Ko e Heigoa e Mena Fakamua Hau?
1 Loga e tau matakau lotu ne peehi fakalahi ko e taute e tau gahua mitaki ma e falu, tuga he taute e tau fale fakaako tama po ke ma e tau levekiaga fakaekekafo. Ko e Tau Fakamoli a Iehova, mogoia, he nakai nimo ke “mahani mitaki atu mo e fakaalofa atu,” kua tuku fakamua e lagomatai fakaagaga he tau tagata.—Hepe. 13:16.
2 Ko e Puhala he Senetenari Fakamua: Ne loga e tau gahua mitaki ha Iesu ne taute he hana a fekafekauaga he lalolagi, ka e ko e matapatu gahua hana ko e fakamatala he kupu moli. (Luka 4:43; Ioane 18:37; Gahua 10:38) Ne poaki e ia ke he hana tau tutaki ke “o atu a a mutolu ke eke e tau motu oti kana mo tutaki, . . . ti fakaako atu a mutolu ki a lautolu.” (Mata. 28:19, 20) Ti talahau foki e ia ko lautolu ne fakagahuahua e tua ki a ia to taute e lautolu e gahua ne kamata e ia ke mua atu ke he lalolagi lahi. (Ioane 14:12) Ne tuku fakamua e Iesu e gahua fakamatala kakano ke lagomatai e tau tagata ke ako e puhala ke he moui tukulagi.—Ioane 17:3.
3 Ko e aposetolo ko Paulo ne onoono a ia ke he gahua fakamatala hana ko e ‘mena kua lata pauaki,’ ko e gahua kua nakai lata ia ia ke fakatikai. (1 Kori. 9:16, 17) Ne fiafia a ia ke taute ha foakiaga fakatagata, fakauka ke he ha kamatamata, po ke fakamatematekelea ke he ha tuaga uka kua lata ai ke kautu e hana fekafekauaga. (Gahua 20:22-24) Ne pihia foki e aga ne fakakite he aposetolo ko Peteru mo e hana tau hoa. Ne fehagai foki mo e tuku he fale puipui mo e fahi, “kua nakai oki foki e tau aho oti he fakaako atu e lautolu, mo e fakamatala atu . . . e tala mitaki kia Iesu Keriso.”—Gahua 5:40-42.
4 Ka e kua a tautolu? Tuku fakamua nakai e tautolu e gahua fakamatala he tala mitaki he Kautu mo e taute tutaki? Ke tuga a Iesu, kua fai logonaaga moli nakai a tautolu ma lautolu kua “tiaki atu ai, tuga e tau mamoe nakai fai leveki a lautolu”? (Mata. 9:36) Ko e tau mena tutupu he lalolagi he mogonai mo e tau perofetaaga he Tohi Tapu kua fakakite moli kua tote lahi e magaaho ne toe ma e fakatokaaga kelea nai! Ko e toka tumau fakamua e tautolu e uho he gahua fakamatala ha tautolu ka fakaohooho ai ke matutaki e fakamakamaka ke fakamatala.
5 Liu Kitekite e Tau Tutuaga Hau: Ha ko e mena fa hikihiki e tau tutuaga fakatagata, ko e mena mitaki ke manamanatu ke he taha magaaho mo e taha magaaho ko e maeke nakai a tautolu ke taute e tau hikihikiaga ke fakalataha fakalahi atu ke he gahua fakamatala. Taha e matakainaga fifine ne paionia mau he tau atu tau 50, 60 mo e 70 ne latatonu e tuku e gahua ha kua gagao. Fai magaaho, mogoia, ne laukauka mai e malolo tino hana. Ne nakai la leva ia e kitekite e ia hana a tuaga mo e mauokafua to liu foki a ia ke paionia. Ko e fiafia ha ia hana ke fina atu ke he Aoga Fekafekau Paionia he 90 e tau tau he moui! Ka e kua a koe? Kua tata nakai a koe ke okioki mai he gahua po ke oti mai mo e tau fakaakoaga? Kaeke hiki e tuaga hau to paionia nakai a koe?
6 Ne kitia e Iesu a Mareta ‘kua fakafita he tuegutu,’ ati fakakite fakatotonu e ia na maeke ke fua loga mai e tau monuina kaeke ke fakamukamuka hana moui. (Luka 10:40-42) Maeke nakai a koe ke fakamukamuka hau a puhala moui? Lata pauaki kia ke gahua tupe tokoua a mua ko e tane mo e hoana? Kaeke kua taute e tau hikihikiaga, liga fahia nakai e magafaoa ka tokotaha ni e tagata gahua he magafaoa? Tokologa kua fua mitaki fakaagaga ha kua taute e tau hikihikiaga ati maeke a lautolu ke fakalahi e gahua ke he fonua.
7 Kia mumuitua a tautolu oti ke he fakafifitakiaga ne fakatoka e Iesu mo e tau aposetolo! Maeke a tautolu ke mauokafua ke he fakamonuinaaga ha Iehova ka eketaha katoatoa a tautolu ke fakalataha auloa ke taute e gahua uho lahi he fakamatala e tala mitaki he Kautu.—Luka 9:57-62.