Kua Fakaalofa a Iehova kia Lautolu kua Foaki mo e Fakamakai
“Kia takitokotaha mo e foaki tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.”—2 KORINITO 9:7.
1. Foaki fakamakai fefe e Atua mo Keriso?
KO IEHOVA ne foaki mo e fakamakai fakamua. Ne foaki fiafia e ia e moui ke he hana a Tama fuataha mo e fakaaoga a ia ke tamai aki e tau agelu mo e tau tagata. (Fakatai 8:30, 31; Kolose 1:13-17) Ne foaki mai he Atua ki a tautolu e moui mo e fafagu mo e tau mena oti, pihia foki e uha mai he lagi mo e tau vaha fua kehekehe, fakapuke ai ha tautolu a tau loto aki e makai. (Gahua 14:17; 17:25) Ko e moli, ko e Atua mo e hana Tama, ko Iesu Keriso, ne foaki mo e fakamakai tokoua. Ne foaki fiafia mo e agaga nakai lotokai. Ne hofihofi e fakaalofa he Atua ke he tau tagata oti ti “ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” Ne foaki mo e nakai momoko e Iesu “hana moui mo lukutoto ke hukui aki e tau tagata tokologa.”—Ioane 3:16; Mataio 20:28.
2. Ke lata ia mo Paulo, ko e vahega tagata foaki fefe ne fakaalofa e Atua ki ai?
2 Ko e tau fekafekau he Atua mo Keriso kua lata foki ke foaki mo e fakamakai. Ko e vahega foaki pihia ne fakamalolo mai he tohi ke ua aki he aposetolo ko Paulo ke he tau Kerisiano i Korinito, ne tohia ai ke he 55 V.N. Ko e mahino mai ko e tala ke he tau tupe foaki fakaalofa mai he loto mo e tau tagata takitokotaha ne taute pauaki ke lagomatai aki e tau Kerisiano nonofogati i Ierusalema mo Iutaia, ne pehe a Paulo: “Kia takitokotaha mo e foaki tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.” (2 Korinito 9:7; Roma 15:26; 1 Korinito 16:1, 2; Kalatia 2:10) Fefe e gahuahuaaga he tau tagata he Atua ke he tau magaaho kua lata ke foaki? Ko e heigoa ha tautolu ne fakaako mai he fakatonuaga ne foaki mai e Paulo?
Fakaohooho He Tau Loto Fiafia
3. Lahi fefe e lagomatai he tau Isaraela ke he atiaga he faituga mo tapuaki ki a Iehova?
3 Ko e tau loto fiafia ne fakalagalaga e tau tagata he Atua ke foaki a lautolu mo e ha lautolu a tau koloa ke lagomatai aki e tau gahua mai he lagi. Tuga a nei, ko e tau Isaraela he vaha ia Mose ne fiafia ke lagomatai e ati hakeaga he faituga ke tapuaki ki a Iehova. Ko e tau loto he falu fifine ne fakalagalaga a lautolu ke vilo e tau fulu koti, ka ko e falu tagata tane ne talaga tufuga. Ne foaki mo e fakamakai he tau tagata e tau auro, ario, akau, ie lino mo e falu mena foki ne foaki noa mo “poa kia Iehova.” (Esoto 35:4-35) Ne lahi e fakamokoi ha lautolu ke he tau koloa foaki noa ti “ko e tau mena kua eke, kua lata ia mo e gahua oti ke eke aki, ti toe ni.”—Esoto 36:4-7.
4. Ko e heigoa e agaga foaki ha Tavita mo e falu ma e faituga?
4 Ke he tau senetenari fakamui, ne lahi e tau koloa foaki ha Tavita ma e faituga ha Iehova ne ta he hana a Tama ko Solomona. Ha ‘kua fiafia’ a Tavita ‘ke he fale he Atua,’ ati foaki ai e ia hana a tau ‘koloa pauaki’ ko e auro mo e ario. Ko e tau fanau he tau Patuiki, ko e tau iki, mo e falu foki ne ‘ta atu mo e fakamakai ha lautolu a tau mena kia Iehova.’ Ko e heigoa e fua? Ko e ha, ko e “fiafia ai e motu, ha kua foaki atu e lautolu mo e loto makai, ha kua foaki atu e lautolu mo e loto katoa mo e fakamakai kia Iehova”! (1 Nofoaga he Tau Patuiki 29:3-9) Ko lautolu ko e tau tagata foaki fakamakai.
