Ko e Fekafekauaga Kerisiano—Matapatu Gahua ha Tautolu
1 Igatia a tautolu oti mo e tau vahega gahua kehekehe kua lata ia tautolu ke taute. Ko e leveki ma e magafaoa ko e poakiaga faka-Atua. (1 Timo. 5:8) Pete ia, ko e gahua ne putoia e poakiaga faka-Atua ia kua nakai lata ke mahomo hake he gahua fakamatala he Kautu mo e taute tutaki.—Mata. 24:14; 28:19, 20.
2 Ne fakatoka e Iesu ma tautolu e fakafifitakiaga ke mumui he ‘kumikumi fakamua ke he kautu.’ (Mata. 6:33; 1 Pete. 2:21) Pete he temotemoai e tau koloa fakatino, ne hufia katoatoa a ia he taute e finagalo he Matua hana. (Luka 4:43; 9:58; Ioane 4:34) Ne eketaha a ia he fakamatala ke he tau magaaho oti. (Luka 23:43; 1 Timo. 6:13) Ne fakamalolo e ia hana tau tutaki ke pihia foki e fiafia lahi ke he gahua helehele.—Mata. 9:37, 38.
3 Fifitaki a Iesu he Vaha Nei: Maeke ia tautolu ke muitua ke he fifitakiaga ha Iesu he lali ke momoui mukamuka ne kua matapatu ke he fekafekauaga Kerisiano. Ka ha ha ia tautolu e tau mouaaga he moui, kia muitua ke he hatakiaga he Tohi Tapu ke nakai uku fakalahi atu foki ke he tau koloa he lalolagi nei. (Mata. 6:19, 20; 1 Timo. 6:8) Kua mitaki ha ia mogoia ke tutuli ke fakalaulahi ha tautolu a gahua fakamatala! Ka fehagai a tautolu mo e tau tutuaga uka, kia eketaha a tautolu ni ke tuga a Iesu, he nakai fakaata e tau mena he mouiaga nei ke mua hake ke he matapatu gahua ha tautolu he fakapuloa e tala mitaki he Kautu.—Luka 8:14; 9:59-62.
4 Kia tuku fakamua foki e lautolu ne loga e tau matagahua e gahua fakamatala. Ko e matakainaga tane ne lahi e magafaoa, kua tu ke he gahua lahi, mo e ko e motua he fakapotopotoaga Kerisiano kua pehe: “Kua onoono au ke he fekafekauaga ko e feua haku.” Kua pehe e matakainaga paionia fifine: “Kua uho lahi atu e paionia ke he gahua fakatupe kua kautu.”
5 Pete ni e tau tutuaga ha tautolu, kia muitua a tautolu ke he fakafifitakiaga ha Iesu. Fefe? He taute e fekafekauaga Kerisiano ko e matapatu gahua ha tautolu.