Maeke Fēfē ia Koe ke Fakauka ke he Fekafekauaga?
KUA fa logona nakai e koe e lolelole lahi mahaki ti manako a koe ke fakaoti e gahua fakamatala? Ko e totokoaga malolō, tupetupe, matematekelea e malolō tino, peehi mai he falu, po ke nakai kitia ha fua ka liga kamatamata e fakauka ha tautolu. Ka e manamanatu la ke he fakafifitakiaga ha Iesu. Ne fakauka a ia ke he tau kamatamata velagia “ha ko e fiafia kua toka ki mua hana.” (Hepe. 12:2) Ne iloa e ia, he fakakite kua nakai fai fakavēaga mooli e tau tukumale ne taute ke he Atua, ne fakafiafia e ia e loto ha Iehova.—Fakatai 27:11.
He fakauka ke he fekafekauaga, kua maeke foki ia koe ke fakafiafia e loto a Iehova. Ka e kua ka fai lekua ne liga fofō e malolō fakaagaaga haau? Ko Krystyna, ne kua motua tuai ti matematekelea e malolō tino, ne talahau: “Nakai matakehe ki a au ke logona e lolelole mo e fakaagitau. Ko e tau lekua haaku he motua, tuga e matematekelea e malolō tino mo e tau tupetupe ke he moui he tau aho takitaha, kua maeke ke fakalolelole fakakū e makutu haaku.” Maeke fēfē ia koe ke fakauka ke he fekafekauaga pete he tau lekua pihia?
Fifitaki e Tau Perofeta
Ke fakauka ke he gahua fakamatala, kua maeke e tau tagata fakailoa he Kautu ne tua fakamooli ke eketaha ke moua e aga manamanatu tuga he tau perofeta i tuai. Kikite ke he fakafifitakiaga ha Ieremia. He kotofa ke eke mo perofeta, ne fakauaua a ia he kamataaga. Pete ia, ne maeke a Ieremia ke fakauka ke he kotofaaga uka haana ke molea e 40 e tau ha kua ako a ia ke falanaki katoatoa ke he Atua.—Iere. 1:6; 20:7-11.
Ko Henryk, ne moua e fakamalolōaga mai he fakafifitakiaga ha Ieremia. Ne pehē a ia: “He molea e 70 e tau ne fekafekau ai au, ne fai magaaho ne fakalolelole au ha ko e tau tali he tau tagata—ko e favale ha lautolu po ke nakai fetataiaki a lautolu. He tau magaaho pihia, ne fakamanatu e au ki a au e fakafifitakiaga ha Ieremia. Ko e haana fakaalofa ma Iehova mo e malolō fakaagaaga haana ati maeke ai a ia ke matutaki ke perofeta atu.” (Iere. 1:17) Ne omoomoi foki a Rafał ha ko e fakafifitakiaga ha Ieremia. Ne pehē a ia: “He nakai hagaaki a Ieremia ki a ia ni mo e tau logonaaga haana ka e falanaki ke he Atua. Ne matutaki atu a ia mo e nakai matakutaku pete he laulahi e fakafualoto. Ne lali au ke tokaloto e mena ia.”
Taha foki e perofeta ne lagomatai e tokologa ke fakauka ke he fekafekauaga ha ko e fakafifitakiaga haana, ko Isaia. Ne tala age e Atua ki a ia to nakai fanogonogo e tau tagata he motu haana ki a ia. “Kia fakamatolu ai e tau loto he motu nai, ti fakatuli ai ha lautolu a tau teliga,” he talahau e Iehova. Kua talahau tuai kia a Isaia ke kaumahala? Nakai pihia mai he onoonoaga he Atua! He kotofa a ia ko e perofeta, ne pehē a ia: “Ko au hanai, kia fakafano atu e koe au.” (Isaia 6:8-10) Ne pipiki mau a Isaia ke he fekau haana. Pihia nakai e tali atu haau ke he poaki ke fakamatala?
Ke fakauka ke he fekafekauaga pete kua nakai talia he tau tagata, tuga ne taute e Isaia, lata ia tautolu ke kalo mai he hagaaki ke he tau tali nakai atihake ne feleveia mo tautolu. Ne fehagai a Rafał mo e fakalolelole ke he puhala nei: “Ne lali au ke kalo mai he takele ke he tau kupu hukia. Kua tonuhia e tau tagata he matakavi haaku ke tali ke he ha puhala ne manako a lautolu ki ai.” Ne lafi e Anna: “Nakai fakaatā e au e tau manatu haaku ke takele ke he ha mena kelea po ke fakalolelole. Ko e mena ne lagomatai au ke taute pihia ko e liogi mo e taute e lauga he aho ato fano au he gahua he fonua. Kua galo vave e tau manatu kelea.”
