“Mui Mai Kia Au”
“Ka fia mui mai taha kia au, ua omaoma a ia kia ia, ka e nikiti e ia hana satauro ke he tau aho oti, ti mui mai kia au.”—LUKA 9:23.
1, 2. (a) Ko e heigoa e uiina totonu ne foaki e Iesu? (e) Kua tali atu fēfē a koe ke he uiina a Iesu?
KE HE matahiku he fekafekauaga ha Iesu, ne fakamatala a ia i Perea, he taha faahi atu i Ioritana, ko e faahi tokelau ki uta ha Iuta. Ne fina atu e fuata taane ki a ia mo e hūhū ke he mena kua lata ke taute e ia ke moua e moui tukulagi. Ati mailoga e Iesu kua muitua fakamooli e fuata taane ke he Fakatufono faka-Mose, ne age ki ai e uiina mua ue atu. Ne pehē a ia: “Ati fano a, fakafua atu hau a tau mena oti, mo e age ke he tau nonofogati, ti moua ai e koe e koloa lahi ke he lagi; . . . ti mui mai kia au.” (Mare. 10:21) Manamanatu la—ko e uiina ke mui ki a Iesu, ko e Tama fuataha he Atua Mua Ue Atu!
2 Ne fakaheu he fuata taane e uiina, ka e talia ai he falu. Ne tala age fakamua atu e Iesu ki a Filipo: “Mui mai a kia au.” (Ioane 1:43) Ne talia e Filipo ti fakahiku kua eke a ia mo aposetolo. Ne fatiaki e Iesu e uiina ki a Mataio, ti talia foki e ia. (Mata. 9:9; 10:2-4) Mooli, ne foaki e Iesu e uiina taha ia ke he tau tagata oti ne ofania e tututonu he magaaho ne pehē a ia: “Ka fia mui mai taha kia au, ua omaoma a ia kia ia, ka e nikiti e ia hana satauro ke he tau aho oti, ti mui mai kia au.” (Luka 9:23) Ti, maeke he taha ke mui ki a Iesu kaeke kua manako mooli ai a ia. Ha ha nakai ia koe e manako ia? Laulahi ia tautolu kua fitā e talia fiafia ke he uiina totonu a Iesu, mo e fekafekau ke he fonua, kua talahau e tautolu e uiina ia ke he falu.
3. Maeke fēfē a tautolu ke kalo mai he tafia kehe he mumui ki a Iesu?
3 Momoko ai, falu ne fakakite e fiafia ke he kupu mooli he Tohi Tapu ne nakai fakatumau ki ai. Ka kua fakamanou a lautolu ti fakahiku “tafia kehe” mai he mumui ki a Iesu. (Hepe. 2:1) Maeke fēfē a tautolu ke kalo mai he mokulu ke he matahele ia? Kua lagomatai ka hūhū hifo ki a tautolu ni: ‘Ko e ha kua fifili au ke mui ki a Iesu he magaaho fakamua? Ko e heigoa e kakano ke mui ki a ia?’ He iloa e tau tali ke he tau hūhū ua ia ka lagomatai a tautolu ke fakamalolō e fifiliaga ha tautolu ke fakatumau ke he puhala iloilo ne fifili e tautolu. To lagomatai foki a tautolu ke fakamalolō e falu ke mumui ki a Iesu.
Ko e Ha ne Mumui ki a Iesu?
4, 5. Ko e ha kua lata a Iesu ke takitaki?
4 Ne talahau he perofeta ko Ieremia: “Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.” (Iere. 10:23) Kua fakamooli he fakamauaga tuai e mooli he tau kupu ha Ieremia. Kua kitia lahi ai kua nakai maeke mooli he tau tagata ai mitaki katoatoa ke leveki ne lautolu a lautolu. Ne talia e tautolu e uiina ke mumui ki a Iesu ha kua iloa e tautolu kua lata mooli a ia ke eke mo Takitaki ha tautolu ke he puhala ne nakai maeke ha tagata ke fifitaki. Manamanatu ke he falu puhala nukua lata ia Iesu.