5. Lagomatai fefe he tau Isaraela e tapuakiaga moli mai he tau senetenari?
5 Ke he tau senetenari, ne monuina e tau Isaraela ke lagomatai e faituga fakamua mo e tau faituga fakamui mo e tau gahua ekepoa mo e faka-Levi i kavi ia. Tuga a nei, ke he vaha ha Nehemia ne fifili e tau Iutaia ke lafilafi e tau mena fakaalofa ke leveki aki e tapuakiaga mea, he mailoga e lautolu ke nakai tiaki e fale he Atua. (Nehemia 10:32-39) Pihia foki e vaha nei, ne foaki fiafia he Tau Fakamoli a Iehova e tau mena fakaalofa ke talaga mo e leveki aki e tau fale ne fa feleveia ai mo e lagomatai foki e tapuakiaga moli.
6. Fakakite e tau fakafifitakiaga he tau foaki fakamakai ne taute he tau Kerisiano?
6 Ne foaki mo e fakamakai e tau Kerisiano fakamua. Tuga a nei, ne ‘gahua fakamoli’ a Kaio ke he tau mena oti ne eke e ia ha kua leveki fiafia ke he tau matakainaga ahiahi ha ko e gahua he Kautu, tuga ni e Tau Fakamoli a Iehova ne leveki fakamitaki e tau leveki faifano ne fakafano mai he Kaufakalatahaaga Tohi Tapu mo e Pepa Lotu he Kolo Toko. (3 Ioane 5-8) Ko e tau tupe ke maeke he tau matakainaga nei ke ahiahi e tau fakapotopotoaga mo e leveki fakamitaki atu ki a lautolu, ka e mua atu e aoga fakaagaga e mena nei!—Roma 1:11, 12.
7. Fakaaoga fefe he tau tagata Filipi ha lautolu a tau koloa?
7 Ko e fakapotopotoaga katoa ne fakaaoga ha lautolu a tau koloa he tino ke fakalaulahi aki e tau gahua he Kautu. Tuga a nei, ne pehe a Paulo ki a lautolu ne tua i Filipi: “Ha ko e mena ne ta age kia au ki Tesalonia kua lagataha mo e lagaua e tau mena ne nofogati ai au. Nakai kumi foki e au e mena fakaalofa, ka kua kumi e fua ke au atu ai he talahaua a mutolu.” (Filipi 4:15-17) Ne foaki mo e fakamakai e tau tagata Filipi, ka ko e heigoa e tau mena ne fakaohooho aki e foaki fakamakai nei?
Heigoa e Tau Fakaohoohoaga ke Foaki Fakamakai?
8. Fakamoli fefe e koe, ko e agaga he Atua ne omoi hana tau tagata ke foaki mo e fakamakai?
8 Ko e agaga a Iehova, po ke malolo gahuahua, ne omoi aki hana a tau tagata ke foaki mo e fakamakai. Ke he magaaho ne nonofogati ai e tau Kerisiano Iutaia, ne fakalagalaga he agaga he Atua e falu ne tua ke lagomatai a lautolu ke he tino. Ke fakaohooho aki e tau Kerisiano i Korinito ke foaki fakalahi e tau mena fakaalofa pihia, ne talahau e Paulo e fakafifitakiaga he tau fakapotopotoaga i Maketonia. Pete ne moua a lautolu ne tua i Maketonia he tau favale mo e nonofogati, ne fakakite e lautolu e fakaalofa fakamatakainaga he foaki e lautolu ke he malolo ne lahi atu ke he ha lautolu a malolo. Ne ole a lautolu ke he fakamonuinaaga ia ke foaki! (2 Korinito 8:1-5) Ko e gahua he Atua ne nakai falanaki ni hokoia ke he tau fakaalofa mai ha lautolu ne muhu koloa. (Iakopo 2:5) Ko e hana a tau fekafekau tukulele ne nonofogati ke he tau koloa he tino, e matapatu ne fakatupe e gahua fakamatala he Kautu. (Mataio 24:14) Ka e taha e mena, ne nakai matematekelea a lautolu ha ko e ha lautolu a fakamokoi, ha ko e mena nakai kaumahala e Atua ke foaki ma e tau manako he hana a tau tagata ke he gahua nei, mo e malolo i tua ia he fakatumau mo e tupu ko e hana a agaga.