Ko e perofeta ko Esekielu ne fekafekau he vahāloto he tau Iutaia fakafualoto ne fakapaea ki Papelonia. (Eseki. 2:6) Ane mai nakai talahau he perofeta e tau kupu he Atua ke he tau tagata ti mate e tagata mahani kelea he nakai logona e hatakiaga, to hili e lekua ia ki a Esekielu. Ne tala age a Iehova ki a Esekielu: “Ko e toto haana to taui atu ai e au kia koe.”—Eseki. 3:17, 18.
Ne lali a Henryk ke moua e onoonoaga tuga ha Esekielu: “Manako au ke meā he toto he tau tagata oti. Ko e tau momoui uho he tau tagata kua hagahaga kelea.” (Gahua 20:26, 27) Ko Zbigniew ne pihia foki e logonaaga: “Ne eketaha a Esekielu ke holo ki mua pete e tau manatu he falu. Kua lagomatai he mena nei au ke kitia e gahua fakamatala mai he onoonoaga he Tufuga.”
Nakai Tokotaha a Koe
Nakai tokotaha a koe he taute e gahua fakamatala. Tuga e aposetolo ko Paulo, kua maeke ia tautolu ke pehē: “Ko e tau ekegahua a [t]autolu fakalataha mo e Atua.” (1 Kori. 3:9) Ne talahau e Krystyna, ne fa fakaagitau a ia, he pehē: “Ko e kakano a ia ne fakatumau au ke olelalo ki a Iehova ma e malolō. Ne nakai fakatō noa e ia au.” E, kua lata ke moua e agaaga tapu he Atua ke lalago a tautolu ke he fekafekauaga ha tautolu!—Saka. 4:6.
He fakalataha a tautolu ke he gahua he fonua, kua lagomatai foki he agaaga tapu a tautolu ke fakatātā e tau mahani ne fakakite e “fua he [a]gaga.” (Kala. 5:22, 23) Kua lagomatai ai a tautolu ke fakatumau ke he gahua fakamatala, pete ko e heigoa e mena ka tupu. Ne talahau e Henryk: “Ko e fakalataha ke he gahua he fonua kua lagomatai au ke feaki e aga fakatagata haaku. Ne ako au ke fakamanava lahi mo e manamanatu mo e nakai fiu vave.” He fakauka ke he fekafekauaga pete he kehekehe e tau lekua ka lagomatai a koe ke feaki fakalahi ki mua e fua he agaaga.
He takitaki e gahua kehe lahi nei, ne fakaaoga e Iehova e tau agelu haana. (Fakakite. 14:6) Ne fakakite he Tohi Tapu e “afe mo afe, mo e tau afe he tau afe” e tau mena momoui fakaagaaga pihia. (Fakakite. 5:11) I lalo he takitakiaga ha Iesu, ne lalago he tau agelu e tau fekafekau he Atua he lalolagi. Tokaloto nakai e koe e mena ia ka gahua a koe he fonua?
“He manamanatu fakahokulo kua ha ha mooli e tau agelu mo tautolu ke he fekafekauaga ko e punaaga a ia he malolō ki a au,” he talahau e Anna. “Ne tokiofa e au e lagomatai ne foaki e lautolu i lalo he takitakiaga ha Iehova mo Iesu.” Ko e lilifu ha ia ke maeke ke gahua mo e tau agelu tua fakamooli!
Ka e kua e tau matakainaga fakailoa he Kautu? Kua monuina a tautolu ke iloa e tau tagata tokologa he Tau Fakamoli ne tua. Nakai fakauaua kua mailoga e koe e mooli he kupu he Tohi Tapu: “Kua fakamata ai e lapatoa ke he lapatoa, kua fakamalolo foki pihia e tagata ke he hana kapitiga.”—Fakatai 27:17.
He gahua auloa mo e falu he fekafekauaga kua foaki ki a tautolu e magaaho homo ue atu ke kitia e tau puhala lauia mitaki ne liga foou ki a tautolu. Pehē a Elżbieta, “Ko e gahua mo e tau tagata fakailoa kehekehe kua foaki mai ki a au e tau magaaho mitaki ke fakakite e fakaalofa ke he tau matakainaga talitonu haaku mo e ke he tau tagata ne feleveia mo tautolu.” Lali ke gahua mo e tau tagata fakailoa kehekehe he fekafekauaga. To fiafia e fekafekauaga haau.
