Fakakite e Loto Fakaaue Haau ma e Tau Mena Uho ne Nakai Kitia

1. Ko e heigoa ne talahau e Iesu hagaao ke he tau koloa uho he lagi?

KUA nakai maeke e tau mena uho oti ke kitia mata. Ko e tau mena ne mua atu e uho kua nakai kitia. He Lauga he Mouga, talahau e Iesu e tau mena ne mua atu e uho he lagi ke he tau koloa he tino. Ti lafi e ia e tala mooli nei: “Ha ko e mena ha i ai ha mutolu a tau koloa, ha ha i ai foki mo e tau loto ha mutolu.” (Mata. 6:19-21) To omoomoi he loto a tautolu ke tutuli e tau koloa ne uho lahi ki a tautolu. Tanaki e tautolu e “tau koloa . . . ke he lagi” he moua e higoa, po ke tuaga mitaki mo e Atua. Ko e tau koloa uho pihia he fakamaama e Iesu to nakai malona po ke kaihā he falu.

2. (a) Ia 2 Korinito 4:17, 18, ko e heigoa ne tomatoma e Paulo a tautolu ke hagaaki ki ai? (e) Ko e heigoa ha tautolu ka fakatutala he vala tala nei?

² Tomatoma he aposetolo ko Paulo a tautolu ke “manamanatu [ke he] tau mena nakai kitia.” (Totou 2 Korinito 4:17, 18.) Ko e tau mena nei ne nakai kitia ko e tau koloa uho ne putoia e tau monuina ka moua e tautolu he lalolagi foou he Atua. He vala tala nei, to kumikumi a tautolu ke he fā e koloa uho ne nakai kitia ka moua e tautolu mogonei​—kapitiga mo e Atua, mena fakaalofa he liogi, lagomatai he agaaga tapu he Atua, mo e lalagoaga mai he lagi ke he fekafekauaga ha tautolu. To fakatutala foki ke he puhala ka fakakite e tautolu e loto fakaaue ke he tau mena uho nei ne nakai kitia.

KAPITIGA MO IEHOVA

3. Ko e heigoa e mena kua mua e uho ne nakai kitia, ti maeke fēfē a tautolu ke moua ai?

³ Ko e mena kua mua e uho ne nakai kitia ko e kapitiga mo Iehova ko e Atua. (Sala. 25:14) Maeke fēfē e Atua ke kapitiga mo e tau tagata agahala ti tumau agaia e tapu katoatoa? Maeke a ia ke taute pihia ha ko e poa lukutoto ha Iesu kua “uta kehe e hala he lalolagi” he tau tagata. (Ioane 1:29) Iloa tuai e Iehova to nakai kaumahala e finagalo haana ke foaki mai e Fakamoui ma e tau tagata. Kakano ia ati maeke e Atua ke kapitiga mo e tau tagata ne momoui ato hoko e mate he Keriso.​—Roma 3:25.

4. Talahau e falu fakafifitakiaga he tau tagata taane ato hoko ke he vahā Kerisiano ne eke mo tau kapitiga he Atua.

⁴ Manamanatu ke he falu tagata taane ato hoko ke he vahā Kerisiano ne eke mo tau kapitiga he Atua. Ko Aperahamo ko e tagata ne malolō lahi e tua. Molea 1,000 e tau he mole e mate ha Aperahamo, ne fakahigoa e Iehova a ia ko e “haku a kapitiga.” (Isaia 41:8) Ti kua nakai maeke e mate ke vevehe a Iehova mai he tau kapitiga tata haana. Moui agaia a Aperahamo ha kua manatu e Iehova. (Luka 20:37, 38) Taha fakafifitakiaga foki ko Iopu. He fakapotopoto e tau agelu he lagi, ne mauokafua a Iehova he tutala hagaao ki a Iopu. Fakahigoa e Iehova a Iopu “ko e tagata mahani hakohako mo e mahani tonu, kua matakutaku a ia ke he Atua mo e kalo kehe mo e tau mena kelea.” (Iopu 1:6-8) Ti fēfē e logonaaga ha Iehova ki a Tanielu, ne fekafekau fakamooli a ia ke he Atua he motu pouliuli ke he kavi 80 e tau? Lagatolu e tala age he tau agelu ke he tagata motua nei kua lahi e “ofania” he Atua ki a ia. (Tani. 9:23; 10:11, 19) Mauokafua a tautolu kua finagalo a Iehova ke liu fakatutū mai e tau kapitiga fakahele haana ne mamate.​—Iopu 14:15.