9. Matutaki fefe e tua, lotomatala, mo e fakaalofa ke he foaki mo e fakamakai?
9 Ne omoi he tua, lotomatala, mo e fakaalofa ke foaki mo e fakamakai. Ne pehe a Paulo: “Hanai, tuga he tupu lahi ia mutolu [ko e tau Korinito] e tau mena oti, ko e tua, mo e kupu, mo e maama, mo e fakamakutu oti kana, katoa mo e ha mutolu a fakaalofa mai kia mautolu, kia tupu lahi pihia foki ia mutolu e mena fakaalofa nai. Nakai ko e kupu poaki kua tala atu nai e au, ka ko e fakamakutu he falu ke kamatamata foki po ke ne moli ha mutolu a fakaalofa.” (2 Korinito 8:7, 8) Ka foaki ma e tau gahua a Iehova, mua atu ka nakai fai mena lahi a ia ke foaki, ko e tua ni ke he Atua ke he tau koloa he vaha i mua. Ko e tau Kerisiano ne lahi e pulotu ne manako ke fekafekau ke he finagalo a Iehova, mo lautolu ne lahi e fakaalofa ki a ia mo e hana a tau tagata ne fakaaoga fiafia hana a tau koloa ke fakalaulahi atu hana a gahua.
10. Ko e ha ne maeke ke pehe ai ko e fakafifitakiaga ha Iesu ne omoi e tau Kerisiano ke foaki fakamakai?
10 Ko e tau fakafifitakiaga a Iesu ne omoi e tau Kerisiano ke foaki mo e fakamakai. Mole atu e fakalagalaga ke he tau Korinito ke foaki mai he fakaalofa, ne pehe a Paulo: “Nukua iloa e mutolu e fakaalofa noa he Iki ha tautolu ko Iesu Keriso, ne muhu mena a ia, ka kua fakanofogati a ia ha ko mutolu, kia fakamuhu mena a mutolu ke he hana a nofogati.” (2 Korinito 8:9) Ne maukoloa ke he lagi ti mua atu ke he falu fanau he Atua, ne toka oti e Iesu e tau mena oti nei ti uta e ia e moui fakatagata. (Filipi 2:5-8) Ne fakanofogati ke he puhala nakai lotokai nei, ti foaki e Iesu e fakatapuaga he higoa a Iehova mo e foaki hana a moui mo lukutoto kua aoga atu ki a lautolu e tau tagata ne talia. Ne felauaki mo e fakafifitakiaga a Iesu, nakai kia lata ia tautolu ke foaki mo e fakamakai ke lagomatai e falu mo e foaki ma e fakahekeaga he higoa a Iehova?
11, 12. Maeke fefe he tau fakatokatokaaga mitaki ke maeke ia tautolu ke foaki mo e fakamakai?
