gahua fakamatala ke fakamalolō fakaagaaga mo e fakatupu e fiafia ha tautolu. Mooli, ko e matapatu kakano he taute e tautolu e gahua fakamatala ke fakafiafia a Iehova. Pete ia, he omaoma e poaki ke ‘fakamatala e kupu,’ kua moua e tautolu e tau monuina a Iehova mo e aoga foki ki a tautolu he falu puhala. (2 Timo. 4:2; Isaia 48:17, 18) Ti maeke fēfē he gahua fakamatala ke fakamalolō mo e fakafiafia a tautolu?
2. Ko e heigoa e tau puhala ne fakamalolō he gahua fakamatala a tautolu?
2 Kua Fakamalolō mo e Fakamonuina a Tautolu: Kua fakamalolō he gahua fakamatala a tautolu ke hagaaki ke he tau monuina he Kautu ka e nakai ke he tau lekua he magaaho nei. (2 Kori. 4:18) He fakamaama e tau fakaakoaga he Tohi Tapu kua fakamalolō e tua ha tautolu ke he tau maveheaga ha Iehova ti atihake e loto fakaaue ha tautolu ma e kupu mooli. (Isaia 65:13, 14) He lagomatai e tautolu e falu ke tupu fakaagaaga ke “nakai ko e tau tagata he lalolagi,” kua fakamalolō e fifiliaga ni ha tautolu ke vevehe kehe mai he lalolagi.—Ioane 17:14, 16; Roma 12:2.
3. Lagomatai fēfē he gahua fakamatala ha tautolu a tautolu ke feaki e tau mahani faka-Kerisiano?
3 He fakalataha ke he gahua fakamatala kua lagomtai a tautolu ke feaki e tau mahani faka-Kerisiano. Ma e fakatai, he lali ke ‘eke mo tau mena oti ke he tau tagata oti’ kua lagomatai a tautolu ke fakatupu fakalahi e mahani fakatokolalo. (1 Kori. 9:19-23) He tutala a tautolu ki a lautolu kua “tiaki atu ai, tuga e tau mamoe nakai fai leveki,” kua hihiga a tautolu ke iloa e fakaalofa hofihofi mo e logonaaga fakaalofa. (Mata. 9:36) Ne iloa e tautolu e fakauka ka fakamanavalahi a tautolu pete he fakaheu po ke totoko mai. Kua tupu e olioli ha tautolu ha kua foaki ne tautolu a tautolu ke lata mo e falu.—Gahua 20:35.
4. Fēfē e logonaaga haau ke he gahua fakamatala haau?
4 Ko e monuina mooli ke taute e gahua fakamatala ne foaki e fakahekeaga ki a Ia hokoia kua lata mo e tapuakiaga ha tautolu! Kua fakamalolō he gahua fakamatala a tautolu. Kua tamai e tau monuina loga ki a lautolu hane fakalataha katoatoa he ‘talahau fakatonu atu e tala mitaki.’—Gahua 20:24.