5 Fakamua, ne fifili tokotaha e Iehova a Iesu mo Mesia ko e Takitaki. Ko hai foki mai he Tufuga ha tautolu ne iloa mitaki ke fifili e Takitaki ma tautolu? Ke uaaki, ne ha ha ia Iesu e tau mahani kua maeke ia tautolu ke nava mo e fifitaki ki ai. (Totou Isaia 11:2, 3.) Ko e fifitakiaga mitaki katoatoa a ia. (1 Pete. 2:21) Ke toluaki, ne fakaalofa hokulo a Iesu ki a lautolu ne mumui ki a ia, tuga he fakakite e ia he magaaho ne tuku atu haana moui ke mate ma lautolu. (Totou Ioane 10:14, 15.) Ti fakakite e ia a ia ko e leveki mamoe fakaalofa he takitaki e ia a tautolu ke he moui kua moua e fiafia mogonei mo e takitaki atu ke he vahā tukulagi ne homo ue atu anoiha. (Ioane 10:10, 11; Fakakite. 7:16, 17) Ma e tau kakano nei mo e falu foki, kua taute e tautolu e fifiliaga iloilo ka fifili e tautolu ke mumui ki a ia. Ka ko e heigoa ne putoia he puhala ia?
6. Ko e heigoa ne putoia he mumui ki a Iesu?
6 He eke mo tau tutaki he Keriso ne nakai ni kakano ko e ui a tautolu ko e tau Kerisiano. Kavi ke he ua e piliona tagata ne totoku ai ke eke mo tau Kerisiano he vahā nei, ka kua fakakite he tau mahani ha lautolu ‘ko lautolu ne eke e tau mahani kelea.’ (Totou Mataio 7:21-23.) Ka fakakite he tau tagata e fiafia ke he uiina ke mumui ki a Iesu, kua fakamaama e tautolu ki a lautolu kua fakatatau he tau Kerisiano mooli e tau puhala momoui katoa ha lautolu ke he haana tau fakaakoaga mo e fakafifitakiaga—ti taute pihia e lautolu he tau aho takitaha he tau momoui ha lautolu. Ke fakatai e kakano he mena nei, manamanatu ke he falu mena ne iloa e tautolu hagaao ki a Iesu.
Muitua ke he Fifitakiaga ha Iesu he Iloilo
7, 8. (a) Ko e heigoa e iloilo, ti ko e ha ne moua lahi ai e Iesu? (e) Fakakite fēfē e Iesu e iloilo, ti maeke fēfē ia tautolu ke fifitaki a ia?
7 Ne loga e tau mahani mua ue atu ne fakakite e Iesu, ka to hagaaki a tautolu ke he fā: haana a iloilo, fakatokolalo, makutu, mo e fakaalofa. Fakamua, manamanatu ke he haana a iloilo—ko e iloaaga haana ke fakagahua e maamaaga mo e lotomatala ke he puhala aoga. Ne tohi he aposetolo ko Paulo: “Ha ha ia [Iesu] e tau tanakiaga koloa oti kana he iloilo mo e maama kua galo ai.” (Kolo. 2:3) Moua i fe e Iesu e iloilo pihia? Ne talahau e ia: “Ko e mena tuga ne fakaako mai he haku a Matua kia au, ko e tau mena ia ne tala atu ai e au.” (Ioane 8:28) Ne puna mai e iloilo haana ia Iehova, ti nakai ofo a tautolu ke he tonu he fifiliaga ha Iesu.
8 Ma e fakatai, ne fakaaoga e Iesu e fifiliaga mitaki ke lata mo e puhala moui haana. Ne fifili e ia ke fakamukamuka e moui haana, he hagaaki ke he taha ni e mena: ko e taute e finagalo he Atua. Ne foaki fakailoilo e ia e magaaho mo e malolō haana ke fakalaulahi atu e tau mena he Kautu. Ne mumui a tautolu ke he fifitakiaga a Iesu he eketaha ke ‘fakamukamuka e tau mata’ mo e kalo mai he pehia a tautolu ke he tau mena nakai aoga ne fofō e malolō mo e onoonoaga ha tautolu. (Mata. 6:22) Tokologa e tau Kerisiano ne taute e tau lakaaga ke fakamukamuka aki e puhala moui ha lautolu ke maeke ke foaki fakalahi e magaaho ha lautolu ke he fekafekauaga. Ne maeke falu ke huhū atu ke he gahua paionia. Kaeke ko koe taha ia lautolu, kua nava lahi ki ai. Kua tamai he ‘kumikumi fakamua ke he kautu’ e fiafia mo e makona lahi.—Mata. 6:33.
Kia Fakatokolalo Tuga a Iesu
9, 10. Fakatātā fēfē e Iesu e fakatokolalo haana?
