‘Kia Mumui Atu ke he Hana Tau Tuagahui’
1. Eke fēfē a tautolu mo tau fekafekau lauia mitaki?
1 Ne nakai fakaako a Iesu he tau aoga rapai, pete ia ko e Fekafekau mua ue atu a ia he fakamauaga tuai. Fakaaue ai ha ko e tala hagaao ke he fekafekauaga ha Iesu kua puipui ke aoga ai a tautolu. Ke eke a tautolu mo tau fekafekau lauia mitaki, kua latatonu ke ‘mumui atu ke he hana tau tuagahui.’—1 Pete. 2:21.
2. Ko e heigoa ka lagomatai a tautolu ke feaki e fakaalofa tuga ne taute he Keriso ma e tau tagata?
2 Fakatātā e Fakaalofa ma e Tau Tagata: Ko e manamanatu fakaalofa ma e tau tagata ne omoomoi a Iesu. (Mare. 6:30-34) Tokologa he fonua ha tautolu hane “mamahi” ti kua lata lahi ke moua e kupu mooli. (Roma 8:22) He mailoga e tautolu e tuaga matematekelea ha lautolu mo e he manamanatu fakaalofa ha Iehova ki a lautolu ka omoomoi a tautolu ke eketaha he fakamatala. (2 Pete. 3:9) Mua atu, to lahi e fanogonogo he tau tagata ke he ogo ha tautolu kaeke ke mailoga e lautolu kua manamanatu mooli a tautolu ki a lautolu.
3. Ko e tau magaaho fe ne fakamatala a Iesu ke he falu?
3 Vagahau he Tau Magaaho Oti: Ne fakaaoga mitaki e Iesu e tau magaaho oti ke talahau e tala mitaki ke he falu. (Mata. 4:23; 9:9; Ioane 4:7-10) Pihia foki, kua manako a tautolu ke mautauteute ke tala hagaao ke he kupu mooli he taute e tautolu e tau gahua fa mahani he aho. Falu ne uta mo lautolu e Tohi Tapu mo e tau tohi ke maeke ke fakamatala he gahuaaga, he aoga, ka ō fenoga mo e fakatau, mo e falu mena pihia.
4. Liga taute fēfē e tautolu e Kautu mo matapatu kupu he fakamatalaaga ha tautolu?
4 Hagaaki Mau ke he Kautu: Ko e vagahau mitaki he Kautu e matapatu kupu he fakamatalaaga ha Iesu. (Luka 4:43) Pete he nakai totoku fakamua e Kautu po ke tala fakahako ki ai ke he tau fakafeleveiaaga ha tautolu, ne mauloto e tautolu ke lagomatai e tagata he fale ke kitia e lata ma e Kautu ia. Pete he tutala ke he tau tutūaga kelea he lalolagi ne fakakite kua nonofo a tautolu he tau aho fakamui, kua “ta mai [e tautolu] e tala ke he tau mena mitaki.”—Roma 10:15.
5. Ke lauia mitaki e fekafekauaga ha tautolu, ko e heigoa e matagahua he Tohi Tapu?
5 Falanaki ke he Kupu he Atua: He fekafekauaga katoa ha Iesu ne falanaki a ia ke he tau Tohiaga Tapu. Ne nakai fakaako ne ia e tau mena haana. (Ioane 7:16, 18) Ne kai a ia ke he Kupu he Atua ti fakagahua ai he magaaho he totokoaga fakasatani. (Mata. 4:1-4) Ke maeke ia tautolu ke fakaako ke he falu mo e lauia mitaki, kua lata ia tautolu ke totou tumau e Tohi Tapu ti fakagahua ai ki a tautolu ni takitokotaha. (Roma 2:21) He tali e tau hūhū he fekafekauaga, lata a tautolu ke fakamaama kua lalago he tau Tohiaga Tapu e tau mena ne talahau e tautolu ti totou age e kupu he Tohi Tapu ka maeke. Manako a tautolu ke kitia he tagata he fale kua nakai talahau ne tautolu e tau manatu ha tautolu ka kua pipiki ni ke he tau manatu he Atua.
6. Ko e heigoa ne taute e Iesu ke hokotia ke he tau loto he tau tagata fanogonogo haana?
6 Kia Hokotia ke he Loto e Fakaakoaga Haau: “Kua nakai fai tagata taha ke vagahau ke tuga e tagata na.” (Ioane 7:46) He talahau he tau fekafekau hagaao ki a Iesu he magaaho ne hūhū e tau Farasaio ke he kakano ne nakai tapaki he tau fekafekau a ia. He nakai fakamatala ni e tau mena kua mooli, ne fakaako a Iesu ke he puhala kua hokotia ke he tau loto ha lautolu ne tofatofa e ia. (Luka 24:32) Ne fakaaoga e ia e tau fakataiaga tutupu mooli ke fakamaama aki e tau kupu haana. (Mata. 13:34) Ne nakai tapeehi aki e Iesu e tau tala loga e tau tagata fanogonogo haana. (Ioane 16:12) Ne tuhi atu a ia ki a Iehova nakai ki a ia ni. Ke tuga a Iesu, maeke ia tautolu ke eke mo tau faiaoga mitaki he mataala ‘tumau ke he fakaakoaga ha tautolu.’—1 Timo. 4:16.
7. Ko e ha ne eketaha a Iesu ke he fekafekauaga?
7 Kia Eketaha Pete ko e Fekehekeheaki mo e Totoko: Pete he taute e Iesu e tau mana, ne tokologa ne nakai fanogonogo ki a ia. (Luka 10:13) Ne piko foki a lautolu he magafaoa ni ha Iesu kua “vikoia a ia.” (Mare. 3:21) Mohā ia, ne eketaha a Iesu. Ne fakatumau e onoonoaga mitaki haana ha kua iloa moolioli e ia kua ha ha ia ia e kupu mooli ke fakatokanoa e tau tagata. (Ioane 8:32) Mo e lagomatai ha Iehova, kua fakamalolō foki a tautolu ke nakai fakalolelole.—2 Kori. 4:1.
8, 9. Liga fifitaki fēfē e tautolu a Iesu he taute e tau foaki noa ma e tala mitaki?
8 Taute e Tau Foaki Noa Kua Lata ke Fakalataha Katoatoa: Ne toka hifo e Iesu e tau koloa hagahaga mitaki ma e fekafekauaga. (Mata. 8:20) Ne ukufeke a ia ke fakamatala ti hoko ke he afiafi he falu magaaho. (Mare. 6:35, 36) Ne iloa e Iesu kua fakakaupā e magaaho ke taute e matagahua haana. Ha kua “gahoa e tau aho kua toe,” kua lata foki ia tautolu ke foaki noa e tau magaaho, malolō, mo e tau koloa ha tautolu he fifitaki ki a Iesu.—1 Kori. 7:29-31.
9 Ko e tau fekafekau lauia mitaki e tau Kerisiano he senetenari fakamua ha kua ako mai a lautolu ia Iesu. (Gahua 4:13) Maeke foki a tautolu ke taute katoatoa e fekafekauaga ha tautolu kaeke ke fifitaki e Fekafekau mua ue atu he fakamauaga tuai.—2 Timo. 4:5.