5. Ko e heigoa kua lata ke taute ke kapitiga tata mo Iehova?

⁵ Tokofiha e tagata nakai mitaki katoatoa he vahā nei ne kapitiga tata mo Iehova? Totou miliona. Iloa e tautolu e mena nei ha kua tokologa e tagata taane, tau fifine, mo e tau fanau he lalolagi katoa ne fakakite he tau gahua ha lautolu kua manako mooli ke kapitiga mo e Atua. Ko Iehova “kua feofanaki [po ke, kapitiga] a ia mo lautolu ne mahani hakohako.” (Fakatai 3:32) Maeke e fakafetuiaga kapitiga nei ha ko e tua ha lautolu ke he poa lukutoto ha Iesu. Ha ko e poa lukutoto, kua maeke a tautolu ke kapitiga mo Iehova he tukulele e tau momoui ki a ia ti papatiso. Ka taute e tautolu e tau lakaaga aoga nei, fakalataha a tautolu mo e tau Kerisiano ne totou miliona kua tukulele ti papatiso kua hane “feofanaki” mo e Atua mua ue atu he lagi mo e lalolagi katoatoa!

6. Fakakite fēfē e tautolu e loto fakaaue he kapitiga mo e Atua?

⁶ Fakakite fēfē kua tokiofa e tautolu e kapitiga mo e Atua? Tuga a Aperahamo mo Iopu ne fakatumau e fakamooli ke he Atua ke molea taha e teau tau, lata a tautolu ke fakatumau e fakamooli​—pete kua fiha e leva he fekafekau a tautolu ki a Iehova he fakatokaaga tuai nei. Tuga a Tanielu, lata ke tokiofa e kapitiga ha tautolu mo e Atua ke mua hake ke he moui ha tautolu. (Tani. 6:7, 10, 16, 22) Mo e lagomataiaga ha Iehova, maeke a tautolu ke fakauka ke he ha kamatamata ka feleveia mo tautolu mo e tumau ha tautolu a pipiaga tata mo ia.​—Isaia 12:2.

MENA FAKAALOFA HE LIOGI

7. (a) Ia Tau Fakatai 15:8, fēfē e logonaaga ha Iehova ke he tau liogi ha tautolu? (e) Puhala fe kua tali e Iehova e tau liogi ha tautolu?

⁷ Taha mena uho foki ne nakai kitia ko e liogi. Fiafia e tau kapitiga tata ke tutala ke he tau manatu mo e tau logonaaga ha lautolu. Pihia nakai e tuaga kapitiga ha tautolu mo Iehova? Ē! Tutala a Iehova ki a tautolu puhala he haana Kupu, ti fakakite mai e ia i loto e tau manatu mo e tau logonaaga haana. Matutaki a tautolu mo ia he liogi, ti tala age e tautolu e tau manatu mo e tau logonaaga hokulo ki a ia. Fiafia a Iehova ke fanogonogo ke he tau liogi ha tautolu. (Totou Tau Fakatai 15:8.) Ko e Kapitiga fakaalofa a Iehova ne fanogonogo mo e tali foki e tau liogi ha tautolu. Falu mogo ne moua vave e tali. He falu mogo ne lata a tautolu ke fakatumau ke liogi hagaao ki ai. Ka e mauokafua agaia a tautolu to moua e tali he magaaho hako mo e he puhala kua mua e mitaki. Mooli, liga kehe e tali he Atua ke he mena ne amanaki a tautolu ki ai. Ma e fakatai, he nakai utakehe e kamatamata, liga foaki mai e ia e iloilo mo e malolō “ke fakauka ai.”​—1 Kori. 10:13.