9 Ko e puhala ke uaaki he aga a Iesu ka fakatutala a tautolu ki ai ko e fakatokolalo haana. Ka tuku age ke he tau tagata nakai mitaki katoatoa e pule, ne fa feaki e lautolu e logonaaga matalahi. Ko e kehe ha ia mai ia Iesu! Pete ne mua ue atu e tuaga haana he taute e finagalo ha Iehova, ne atāina a Iesu mai he fakatātā e fakaikaluga. Ti kua fakamalolō ki a tautolu ke fifitaki a ia ke he puhala ia. Ne tohi he aposetolo ko Paulo: “Kia toka foki ia mutolu e manatu ia ne toka ai ia Keriso Iesu, Ko ia ne mahani fakalataha mo e Atua, nakai manatu a ia ko e fofo mena ke fakataufata a ia mo e Atua; ka kua fakatokolalo e ia a ia, ne mahani a ia fakalataha mo e tupa, nukua eke a ia tuga ne tagata.” (Filipi 2:5-7) Ko e heigoa kua putoia he mena ia?
10 Ne olioli e Iesu e kotofaaga mua ue atu he ha ha ai ke he lagi mo e Matua haana, ka e makai a ia ke “fakatokolalo e ia a ia.” Ne hiki mai e moui haana ke he nofoaga tama he tamāfine tote Iutaia, ne tupu ai ke hiva e mahina ato fanau a ia ko e mukemuke lolelole ke he magafaoa he tagata kamuta tū tokolalo. He fale a Iosefa, ne tupu hake fakahaga a Iesu ko e tama mukemuke, ke he tama taane tote, ti hoko ke he fuata mui. Nakai agahala a ia. Ka e, he vahā fuata haana ne fakatumau ni a ia ke omaoma ke he tau mamatua haana ko e tau tagata agahala nakai mitaki katoatoa. (Luka 2:51, 52) Ko e fakatokolalo kehe ue atu!
11. Ko e tau puhala fe ka fifitaki e tautolu e fakatokolalo a Iesu?
11 Kua fifitaki e tautolu e fakatokolalo ha Iesu ka makai a tautolu ke talia e tau matagahua ne liga tū tokolalo. Tuga e fakatai, manamanatu ke he matagahua ke fakamatala e tala mitaki. Kua tuga e tū tokolalo e gahua ia, mua atu ka tali fakakelea, vaiga, po ke vale e tau tagata. Pete ia, he fakatumau ke he gahua fakamatala, kua lagomatai e tautolu e falu ke talia e uiina a Iesu ke mumui ki a ia. Ti kua lagomatai e tautolu ke fakahao e tau momoui. (Totou 2 Timoteo 4:1-5.) Taha fakatai ko e leveki he ha tautolu a Fale he Kautu. Putoia ai e tau mena tuga e ligi he tau tini veve, mopo e foloa, mo e fakameā e tau fale ikiiki—ko e tau gahua tū tokolalo oti! Mailoga agaia ne tautolu ko e leveki he ha tautolu a Fale he Kautu—ko e matapatu he tapuakiaga meā he matakavi—ko e vala he gahua tapu ha tautolu. He makai ke taute katoa e tau gahua ne liga tū tokolalo, kua fakakite e tautolu e fakatokolalo mo e mumui ke he tau tuagahui he Keriso.
Tuga a Iesu, Kia Fakamakutu
12, 13. (a) Fakatātā fēfē e Iesu e makutu, ti ko e heigoa ne fakalagalaga a ia? (e) Ko e heigoa ka fakalagalaga a tautolu ke fakamakutu he fekafekauaga?
12 Manamanatu ke he makutu ha Iesu ke he fekafekauaga. Ne taute e Iesu e tau mena loga he nofo a ia ke he lalolagi. He magaaho ne tote a ia, ne liga gahua a ia mo e matua hiki haana ko Iosefa, ko e tagata kamuta. Ke he fekafekauaga haana, ne taute e Iesu e tau mana, putoia e fakamaulu a lautolu ne gagao mo e fakaliliu tutū mai a lautolu ne mamate. Ka ko e matapatu gahua haana ko e fakamatala e tala mitaki mo e fakaako a lautolu kua fanogonogo. (Mata. 4:23) Ko e tau tutaki haana, ne ha ha ia tautolu foki e gahua taha ke taute. Maeke fēfē a tautolu ke mumui ke he fifitakiaga haana? Taha e mena, maeke ia tautolu ke feaki e tau logonaaga tuga ha Iesu.