11 Maeke ke foaki mo e fakamakai ka mitaki e tau fakatokatokaaga. Ne tala age a Paulo ke he tau tagata Korinito: “Ko e aho fakamua he taha fahi tapu mo e taha fahi tapu, kia takitokotaha mo e tuku age ai hana mena, ke fakalata hana mena ke taute mo e monuina hana; neke eke e tau tanakiaga ke he vaha ka fina atu ai au.” (1 Korinito 16:1, 2) Ke he puhala fakatagata mo e fakamakai taha nei, ko lautolu ne manako ke foaki e tau mena fakaalofa ke fakalaulahi aki e tau gahua he Kautu he vaha nei kua mitaki lahi ke toka kehe e tau mena mai he ha lautolu a tau tupe ma e gahua ia. Ko e fua he fakatokatokaaga mitaki pihia, ko e tau Fakamoli takitokotaha, tau magafaoa, mo e tau fakapotopotoaga ne maeke ke foaki e tau mena fakaalofa ke fakatupu ki mua e tapuakiaga moli.
12 Fakagahua e tau fakatokatokaaga ke foaki fiafia ai a tautolu. Tuga ne talahau e Iesu, “Kua mua e monuina hana ke foaki atu, ke he monuina hana ke talia mai.” (Gahua 20:35) Ti maeke he tau tagata Korinito ke lahi ha lautolu a fiafia ha ko e mumuitua ke he fakatonuaga ha Paulo ke fakagahua ha lautolu a fakatokaaga taha tau ke fakafano e tau mena fakaalofa ne fakaputu ki Ierusalema. “Ti talia fakamitaki e tagata, kua fakalata ke he tau mena ha ha ia ia, ka e nakai fakalata ke he tau mena nakai ha ha ia ia,” he ui e ia. Ka foaki mena fakaalofa e tagata he mena ne ha ha ia ia, kua lata ni ke tuku age e aoga lahi ki ai. Ka falanaki a tautolu ke he Atua, to maeke ia ia ke fakatatai e tau mena, ke maeke ia lautolu ne muhu mena ke foaki fakalahi, ka e nakai moumou mena, mo lautolu ne gahoa e tau mena ke nakai hogeia mena a ia, ke fakalolelole ha lautolu a malolo mo e fahia ke fekafekau a ia.—2 Korinito 8:10-15.
Fakaeneene e Tauteaga he Foaki
13. Ko e ha ne mauokafua e tua he tau tagata Korinito ke leveki e Paulo e tau mena fakaalofa?
13 Pete ni he takitaki e Paulo e tau fakatokatokaaga he tau mena fakaalofa ke maeke ia lautolu ne tua mo e nonofogati ke moua e tau koloa fakaalofa mo e maeke ke gahua fakamalolo ke he gahua fakamatala, nakai maeke ia ia po ke falu ke uta mai he tau tupe ia ma e ha lautolu a tau gahua. (2 Korinito 8:16-24; 12:17, 18) Ne gahua a Paulo ke lata mo koloa ni hana ka e nakai fakakavega ke he tau fakapotopotoaga. (1 Korinito 4:12; 2 Tesalonia 3:8) Ne tuku age e tau mena fakaalofa ki a ia kakano ko e foaki he tau tagata Korinito ke leveki he fekafekau fakamoli, gahua fakamakamaka he Atua.
14. Ke he fakaaogaaga he tau mena fakaalofa, ko e heigoa e fakamauaga ke lata mo e Kaufakalatahaaga Kolo Toko?
14 Tali mai he kamataaga he Kaufakalatahaaga Tohi Tapu mo e Pepa Lotu he Kolo Toko he 1884, ne fai fakamoliaga a lautolu e tau tagata foaki mena fakaalofa ko e fakamoli a ia ne leveki e tau mena fakaalofa ne tuku age ki a ia ke lata mo e tau gahua he Kautu a Iehova. Ke lata ia mo e hana a tohi fakave, ne foli e Kaufakalatahaaga ke fakamakona e manako mua ue atu he tau tagata, ko e manako ke he tau mena fakaagaga. Ne taute e mena nei ke he tau pepa Tohi Tapu mo e tau fakatonutonuaga ke he mouaga he fakamouiaga. Ke he vaha nei, ha ne fakamafiti e Iehova e fakapotopoto ha lautolu ne tuga e tau mamoe ki loto he hana a fakapotopotoaga tupu lahi, mo e hana a fakamonuinaaga ke he fakaaogaaga iloilo he tau mena fakaalofa ke he gahua fakamatala he Kautu e kitia maali e hana a fiafia mai he lagi. (Isaia 60:8, 22) Ne mauokafua a tautolu to matutaki tumau a ia ke omoi e tau loto he tau tagata foaki mo e fakamakai.
