Ua e Tupe Ikiiki

Taha e puhala aoga kua lalago e tautolu e tau mena he Kautu ko e tuku e tau tupe ke he gahua fakamatala he lalolagi katoa. Ka e kua ka temotemoai e tau mena moua ha tautolu?

He taha magaaho ne kitia e Iesu e takape nofogati ne tuku ua e tupe ikiiki he puha he faituga. Ko e fakaalofa ki a Iehova ne fakalagalaga e takape pete “ko ia kua nofogati, kua [foaki] e ia hana a tau mena oti ne toka ia ia, ko e hana a tau mena oti ke moui ai.” (Mare. 12:41-44) Ne mailoga e Iesu ti fakakite ko e mena fakaalofa haana ne mua e uho ke he fofoga he Atua. Pihia foki, ne nakai onoono e tau Kerisiano he senetenari fakamua ko e matagahua he tau Kerisiano muhukoloa ni ke lalago fakatupe e gahua he fonua. Ne fakakite he aposetolo ko Paulo e fifitakiaga he tau tagata Maketonia pete ne “nonofogati lahi . . . kua ole mai mo e fakamakamaka . . . kia talia ai e mautolu e mena fakaalofa.”​—2 Kori. 8:1-4.

Ko e mena ia, ka foaki ni e tautolu “ua e tupe ikiiki,” kua lata ia tautolu ke manatu ko e loga e tau mena fakaalofa ikiiki ka lafilafi ke lahi e mena moua. Ko e foaki ha tautolu mai he loto ka fakafiafia e ha tautolu a Matua fakamokoi he lagi, ha kua “fakaalofa e Atua kia ia kua foaki mo e fakamakai.”​—2 Kori. 9:7.