8. Fakakite fēfē e tautolu e loto fakaaue ma e mena fakaalofa ko e liogi?

⁸ Fakakite fēfē e tautolu e loto fakaaue ma e mena fakaalofa uho nei ko e liogi? Taha puhala ko e omaoma ke he fakatonuaga he Atua ke “liogi nakai noa.” (1 Tesa. 5:17) Nakai peehi e Iehova a tautolu ke liogi. Ka e fakalilifu e ia ha tautolu a atāina ke fifili ti tomatoma mai ke “fakamakamaka ke he liogi.” (Roma 12:12) Ti fakakite e tautolu e loto fakaaue he liogi tumau he tau aho takitaha. Lata mooli ke putoia ke he tau liogi ha tautolu e tau fakaaue mo e tau fakaheke ki a Iehova.​—Sala. 145:2, 3.

9. Fēfē e logonaaga he taha matakainaga taane hagaao ke he liogi, mo e fēfē e logonaaga haau ki ai?

⁹ Ka leva e fekafekau ha tautolu ki a Iehova mo e mailoga e tau puhala ne tali e ia e tau ole ha tautolu, to mua atu e loto fakaaue ha tautolu ke he liogi. Ma e fakatai, ko Chris ko e matakainaga taane ne fekafekau mau ke he 47 e tau kua mole. “Ko e mitaki ha ia ke fai magaaho he mogo pogipogi ke liogi fakaloaloa ki a Iehova,” he talahau e ia. “Ko e logonaaga atihake mooli ke tutala ki a Iehova he puna mai e matalaā ti kikila e tau hinahina he tōhau! Omoomoi he mena nei au ke fakaaue ki a ia ma e tau mena fakaalofa oti haana, putoia e lilifu ke liogi. Ti ka oti e liogi he matahiku he aho, ko e mitaki ha ia he fano ke mohe mo e loto manamanatu meā.”

MENA FAKAALOFA HE AGAAGA TAPU

10. Ko e ha kua lata ia tautolu ke tokiofa e agaaga tapu he Atua?

¹⁰ Ko e agaaga tapu he Atua ko e taha mena fakaalofa ne nakai kitia kua lata ia tautolu ke tokiofa. Tomatoma e Iesu a tautolu ke liogi tumau ma e agaaga tapu. (Luka 11:9, 13) Puhala he agaaga haana, foaki e Iehova ki a tautolu e malolō​—ko e malolō kua “lahi ue atu.” (2 Kori. 4:7; Gahua 1:8) Ha ko e lagomatai he agaaga he Atua, maeke a tautolu ke fakauka ke he ha kamatamata ka feleveia mo tautolu.

11. He puhala fe ka lagomatai he agaaga tapu a tautolu?

¹¹ Maeke e agaaga tapu ke lagomatai a tautolu ke taute e tau kotofaaga he fekafekau ke he Atua. Maeke e agaaga he Atua ke fakatolomaki ki mua e tau taleni mo e tau lotomatala ha tautolu. Ti maeke a tautolu ke taute e tau matagahua Kerisiano ha tautolu. Iloa mooli e tautolu ko e tau fua mitaki he tau gahua ha tautolu kua maeke ni ha ko e lagomataiaga he agaaga tapu he Atua.

12. Ia Salamo 139:23, 24, maeke a tautolu ke liogi ma e agaaga tapu ke lagomatai a tautolu ke taute e heigoa?

¹² Taha puhala foki ke fakakite kua tokiofa e tautolu e agaaga tapu he Atua, ko e liogi ke lagomatai a tautolu ke mailoga ha manatu po ke manako hepe he tau loto ha tautolu. (Totou Salamo 139:23, 24.) Ka olelalo pihia a tautolu, to fakaaoga e Iehova e agaaga tapu haana ke mailoga e tautolu e tau manatu po ke tau manako hepe. Ti ka iloa e tautolu e manatu po ke manako hepe, lata ke liogi ma e agaaga he Atua ke foaki mai e malolō ke totoko e manatu po ke manako pihia. Fakakite mogoia kua eketaha a tautolu ke kalo kehe he taute ha mena ka taofi a Iehova he lagomatai a tautolu aki e agaaga tapu haana.​—Efeso 4:30.