15. Ko e ha e mekasini nei ne fa mahani he falu a magaaho ke fai talahauaga ke he tau fakaalofa?
15 Ne fa mahani e Kaufakalatahaaga ke fakaaoga e taha vala he senolo nei ke fakamanatu e tau tagata totou ke he ha lautolu a fakamonuinaaga ke foaki mai he loto e tau mena fakaalofa ma e gahua he lalolagi katoa ko e fakamatala he Kautu. Nakai ko e kaiole a nei, ka ko e fakamanatu ki a lautolu ke lagomatai e “feua tapu he tala mitaki he Atua” ne fae fakamonuina he Atua a lautolu. (Roma 15:16, NW; 3 Ioane 2) Ne fakaaoga oti he Kaufakalatahaaga e tau tupe ne foaki fakaalofa ke he puhala ne nakai moumou ke fakapuloa aki e higoa a Iehova mo e Kautu. Ne talia fiafia e tau foaki mena fakaalofa oti, ti fakailoa atu e fakaaue, mo e fakaaoga ke folafola aki e tala mitaki he Kautu he Atua. Tuga a nei, ko e tau puhala ia ke mau aki e tau gahua fakamisionare ke he loga e tau motu, mo e tau mena gahua taute tohi ne aoga lahi ke tufa aki e lotomatala he Tohi Tapu ke leveki ke mau mo e fakalahi atu foki. Ko e taha mena foki, ko e tau mena foaki fakaalofa ma e gahua he lalolagi katoa ne fakaaoga ke lata mo e mena totogi ne fae toli hake ki luga he tauteaga he tau Tohi Tapu mo e tau tohi fakaako Tohi Tapu tuga foki mo e tau kasete fanogonogo mo e tau kasete kitekite vitio. Ko e tau puhala nei ne fae fakalaulahi aki e gahua he Kautu ha ko e tau tagata foaki mo e fakamakai.
Nakai ha ko e Ole Fakafi
16. Pete ne tokofiha e Tau Fakamoli a Iehova ne maukoloa, ko e ha ne fakaaue ai ke he ha lautolu a tau fakaalofa?
16 Ne tokogahoa e Tau Fakamoli a Iehova ne maukoloa. Pete ne fai mena tote ne foaki ke fakalaulahi aki e tau gahua he Kautu, ko e ha lautolu a tau mena foaki fakaalofa kua mailoga lahi ai. Ke he magaaho ne kitia e Iesu e fifine takape ne liti ua e tupe ikiiki ne nakai ha ha i ai ha aoga lahi, ki loto he puha ne toka ai e tau tupe he faituga, ti pehe ai a ia: “Ko e tau mena he fifine takape nofogati na kua tolo ki ai, kua mua ia ke he tau mena ha lautolu oti. Ha ko e mena tolo e lautolu oti e falu a mena mai he tau mena loga ha lautolu ke he tau poa he Atua; ka ko ia kua nofogati kua tolo e ia ki ai hana tau mena oti ne moui ai a ia.” (Luka 21:1-4) Pete ni he tote hana a mena fakaalofa, ka ko ia ko e tagata foaki mena mo e fakamakai—ti fakaaue ia ke he hana a fakaalofa.
17, 18. Ko e heigoa e kakano he tau kupu ha Paulo he 2 Korinito 9:7, ti ko e heigoa ne fakakite mai he kupu Heleni ne fakaaoga ko e “fakamakai”?
