Foaki Ki Ai e Koloa Uho
1 Ne tokiofa he aposetolo ko Paulo e poakiaga ne age he Atua ke fakamatala ti hagaao ki ai ko e ‘koloa uho.’ (2 Kori. 4:7) Ne fakauka a ia ke he tau mena vihi mo e favaleaga he taute e poakiaga ia. Ne nakai okioki a ia he fakamatala ke he tau tagata ne feleveia mo ia. Ne loga e fenoga uka mo e hagahaga kelea haana ke he kelekele mo e tahi. Fifitaki fēfē e tautolu a Paulo mo e fakakite kua tokiofa e tautolu e fekafekauaga ha tautolu? (Roma 11:13) Ko e heigoa ne taute e fekafekauaga ha tautolu ke eke mo koloa mua ue atu?
2 Ko e Koloa Uho Mitaki Lahi: Ko e tau koloa uho he lalolagi kua fa tamai ai e loto mamahi lahi mo e hihiga ni ke temotemoai po ke nakai tukulagi e tau aoga. Ke he taha faahi, ko e fekafekauaga ha tautolu kua tamai e tau aoga tukulagi ki a tautolu mo e ke he falu. (1 Timo. 4:16) Kua lagomatai e tau tagata fakamooli ke o mai ke iloa a Iehova, taute e tau hikihikiaga he tau momoui ha lautolu, ti moua e amaamanakiaga mooli he moui tukulagi. (Roma 10:13-15) He tokiofa fakatokoluga e fekafekauaga ha tautolu, kua moua e tautolu e kakano makona he moui, ko e logonaaga he kautūaga tukulagi, mo e amaamanakiaga atihake ma e vahā anoiha.—1 Kori. 15:58.
3 Fakakite kua Uho e Koloa Haau ki a Koe: Ko e uho he mena ne tuku e tautolu ke he taha mena kua fa fakakite ai ke he mena ne makai a tautolu ke foaki ma e mena ia. Ko e kotofaaga ha ia ke fakaaoga e magaaho mo e malolō ha tautolu ke fakaheke a Iehova! (Efeso 5:16, 17) Ko e puhala ne fakaaoga e tautolu e magaaho ha tautolu kua lata ke fakakite kua lahi e uho ne tuku e tautolu ke he tau mena fakaagaaga nakai ke he tau tutuliaga fakatino. Ha kua fai mena uho lahi a tautolu ke tufatufa, to manako a tautolu ke fakamatala fakamakutu mo e mataala ke talahau e tala mitaki ke he tau magaaho oti.
4 Ne nakai fa fufū e tau koloa uho ka e fakatātā ma e falu ke kitekite ki ai. Ka onoono a tautolu ke he fekafekauaga ko e koloa uho, to eke mo vala aoga lahi ke he tau momoui ha tautolu. (Mata. 5:14-16) Mo e tau loto ne puke he loto fakaaue, kia fifitaki tumau e tautolu e aposetolo ko Paulo mo e fakaaoga e tau magaaho oti ke fakakite kua tokiofa mooli e tautolu e fekafekauaga ha tautolu, tuku fakatokoluga ai ke tuga e koloa uho.