Puha Hūhū

◼ Lata nakai ke liogi he fakaako Tohi Tapu he gutuhala?

Ha ha i ai loga e tau aoga ke hafagi mo e pā e fakaako Tohi Tapu aki e liogi. Puhala he liogi, kua ole a tautolu ki a Iehova ma e agaaga tapu haana ke he fakatutalaaga ha tautolu. (Luka 11:13) Kua peehi foki he liogi ke he tagata fakaako ha tautolu e aoga lahi mahaki he fakaako haana ke he Tohi Tapu mo e fakaako ki a ia e puhala ke liogi. (Luka 6:40) Ko e mena ia, kua mitaki ke taute e liogi he kamataaga. Ha kua kehekehe e tau tuaga, kua lata e faiaoga ke fakaaoga e lotomatala he fifili ke taute e liogi ke he fakaako Tohi Tapu he gutuhala.

Taha vala aoga ke manamanatu ki ai ko e matakavi ne taute e fakaakoaga. Ka nakai maaliali atu ke he tau tagata, ti maeke ke taute fakailoilo e liogi kū ke hafagi mo e pā aki e fakaakoaga kua fakatū. Ka ko e taute pihia to kitekite mai e tau tagata po ke taute e tagata fakaako ke fuafuakelea, ti liga mitaki ke fakatali ato taute e fakaakoaga he tuaga ne nakai kitia he tau tagata. Pete ni e matakavi ne taute e fakaakoaga, kua lata ia tautolu ke fifili fakamitaki e magaaho ke kamata e liogi. Kikite Ha Tautolu a Fekafekauaga he Kautu ia Aperila 2005, lau 6.