17 Hagaao ia ke he gahua foaki mena fakaalofa ke lata mo e tau Kerisiano Iutaia, ne pehe a Paulo: “Kia takitokotaha . . . aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.” (2 Korinito 9:7) Liga liu e aposetolo fatiaki mai taha vala he Fakatai 22:8 ke he liliuaga Septuagint ne pehe: “Ne fakamonuina he Atua e tagata foaki mena mo e fakamakai; mo e to foaki e tau mena ne ku ai hana a tau gahua.” (The Septuagint Bible, fakaliliu ai e Charles Thomson) Hukui e Paulo e “fakamonuina” mo e “tau fakaalofa,” ha ko e mena ha ha i ai e matutakiaga, ko e heleheleaga he fakamonuinaaga ko e moua mai he fakaalofa he Atua.
18 Ko e tagata foaki mo e fakamakai ne fiafia moli ke foaki. Ko e kupu “fakamakai” mai he kupu Heleni he 2 Korinito 9:7 ne moua mai e kupu “fakakatakata”! Mole he fakakite mai e mena nei, ne pehe e lotomatala ko R. C. H. Lenski: “Ne fakaalofa e Atua ke he tagata foaki mo e nakai fai tupetupe, olioli mo e fiafia . . . ko e tua [hana] kua fakafoufou aki e tau mamali ke he falu a magaaho kua lata ke foaki atu foki a ia.” Ko e tagata mo e aga fiafia pihia ne nakai maeke ke foaki mo e momoko po ke foaki he ole fakafi ka ko e foaki mo e loto katoa. Foaki fakamakai pihia nakai a koe ke lagomatai aki e tau gahua he Kautu?
19. Foaki fefe e tau mena fakaalofa he tau Kerisiano fakamua?
19 Ko e tau Kerisiano fakamua ne nakai uta viko e kapiniu po ke foaki e mena ke hogofuluaki mai he ha lautolu a tau totogi ke lata mo e tau gahua fakalotu. Ko e foaki noa ha lautolu a tau mena fakaalofa. Ko Tertullian ne liliuina mo Kerisiano ke he liga 190 V.N., ne tohi pehe: “Pete ne ha ha ia mautolu e puha tupe, ne nakai ko e tau tupe totogi aki e fakamouiaga ke fai totogi e lotu. He aho taha he mahina [taki laga taha he mahina], ka manako a ia ki ai, takitaha mo e tuku e tau mena fakaalofa ikiiki; ka e mai ni he loto fiafia hana, mo e mai foki ni ka maeke ia ia; ha ko e mena nakai fai fakaohooho; ka ko e fiafia ni he tagata.”—Apology, Veveheaga XXXIX.
20, 21. (a) Fefe e talahauaga fakamua he mekasini nei hagaao ke he fakamonuinaaga he lagomatai tupe e gahua he Atua, ti gahua fefe e mena nei ke he vaha nei? (e) Ko e heigoa e mena ka tupu ka fakalilifu e tautolu a Iehova aki e tau koloa uho ha tautolu?
20 Ko e foaki mai he fifiliaga fiafia he tagata ne fa mahani mau e tau fekafekau a Iehova he vaha nei. Ke he falu a magaaho, ko e nakai la gahuahua katoa e lautolu e fakamonuina ke lagomatai e gahua he Atua ke foaki e tau mena fakaalofa. Ia Fepuari 1883, tuga a nei, ne pehe e mekasini nei: “Ha ne fa e fua lahi he falu e kavega tupe ma e falu ti kua tolomuli ki tua e malolo ha lautolu ke foaki e tau tupe lagomatai ha kua mamafa e gahua mo e mategugu, ti kua lolelole ha lautolu a aoga; ka e nakai ni pihia, ka ko lautolu . . . ne nakai maama e mena nei, kua nakai fai magaaho a lautolu ke moua e tau fakamonuinaaga kakano he nakai fakamokoi ha lautolu a tau foaki tupe fakaalofa.”
