‘Ta Atu Haau a Moui’ ke he Tau Tagata Fakaako Haau
1. Ko e heigoa ka taute ke lagomatai e tagata fakaako Tohi Tapu?
1 Ke lagomatai e tagata fakaako Tohi Tapu ke hoko ke he tukulele, kua nakai ni ko e taute e fakaako Tohi Tapu tumau mo ia. Ne fakatatai he aposetolo ko Paulo e fakafetui haana mo lautolu ne fakaako e ia ke he matua fifine fakahuhu tama ne leveki fakamitaki e fanau haana. Kua fiafia foki a tautolu ke ‘ta atu e tau momoui ha tautolu’ ke lagomatai e tau tagata fakaako ha tautolu ke tupu fakaagaaga.—1 Tesa. 2:7-9.
2. Ko e ha kua lata ia tautolu ke fakakite e fiafia fakatagata, ti puhala fe ka taute ai?
2 Fakakite e Fiafia Fakatagata: He fakagahua he tagata fakaako Tohi Tapu e tau mena ne ako e ia, to fakalagalaga he loto manamanatu haana a ia ke fakamamutu e lafi tumau mo lautolu ne nakai fakatatau ke he tau matapatu fakaako he Tohi Tapu. (1 Pete. 4:4) Liga fakatikai he magafaoa haana a ia. (Mata. 10:34-36) Maeke ia tautolu ke fakapuke e logonaaga momoko haana he fakakite e fiafia fakatagata mafanatia. Ne talahau he taha misionare lotomatala: “Ua fakatepetepe ke fano ka oti e fakaako Tohi Tapu. Ka lata, nofo mo e tutala fakakū.” Kia mataala ke foaki e lagomatai aoga ke he tagata fakaako haau. Ma e fakatai, maeke nakai a koe ke hea telefoni po ke ahiahi atu ka gagao a ia? Maeke nakai a koe ke nofo mo e tagata fakaako haau he tau feleveiaaga mo e lagomatai e fanau haana, ka maeke?
3. Maeke fēfē ia tautolu ke lagomatai e tagata fakaako ha tautolu ke moua e fakamalolō mai he fakapotopotoaga?
3 Lagomatai Mai he Fakapotopotoaga: Ka gahua a koe he fonua tata ke he kaina he tagata fakaako haau, ko e ha he aahi fakakū atu ke fakafeleveia mo ia e tau hoa gahua haau he fonua? Ka latatonu he falu mogo, uiina e tau tagata fakailoa kehekehe, putoia e tau motua, ke fakatauō mo koe ke he fakaakoaga. Ka nakai leva foki he fakatū e koe e fakaakoaga, fakamalolō e tagata fakaako Tohi Tapu haau ke hau he tau feleveiaaga he Fale he Kautu. To lagomatai he mena nei a ia ke olioli e lafiaga atihake mo e tau matakainaga he fakapotopotoaga ka eke mo magafaoa fakaagaaga haana.—Mare. 10:29, 30; Hepe. 10:24, 25.
4. Liga palepale fēfē e fakamakai ha tautolu?
4 Ko e matua ne nakai okioki mai he lagomatai fakaagaaga e fanau haana kua olioli lahi he magaaho ne fakatumau a lautolu mo Iehova mo e ō he kupu mooli. (3 Ioa. 4) Maeke ia tautolu ke fiafia pihia he ta atu e tau momoui ha tautolu ke lagomatai e tau tagata fakaako Tohi Tapu ha tautolu.