13. Maeke fēfē a tautolu ke fakahokulo e loto fakaaue ma e agaaga tapu?

¹³ Maeke a tautolu ke fakahokulo e loto fakaaue ma e agaaga tapu he manamanatu ke he gahuahuaaga he agaaga tapu he vahā nei. Ato hake a Iesu ke he lagi, ne tala age e ia ke he tau tutaki haana: “To moua e mutolu e malolo, ka haele hifo e Agaga Tapu ki luga ia mutolu; to eke foki a mutolu mo tau talahau haku . . . ke hoko ni ke he fakaotiaga he lalolagi.” (Gahua 1:8) Kua fakamooli e tau kupu nei he mogonei. Ha ko e lalagoaga he agaaga tapu, kavi ke valu mo e hafa e miliona he tau tagata tapuaki ha Iehova kua fakapotopoto mai he tau faahi oti he lalolagi. Fakalataha foki a tautolu ke he parataiso fakaagaaga ha kua lagomatai mai he agaaga he Atua ke feaki e tau mahani fulufuluola, tuga e fakaalofa, fiafia, mafola, fakauka, totonu, mahani mitaki, tua, mahani molū, mo e manako fakalatalata. Ko e tau mahani nei “ko e fua he Agaga.” (Kala. 5:22, 23) Uho mooli e mena fakaalofa ko e agaaga tapu!

LALAGOAGA MAI HE LAGI KE HE FEKAFEKAUAGA HA TAUTOLU

14. Ko e heigoa e lagomatai ne nakai kitia ne kua moua e tautolu ka fakalataha ke he fekafekauaga?

¹⁴ Moua e tautolu e mena uho ne nakai kitia he ‘gahua fakalataha’ mo Iehova mo e vala he haana fakatokatokaaga he lagi. (2 Kori. 6:1) Gahua a tautolu mo lautolu ia he fai vala ke he gahua taute tutaki. Pehē a Paulo ko ia mo lautolu ne fai vala ke he gahua nei: “Ko e tau ekegahua a mautolu fakalataha mo e Atua.” (1 Kori. 3:9) Ka fakalataha a tautolu ke he fekafekauaga Kerisiano, ko e tau ekegahua foki ha Iesu a tautolu. He mole e poaki e Iesu e tau tutaki haana ke “eke e tau motu oti kana mo tutaki,” pehē a ia: “To fakalataha au mo mutolu.” (Mata. 28:19, 20) Ka e kua e tau agelu? Ko e fakamonuinaaga mooli ke takitaki he tau agelu ke fakamatala e “vagahau mitaki tukulagi . . . kia lautolu kua nonofo ke he lalolagi”!​—Fakakite. 14:6.

15. Talahau e fakafifitakiaga he Tohi Tapu ne fakakite e vala uho ha Iehova he fekafekauaga ha tautolu.

¹⁵ Ha ko e lagomataiaga nei mai he lagi, ko e heigoa kua maeke a tautolu ke taute? He gana e tautolu e tau tega he fekau he Kautu, ne mokulu e falu tega ke he tau loto mitaki ti tupu ai. (Mata. 13:18, 23) Ko hai ne fakatupu e tau tega ia he kupu mooli ti fua loga mai? Fakamaama e Iesu kua nakai maeke ha tagata ke eke mo tutaki haana ka nakai “futia mai he Matua.” (Ioane 6:44) Foaki he Tohi Tapu e fakafifitakiaga pauaki ke he mena nei. Manatu e magaaho ne fakamatala a Paulo ke he matakau he tau fifine i fafo he maaga ko Filipi. Mailoga e talahauaga he Tohi Tapu ke he taha ia lautolu, ko e fifine ne higoa ko Litia: “Kua vevete he Iki [Iehova] hana loto kia hagao mai ke he tau kupu ne vagahau atu e Paulo.” (Gahua 16:13-15) Tuga a Litia, totou miliona foki kua futia mai e Iehova.

