Tokiofa Haau a Fekafekauaga Lilifu
1. Fēfē e onoonoaga he tokologa he lalolagi ke he gahua fakamatala ha tautolu?
1 Tokologa he lalolagi a Satani ne manamanatu ke he gahua fakamatala ha tautolu ko e “mena goagoa.” (1 Kori. 1:18-21) Ka nakai fakaeneene a tautolu, ko e onoonoaga fakakeukeu nei ka fakatupu e fakaloleloleaga mo e fakatote e makai ha tautolu. (Fakatai 24:10; Isaia 5:20) Ko e heigoa e tau kakano i ai ke tokiofa e lilifu ha tautolu ko e Tau Fakamoli a Iehova?—Isaia 43:10.
2. Ko e ha ne fakahigoa e gahua fakamatala ko e “feua he ekepoa”?
2 Ko e “Feua he Ekepoa”: Ne hagaao e aposetolo ko Paulo ke he gahua fakamatala ko e “feua he ekepoa.” (Roma 15:15, 16) Eke fēfē e gahua fakamatala mo “feua he ekepoa”? Ko e fakalataha ke he gahua ia kua taute a tautolu mo “tau ekegahua” mo ‘Ia ne Tapu’ ko Iehova, mo e fai vala ke he fakatapuaga he higoa haana. (1 Kori. 3:9; 1 Pete. 1:15) Kua onoono a Iehova ke he fakamatala ha tautolu ko e “poa fakaheke,” ti ko e gahua fakamatala ko e vala aoga lahi he tapuakiaga ha tautolu.—Hepe. 13:15.
3. Ko e heigoa ne taute e fakamatala he tala mitaki mo mena lilifu lahi?
3 Ko e fakamatala he tala mitaki ko e lilifu lahi kua tokogahoa ni ne moua. To fiafia e tau agelu he leveki e matagahua ia ti nakai fakauaua ai to lauia mitaki e tauteaga. (1 Pete. 1:12) Ka kua fifili e Iehova a tautolu ko e tau tagata nakai mitaki katoatoa, ko e “tau kapiniu kelekele,” ma e fekafekauaga ofoofogia nei!—2 Kori. 4:7.
4. Maeke fēfē a tautolu ke fakakite kua tokiofa e tautolu e gahua fakamatala?
4 Ko e Mena Fakamua: Ha kua tokiofa mooli e tautolu e lilifu ha tautolu, kua onoono a tautolu ke he gahua fakamatala ko e taha he ‘tau mena kehekehe kua aoga’ he tau momoui ha tautolu. (Filipi 1:10) Ko e mena ia, fakatoka e tautolu e magaaho he tau faahi tapu takitaha ke fai vala i ai. Ko e tagata tā leo kofe kua tokiofa e lilifu haana ke tā kofe he matakau fakatagi leo kofe talahaua he lalolagi ka tauteute ma e tau vala takitaha mo e eketaha he fakaholo ki mua e iloilo haana. Pihia foki, to mautauteute a tautolu ato ō ke he gahua fakamatala ke maeke ia tautolu ke “fakatokatoka fakahako e kupu moli,” mo e to gahua a tautolu ke fakaholo ki mua e ‘puhala fakaaako atu’ ha tautolu.—2 Timo. 2:15; 4:2.
5. Loto fakaaue e hai e gahua fakamatala ha tautolu?
5 Ua fakaatā e onoonoaga he tau tagata tokologa ke fakalolelole a koe. Manatu na tokologa agaia he fonua ha tautolu kua loto fakaaue ke he tau ahiahi atu ha tautolu. Ka e nakai ko e taliaaga he tau tagata kua kumi e tautolu. Mahomo atu e aoga he tau logonaaga a Iehova, ti uho lahi mahaki ki a ia e tau laliaga fakamakutu ha tautolu.—Isaia 52:7.