Leveki Fakamitaki a Koe
Ke tumau e fiafia ha tautolu ke he fekafekauaga, kua lata ia tautolu ke taute fakamitaki e setulu, fakatoka fakamitaki e fakaakoaga fakatagata, ti lata ke lahi e okioki. Ke he taha puhala, lata ni ia tautolu ke leveki a tautolu fakaagaaga mo e fakatino.
Ne pehē e Tohi Tapu: “Ko e tau manatu he tagata ne malolo ke gahua kua hiku ia ke he muhu mena.” (Fakatai 21:5) Ko Zygmunt kua 88 e tau tau moui mogonei, ne pehē: “He fakatokatoka fakamitaki e fekafekauaga haaku ne lagomatai au ke moua tumau e tau fua loga. Ne fakatoka fakamitaki e au e tau magaaho haaku ke lahi e magaaho ma e fakamatalaaga.”
He hokulo e iloilo ke he tau Tohiaga Tapu ne fakamalolō mo e tauteute a tautolu ma e fekafekauaga. Ti tuga he lata a tautolu ke kai e tau mena kai fakatino ke momoui, kua latatonu a tautolu ke kai tumau e tau mena kai fakaagaaga ke fakalataha tumau ke he gahua fakamatala. Ko e taumafa ke he Kupu he Atua he tau aho oti mo e kai ke he ‘tau mena kai ke he tau magaaho tonu’ ka fakamalolō a tautolu ma e fekafekauaga.—Mata. 24:45-47.
Ne taute e Elżbieta e tau hikiaga lalahi he puhala moui haana ke fakaholo ki mua aki e fekafekauaga haana. Pehē a ia: “Kua mumutu hifo fakalahi e au e magaaho ne fakaaoga e au ke kitekite televisoni ke lahi e magaaho haaku ke tauteute ma e fekafekauaga. He totou e au e Tohi Tapu he tau afiafi takitaha, ne manamanatu au ke he tau tagata ne feleveia mo au he fonua. Ne kumi e au e tau kupu tohi mo e tau vala tala ka liga lagomatai a lautolu.”
He moua e okioki mitaki ka lagomatai a koe ke fakatumau e malolō lahi haau ti taute a koe ke maeke ke fakalataha katoatoa ke he fekafekauaga. He taha faahi, he molea e fakafiafiaaga kua maeke ke lauia kelea e kakano he gahua haau. Ko Andrzej, ko e tagata fakailoa makutu, ne mailoga: “He nakai okioki ka takitaki atu ke mategūgū lahi, ti ko e lakaaga tote ni a ia ke he fakaloleloleaga. Ne taute e au e tau mena oti kua fahia au ke kalo mai i ai.”—Fakama. 4:6.
Pete he lali fakamakamaka a tautolu, kua gahoa ni e tagata ne loto fakaaue ke he tala mitaki. Ka e nakai fakanimonimo e Iehova e tau gahua ha tautolu. (Hepe. 6:10) Pete ni ka tokologa ne nakai manako ke tutala ki a tautolu, liga tutala a lautolu hagaao ke he aahi atu ha tautolu he ō mai kehe a tautolu i ai. Ko e lauiaaga kua tuga e mena ne totou e tautolu hagaao ki a Esekielu: Ko e tau tagata “to iloa [kua] ha ha ia lautolu e perofeta.” (Eseki. 2:5) Mooli, ko e mena nakai mukamuka e fekafekauaga ha tautolu, ka e moua e tautolu e tau fua mitaki mai ai mo e moua foki he tau tagata ne fanogonogo.
“He fakalataha ke he fekafekauaga kua lagomatai a tautolu ke tapulu ke he tagata foou mo e fakakite e fakaalofa ke he Atua mo e tau katofia ha tautolu,” he mailoga e Zygmunt. “Ko e kotofaaga lilifu ke fai vala he gahua fakamoui nei. To nakai liu taute fakalaulahi ai po ke i lalo he tau tuaga pehēnei,” he lafi e Andrzej. Maeke foki ia koe ke moua e tau monuina loga he fakamanava lahi ke he fekafekauaga he vahā nei.—2 Kori. 4:1, 2.
[Tau Fakatino he lau 31]
He leveki e tau manako fakaagaaga mo e fakatino ha tautolu ka lagomatai ke fakauka ke he fekafekauaga