16. Ko hai kua lata ke moua e fakahekeaga ma e ha fua mitaki ne moua e tautolu he fekafekauaga?

¹⁶ Ko hai mooli ka moua e fakahekeaga ka fua mitaki e fekafekauaga ha tautolu? Tali e Paulo e hūhū ia he tohi e tau kupu nei hagaao ke he fakapotopotoaga Korinito: “Ne to e au, ne fakamalū e Apolo, ka ko e Atua ni kua fakatutupu ai. Hanai, kua noa a ia ne to, mo e noa a ia ne fakamalū; ka ko e Atua ni kua fakatutupu ai.” (1 Kori. 3:6, 7) Tuga a Paulo, lata a tautolu ke fakaheke tumau a Iehova ma e ha fua mitaki ne moua he fekafekauaga.

17. Maeke fēfē a tautolu ke fakakite e loto fakaaue he ‘gahua fakalataha’ mo e Atua, Keriso, mo e tau agelu?

¹⁷ Maeke fēfē a tautolu ke fakakite e loto fakaaue ma e lilifu he ‘gahua fakalataha’ mo e Atua, Keriso, mo e tau agelu? He kumi fakamakutu e tau magaaho ke tala age e tala mitaki ke he falu. Loga e puhala ke taute e tautolu e mena nei, tuga he fakamatala ke he “tau tagata, katoa foki mo e taha fale mo e taha fale.” (Gahua 20:20) Tokologa foki ne fiafia he fakamatala he tau magaaho noa. Ka feleveia laia a lautolu mo e taha tagata, fakafeleveia mafanatia atu e lautolu ti lali ke kamata e fakatutalaaga. Ka fiafia e tagata ke tutala, ti fakailoilo a lautolu he talahau e fekau he Kautu.

18-19. (a) Fakamalū fēfē e tautolu e tau tega he kupu mooli? (e) Talahau e taha mena ne tupu kua fakakite e puhala ne lagomatai e Iehova e taha tagata fakaako Tohi Tapu.

¹⁸ Ha ko tautolu ko e “tau ekegahua . . . fakalataha mo e Atua,” kua lata ke tō e tau tega he kupu mooli ti fakamalū foki. Ka fiafia e taha tagata, eketaha a tautolu ke liu aahi atu po ke fakatoka e taha ke matutaki mo e tagata ia ti lali ke kamata e fakaako Tohi Tapu. He holo ki mua e fakaakoaga, fiafia a tautolu he kitia kua lagomatai e Iehova e tagata fakaako Tohi Tapu ke hiki e puhala manamanatu mo e tau logonaaga haana.

¹⁹ Manamanatu ke he fakafifitakiaga ha Raphalalani, ko e taulatua i Aferika Toga. Fiafia lahi a ia ke he tau mena haana ne iloa mai he fakaako e Tohi Tapu. Ka e uka lahi a ia ke talia e talahauaga he Kupu he Atua ke he matutakiaga mo e tau tupuna ne mamate. (Teu. 18:10-12) Fano fakahaga ai, ne fakaatā e ia e Atua ke hiki e manamanatuaga haana. Fakahiku ai, ne fakaoti e gahua taulatua haana pete ko e gahua ia ni haana. Pehē a Raphalalani ne kua 60 e tau he moui mogonei: “Fakaaue lahi au ke he Tau Fakamoli a Iehova he lagomatai au ke he tau puhala loga, tuga e kumi e gahua tupe ma haaku. Ka e mua atu, fakaaue au ki a Iehova he lagomatai au ke taute e tau hikiaga he moui haaku ti maeke au mogonei ke fakalataha ke he fekafekauaga ko e taha he Tau Fakamoli papatiso haana.”

20. Ko e heigoa haau ka eketaha ke taute?

²⁰ He vala tala nei, ne fakatutala a tautolu ke he fā e mena uho ne nakai kitia. Taha ne mua atu he tau mena ia ko e lilifu he eke a Iehova mo Kapitiga tata lahi ha tautolu. Ti lagomatai he mena ia a tautolu ke aoga mai he tau mena uho ne nakai kitia​—tutala ki a ia he liogi, logona hifo e lagomatai he agaaga tapu haana, mo e moua e lalagoaga mai he lagi ke he fekafekauaga ha tautolu. Kia eketaha a tautolu ke fakahokulo e loto fakaaue ma e tau mena uho nei ne nakai kitia. Ti manako tumau a tautolu ke fakaaue ki a Iehova he eke mo Kapitiga ne mua ue atu.