Fifitaki e Keriso he Fekafekauaga ha Mutolu
1 Ne fakatoka e Iesu e fakafifitakiaga ke mumui ai a tautolu ke he fekafekauaga. Ko e fakaalofa hokulo haana ma e Atua mo e tau tagata kua fakatātā ke he tau magaaho mo e tau puhala loga. Ne fakaako e ia e kupu mooli ki a lautolu ne mahani molū ti taute ai e tau gahua fakaalofa-totonu ke lata mo lautolu ne matematekelea mo e pehia.—Mata. 9:35.
2 Fakafifitakiaga mo e Tau Fakaakoaga a Iesu: Ne nakai hekeheketakina a Iesu he putoia ke he tau mena fakapolitika po ke falu matagahua fakamatakau ke fakamitaki aki e matakavi. Ti nakai fakaatā foki e ia e tau tutuliaga manamanatu mitaki ke fakatauhele aki a ia po ke fakamaluia aki haana a matapatu gahua. (Luka 8:1) Ne hagaaki a ia ke he fakamatala he tala mitaki he Kautu he Atua ko e tuluiaga tukulagi hokoia ke he tau lekua he tagata. Ne ha ha ia Iesu e gahua lahi ke taute mo e magaaho kū ke taute ai. He manako e tau tagata i Kapanaumi ke nofo a Iesu i ai, ne tala age a ia ke he tau tutaki haana: “Kia o a tautolu ke he tau māga ne tata mai, ke fakamatala atu e au ki ai e vagahau mitaki, ha ko e mena ia ne hau ai au.”—Mare. 1:38.
3 He mole e fakamahani e tau tutaki haana, ne fakafano atu e Iesu a lautolu mo e tau fakaakoaga pauaki: “Fakamatala atu, kia pehe atu, Kua tata mai tuai e kautu he lagi.” (Mata. 10:7) Ne fakaako e ia e tau tutaki haana kua lata e tau mena he Kautu ke tuku mua he tau momoui ha lautolu. (Mata. 6:33) Ko e tau kupu fakahiku ha Iesu ke he tau tutaki haana ato hake a ia ke he lagi ne fakamaama e mena ke taute e lautolu. Ne pehē a ia: “Kia o atu a a mutolu ke eke e tau motu oti kana mo tutaki.”—Mata. 28:19.
4 Aoga he Kautu: Ko e matapatu mataulu he fakatutalaaga a Iesu ko e Kautu he Atua, ti tomatoma e ia e tau tutaki haana ke mumuitua haana a fakafifitakiaga. Kua nakai kautū e tau laliaga he tagata ke fakatotoka e tau lekua he tau tagata. (Iere. 10:23) Ko e Kautu he Atua hokoia ka fakatapu e higoa he Atua mo e foaki e totokaaga tukulagi ma e tau tagata. (Mata. 6:9, 10) He fakaako e kupu mooli he Kautu ke he tau tagata hane “tauoi mo e mānu ha ko e tau mena vihiatia kua eke e lautolu i ai” nukua lagomatai a lautolu ke momoui fiafia mo e kautū he magaaho nei mo e taofi mau ke he amaamanakiaga mauokafua ma e vahā anoiha.—Eseki. 9:4.
5 Ne matutaki a Iesu ke putoia ke fakamatala e tala mitaki he Kautu he Atua, ti fakamafana e ia ki a tautolu to lalago mai a ia. (Mata. 28:20) Hokotia ke he mena fe e lautatai he fekafekauaga ha tautolu ke he fakafifitakiaga ne fakatoka e Iesu ma tautolu? (1 Pete. 2:21) He tau aho fakamui nei ne aoga, kia taute e tautolu e tau mena oti kua maeke ia tautolu ke pipiki mau ke he fakafifitakiaga ne fakatoka e Iesu ke he fekafekauaga!