13 Ki luga he tau mena oti, ko e fakaalofa ma e Atua ne fakalagalaga a Iesu ke fakamatala mo e ke fakaako. Ka kua ofania foki e Iesu e tau kupu mooli ne fakaako e ia. Ki a ia, ko e tau kupu mooli ia ko e tau tanakiaga tauuka, ti makai a ia ke folafola atu ke he falu. Kua pihia foki e logonaaga ha tautolu ko e tau faiaoga. Manamanatu la ke he falu kupu mooli uho ne ako e tautolu mai he Kupu he Atua! Iloa e tautolu e matakupu ke he pule katoatoa ke he lagi mo e lalolagi katoa mo e puhala ka fakatotoka aki. Kua maama mitaki e tautolu e mena ne fakaako he tau Tohiaga Tapu hagaao ke he tuaga ha lautolu ne mamate mo e tau monuina ka moua mai he lalolagi foou he Atua. He iloa foou po kua leva he iloa e tautolu e tau kupu mooli, ne tumau agaia e aoga. He tuai po ke foou, ko e tau kupu mooli pihia ko e tau tanakiaga uho lahi mooli. (Totou Mataio 13:52.) He fakamatala mai he loto hakahakau, kua fakakite e tautolu ke he falu e fakaalofa ha tautolu ke he mena ne fakaako e Iehova ki a tautolu.
14. Fifitaki fēfē e tautolu e puhala fakaako ha Iesu?
14 Mailoga foki e puhala ne fakaako e Iesu. Ne takitaki tumau e ia e tau tagata fanogonogo haana ke he tau Tohiaga Tapu. Ne kamata tumau e ia e manatu aoga lahi he talahau: “Kua tohi.” (Mata. 4:4; 21:13) He tau kupu haana ne fakamau hifo, ne fatiaki fakahako mai po ke hagaao a ia ki ai ke molea e hafa he tau tohi he tau Tohiaga Tapu Heperu. Tuga a Iesu, ne falanaki fakalahi a tautolu ke he Tohi Tapu he fekafekauaga ha tautolu mo e lali ke fakamaama e tau Tohiaga Tapu ka maeke. He puhala ia, kua lagomatai e tautolu a lautolu ne loto hako ke kitia ne lautolu kua fakaako e tautolu e tau manatu he Atua, nakai ko e ha tautolu ni. Ko e fakafiafia ha ia ki a tautolu ka talia he taha ke totou mai he Tohi Tapu mo e fakatutala e uho mo e kakano he Kupu he Atua! Ka talia e lautolu ia e uiina ke mumui ki a Iesu, kua lahi mahaki e olioli ha tautolu.
Mumui ki a Iesu ko e Kakano ke Fakaalofa ke he Falu
15. Ko e heigoa e mahani kehe ue atu ha Iesu, ti maeke fēfē he fakaata ki ai ke lauia a tautolu?
15 Ko e vala fakahiku he aga ha Iesu ka fakatutala kua mua he loto mafanatia—ko e fakaalofa haana ma e tau tagata. Ne tohi he aposetolo ko Paulo: “Kua omoomoi a mautolu he fakaalofa a Keriso.” (2 Kori. 5:14) Ka fakaata e tautolu e fakaalofa ne ha ha ia Iesu ke he tau tagata oti mo tautolu takitokotaha, kua aamotia e tau loto ha tautolu ti logona e tautolu e omoomoiaga ke mumui ke he fifitakiaga haana.
16, 17. Ko e tau puhala fe ne fakakite e Iesu e fakaalofa haana ke he falu?
16 Fakakite fēfē e Iesu e fakaalofa ma e falu? Ko e makai haana ke tuku atu haana a moui ke lata mo e tau tagata ko e fakakiteaga mua ue atu he fakaalofa haana. (Ioane 15:13) Pete ia, he fekafekauaga ha Iesu, ne fakakite foki e ia e fakaalofa ke he falu puhala. Tuga anei, ne ha ha ia ia e fakaalofa hofihofi noa ki a lautolu ne matematekelea. He magaaho ne kitia e ia a Maria mo lautolu ne tagi ha ko e mate ha Lasalo, ne logona lahi e ia e momoko ha lautolu. Pete ne amanaki a ia ke fakaliu tu mai a Lasalo, ne mamahi lahi a Iesu ti “tagi” a ia.—Ioane 11:32-35.
17 He mataulu he fekafekauaga ha Iesu, ne fina atu e lepela ki a Iesu mo e tala age: “Kaeke kua finagalo a koe ki ai, kua maeke ni ia koe ke fakamea au.” Tali atu fēfē a Iesu? Ne pehē e kupu: “Kua hohofi noa e fakaalofa a Iesu kia ia.” Ati taute e ia taha mena kehe lahi mahaki. “Kua fakaolo atu hana a lima, kua piki atu kia ia, mo e tala age ki ai, Mena loto au ki ai; kia mea a koe. Kua vagahau atu a ia, ti maulu ai agataha e kafo lepela ia ia, kua mea tuai a ia.” I lalo he Fakatufono faka-Mose, kua nakai meā e tau lepela, ti liga fakamaulu mooli e Iesu e tagata ka e nakai aamo a ia. Ka e, he fakamaulu e Iesu e lepela, ne fakaatā e ia e lepela ke logona e aamo he taha tagata, liga ko e magaaho fakamua laia ke he tau tau loga. Ko e mahani fakaalofa hofihofi noa mooli!—Mare. 1:40-42.