21 Ha ne fa e tafe mai e tokologa he moto tagata tokologa ke he fakapotopotoaga he Atua he vaha nei, mo e tupu e gahua he Atua ke he fahi uta i Europa mo e falu a motu foki ne pa fakamua, ne lahi mahaki e manako ke fakalaulahi ki mua e tau fale lomi tohi mo e falu a tau gahua foki. Loga atu foki e tau Tohi Tapu mo e falu tohi foki kua lata ke lolomi. Loga e tau gahua he pule he Atua ha ne fa e taute; ka e taha e mena, to mafiti e falu ke mau ka ne mai lahi e tupe. Ko e moli, ha ha ia tautolu e tua to foaki he Atua e tau mena ia ne manako ki ai, ti iloa foki e tautolu ko lautolu ne ‘fakalilifu a Iehova aki ha lautolu a tau koloa uho’ to fakamonuina. (Fakatai 3:9, 10) Ko e moli, “ka ko ia kua fakalahi hana saito kua gana, to fakalahi foki hana helehele mai.” Kua maeke ia Iehova ke ‘fakakoloa a tautolu ke he tau fakamokoi oti,’ mo e foaki fakamakai ha tautolu ke maeke he tokologa ke fakaaue mo e fakaheke ki a ia.—2 Korinito 9:6-14.
Fakakite Hau a Fakaaue ke he Tau Mena Foaki Noa he Atua
22, 23. (a) Ko e heigoa e mena foaki noa he Atua ne nakai maeke ke fakamaama? (e) Ha kua fakaaue a tautolu ke he tau mena fakaalofa he Atua, ko e heigoa ha tautolu kua lata ke taute?
22 Omoi he fakaaue lahi mahaki, ne pehe a Paulo: “Fakaaue ke he Atua he hana mena kua foaki noa nakai maeke ke fakamaama.” (2 Korinito 9:15) Ha ko e “lukutoto” a ia ma e tau hala he tau Kerisiano fakauku mo lautolu foki he lalolagi, ko Iesu e matapatu mo e puhala ma e fakaalofa noa a Iehova ne nakai maeke ke fakamaama. (1 Ioane 2:1, 2) Ko e mena fakaalofa ia ko e “fakaalofa noa he Atua kua fakalahi” ne fakakite e ia ke he hana a tau tagata he lalolagi, puhala mai ia Iesu Keriso, ti lahi mahaki mo fakamouiaga ha lautolu mo e lilifu mo e fakahekeaga he Atua.—2 Korinito 9:14.
23 Fina atu e fakaaue lahi mahaki ha tautolu ki a Iehova ma e hana a fakaalofa noa ne nakai maeke ke fakamaama mo e loga atu foki e tau fakaalofa fakaagaga mo e tau koloa he tino ma e hana a tau tagata. Ne mitaki he ha tautolu a Matua he lagi kua homo ue atu ti kua mua ue atu mai he malolo he tau tagata ke fakailoa! Mo e moli ni e lata he mena ia ke omoi a tautolu ke foaki mo e fakamakai! Mo e fakaaue mai he loto fiafia, ti o mai a tautolu ke gahua fakamakamaka ke fakalaulahi atu ki mua e gahua he ha tautolu a Atua fakamokoi, ko Iehova, ko ia ne Foaki fakamakai fakamua mai mo e i mua he tau mena oti!
Manatu Nakai e Koe?
◻ Ne fakalagalaga he tau loto fiafia e tau tagata a Iehova ke taute e heigoa?
◻ Ko e heigoa ne fakaohooho ke foaki mo e fakamakai?
◻ Fakaaoga fefe he Kaufakalatahaaga Kolo Toko e tau tupe foaki fakaalofa ne moua e ia?
◻ Ko e tagata foaki mena fakaalofa fefe ne fakaalofa e Atua ki ai, mo e fakakite fefe e fakaaue ha tautolu ke he Hana a tau mena foaki noa loga?
[Fakatino he lau 15]
Ke he magaaho ne talaga ai e faituga, ne gahua fakamakamaka lahi e tau Isaraela mo e foaki fakamokoi e tau mena fakaalofa ki a Iehova
[Fakatino he lau 18]
Ko e tau mena foaki fakaalofa tuga he fifine takape ne lahi e fakaaue ki ai mo e mailoga lahi ki ai