Mena Mua ki a Tautolu
1. Fakakite fēfē e Iesu na aoga e gahua he fonua ki a ia?
1 Ko e gahua he fonua e mena mua ki a Iesu. Ne gahua malolō a ia, ti fano takai a ia i Palesitaina katoa ke fakamatala ke he tau tagata tokologa. Fakamukamuka e ia e moui haana ke maeke a ia ke foaki fakalahi e magaaho mo e hagaaki ke he gahua he fonua. (Mata. 8:20) Magaaho ne lali e moto tagata ke taofi a ia ke fakamaulu e tau tagata gagao ha lautolu, ne pehē a ia: “Ko e mena lata ke fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai ai au.”—Luka 4:43.
2. Ko e ha e gahua he fonua ne aoga lahi ki a Iesu?
2 Ko e ha ne aoga lahi e gahua he fonua ki a Iesu? Ko e matapatu onoonoaga haana ko e fakatapu he higoa ha Iehova. (Mata. 6:9) Ne ofania e ia e haana Matua he lagi ti manako lahi ke taute e finagalo Haana mo e omaoma ke he tau poakiaga oti Haana. (Ioane 14:31) Lafi ki ai, ne leveki mooli e ia e tau tagata ti manako ke lagomatai a lautolu.—Mata. 9:36, 37.
3. Liga fakakite fēfē e tautolu e gahua he fonua ko e matapatu onoonoaga ha tautolu?
3 Fifitaki a Iesu: He fakatumau e matapatu onoonoaga tuga ha Iesu ka paleko ha kua fōfō lahi mahaki he lalolagi ha tautolu a tau magaaho mo e fakainaina e tau mena fakatauhele loga. (Mata. 24:37-39; Luka 21:34) Ko e mena ia, kua lata ia tautolu ke mailoga e tau mena ne mua e aoga, fakatoka e magaaho ke tauteute mo e fakalataha tumau ke he gahua fakamatala. (Filipi 1:10) Kua eketaha a tautolu ke fakamukamuka tumau e puhala moui mo e nakai tōtō fakalahi ke he tau mena he lalolagi.—1 Kori. 7:31.
4. Ko e ha kua latatonu ke fakatumau ke hako e tau mena kua tuku mua mogonei?
4 Ka tote lahi e magaaho, kua taute mua he tagata pulotu e mena ne aoga lahi. Ma e fakatai, ka iloa e ia hane gutu mai e afā hagahaga kelea, to fakaaoga e ia e magaaho mo e malolō haana he tauteute e tau fakatokaaga ma e haohao mitaki he magafaoa haana ti ogoogo e tau kalakala kaina haana. To fakatali e tau matagahua ne nakai aoga lahi. Kua tote e magaaho ne toe ti hoko mai e afā ha Amaketo. (Sefa. 1:14-16; 1 Kori. 7:29) Ke maeke ke fakamoui a tautolu ni mo lautolu kua fanogonogo ki a tautolu, kua lata ia tautolu ke mataala fakalahi ki a tautolu ni mo e fakaako atu ha tautolu, ki loto po ko fafo he fakapotopotoaga. (1 Timo. 4:16) E, ko e fakamouiaga ha tautolu kua fakavē ke he tuku mua tumau e gahua he fonua!