Maeke Nakai a Koe ke Fakalahi Haau a Gahua he Fonua?
1. Ko e heigoa e manako mafiti ma e gahua he fonua, ti ko e ha?
1 He kitia e fiafia ne fakakite he tokologa ke he tala mitaki he Kautu, ne poaki a Iesu ke he tau tutaki haana ke “olelalo atu . . . ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.” (Mata. 9:37, 38) Ha ko tautolu mogonei he tau tulā fakahikuhiku he vahā helehele, kua mua atu e mafiti lahi mahaki he gahua ha tautolu. Kakano he mena nei kua lata ia tautolu ke manamanatu he liogi ke he puhala ka fakalahi atu ha tautolu a gahua he fonua.—Ioane 14:13, 14.
2. Tali fēfē e falu ke he manako ke tokologa e tau tagata gahua he fonua?
2 Fakalahi e Gahua he Fonua: He takitakiaga mo e lagomataiaga a Iehova, ati maeke ai he tokologa ke paionia. (Sala. 26:2, 3; Filipi 4:6) Ne lali pauaki e falu ke eke mo tau paionia fakakū lagataha po ke lagaloga he tau. Kua eke e mena nei mo puhala mitaki ke fakalahi e gahua he fonua ha lautolu. Kua moua mai e fiafia he taute e paionia fakakū nei ti fakatupu e tokologa ia lautolu ke manamanatu ke eke mo tau paionia tumau.—Gahua 20:35.
3. Ka paionia a koe fakamua, ko e heigoa kua liga manako a koe ke manamanatu ki ai mogonei?
3 Maeke Nakai a Koe ke Liu Kamata e Gahua Paionia?: Ka paionia a koe he mogo fakamua, kua tokaloto agaia e koe e fiafia he magaaho ia. Kua manamanatu nakai a koe he liogi ke liu paionia foki? Ko e tau tuaga ne fakatupu a koe ke oti e paionia ne liga nakai ko e mena uka mogonei. Kua liga hoko mai tuai e magaaho ma haau ke liu matutaki foki ke he kotofaaga pauaki ia.—1 Ioa. 5:14, 15.
4. Ko e heigoa e kotofaaga kehe lahi mahaki kua hafagi ki a tautolu oti?
4 Kua leva e taute he gahua helehele ti kua teitei oti tuai. (Ioane 4:35, 36) Kia igatia a tautolu mo e kumikumi hifo ke he tuaga ha tautolu mogonei ko e maeke nakai a tautolu ke hikihiki e tau matagahua ha tautolu he moui ke maeke ke fakalahi e gahua he fonua. Po ke ka nakai maeke mooli a tautolu ke fakalahi e gahua ha tautolu he fonua, maeke nakai a tautolu ke kumi puhala ke lauia mitaki lahi ai? (Mare. 12:41-44) Ko e monuina mooli hane fakatoka mogonei i mua ha lautolu oti kua maeke he tau tuaga ha lautolu ke fakaaoga e Iehova he matagahua kehe ue atu nei!—Sala. 110:3.