18. Fakatātā fēfē e tautolu e “feofanaki”?
18 Ko e tau tutaki he Keriso, ne poaki ki a tautolu ke fakatātā e fakaalofa ha tautolu he fakakite e “feofanaki.” (1 Pete. 3:8) Kua liga nakai mukamuka ke maama e tau logonaaga he matakainaga hane matematekelea ha ko e gagao hololoa po ke gagao fakaatukehe—mua atu kaeke kua nakaila tupu e tau mena pihia ki a tautolu. Ka e fakaalofa agaia a Iesu ki a lautolu ne gagao pete ne nakai lagataha e gagao haana. Feaki fēfē e tautolu e fakaalofa pihia? He fanogonogo fakaeneene he liligi mai e tau loto ha lautolu ne matematekelea ki a tautolu. Maeke foki ia tautolu ke hūhū hifo, ‘Kaeke ko au he tuaga ha lautolu, to fēfē e logonaaga haaku?’ Kaeke ke feaki e tautolu he mataala ke he tau logonaaga he falu, to maeke mooli ia tautolu ke “fakamafana a lautolu kua manava tote.” (1 Tesa. 5:14) Ti mumui a tautolu ki a Iesu.
19. Ko e heigoa e tau puhala kua lauia a tautolu he fifitakiaga ha Iesu?
19 Ko e fakaakoaga atihake mooli kua moua e tautolu ke he tau kupu mo e tau gahua ha Iesu Keriso! Ko e lahi e fakaako ha tautolu hagaao ki a ia, kua lahi atu foki e manako ha tautolu ke tuga a ia—mo e lahi e manako ha tautolu ke lagomatai e falu ke taute pihia foki. Ko e mena ia, kia kumi e tautolu e fiafia he mumui ke he Patuiki faka-Mesia—mogonei mo e tukumalagi!
Maeke Nakai a Koe ke Fakamaama?
• Fakakite fēfē e tautolu e iloilo, tuga ne taute e Iesu?
• Ko e heigoa e tau puhala ka fakatātā e tautolu e fakatokolalo?
• Feaki fēfē e tautolu e fakamakutu he fekafekauaga?
• Ko e heigoa e tau puhala ka fifitaki e tautolu a Iesu he fakakite e fakaalofa ma e falu?
[Puha/Fakatino he lau 5]
KO E TOHI KA LAGOMATAI A TAUTOLU KE FIFITAKI E KERISO
He fonoaga faahimotu he 2007, ne fakatoka mai e tohi ne 192 e lau ne mataulu “Come Be My Follower.” Ne talaga e tohi nei ke lagomatai e tau Kerisiano ke hagaaki ki a Iesu, mua atu ke he haana tau mahani mo e tau gahua. He mole e tau veveheaga ua ne hafagi aki, ko e vala fakamua kua fakakite fakalaulahi e tau mahani ne mua ha Iesu—haana fakatokolalo, malolō, iloilo, omaoma, mo e fakauka.
Mui mai he mena nei ko e tau veheveheaga he tau gahua ha Iesu ko e faiaoga mo e tagata fakamatala he tala mitaki mo e ke he falu puhala ne kitia e fakaalofa lahi haana. He tohi katoa, kua fakatoka mai e tau vala tala ke lagomatai e Kerisiano ke fifitaki a Iesu.
Kua mauokafua a mautolu to omoi he tohi nei a tautolu oti ke kumikumi hifo ki a tautolu ni mo e hūhū: ‘Kua muitua mooli nakai au ki a Iesu? Maeke fēfē au ke muitua fakatata lahi ki a ia?’ To lagomatai foki “a lautolu oti [kua] kotofa ke he moui tukulagi” ke eke mo tau tutaki he Keriso.—Gahua 13:48.
[Fakatino he lau 4]
Ne talia e Iesu ke hau ke he lalolagi mo e fanau ko e tama mukemuke he tagata. Ko e heigoa e mahani ne kua lata ai ke moua?
[Fakatino he lau 6]
Ko e heigoa ka fakalagalaga a tautolu ke fakamakutu ke he fekafekauaga?