Hūhū he Tau Tagata Totou ha Tautolu

Lata ke Lahi Fēfē e Mena ka Tuku e Au?

“Fakaalofa e Atua kia ia kua foaki mo e fakamakai.” (2 Korinito 9:7) Mahuiga e talahauaga ia ke he tau tagata tokologa ue atu he lalolagi katoa. Pete ia, ko e falu tagata ō tapu ne liga logona e lata ke tuku e tupe lahi. Ko e falu lotu ne poaki ke he tau tagata ha lautolu ke tuku e tupe kotofa pauaki. Ko e foakiaga ia kua fakahigoa ko e foaki he mena ke hogofuluaki, ko e 10 e pasene he totogi ne foaki he tagata ke he lotu.

Kua poaki mooli kia he Tohi Tapu ke tuku e tautolu e tupe kotofa pauaki? Ke he tagata ni, lata ke lahi fēfē e mena ka tuku e au?

Tau Poakiaga mo e Tau Tupe Foaki Noa i Tuai

Ne fakakite he Tohi Tapu e tau fakaakoaga maaliali ke he motu ko Isaraela hagaao ke he lahi he mena ka foaki. (Levitika 27:30-32; Numera 18:21, 24; Teutaronome 12:4-7, 11, 17, 18; 14:22-27) Ko e tau foakiaga nei ne nakai lata ke lalahi mamahaki. Ne mavehe e Iehova ha ko e omaoma ke he tau fakatufono haana, to taute e ia e motu ke ‘fakalahi e tau mena mitaki.’—Teutaronome 28:1, 2, 11, 12.

Ke he falu tuaga foki, maeke he tau Isaraela ke foaki noa e lahi po ke tote he mena ne finagalo a lautolu ki ai. Ma e fakatai, ne fakatokatoka he Patuiki ko Tavita ke talaga e faituga ma Iehova, ne maeke he tau tagata haana ke foaki “lima e afe taleni auro.”a (1 Nofoaga he Tau Patuiki 29:7) Fakatatai e mena nei mo e mena ne kitia e Iesu he mogo ne nofo a ia he lalolagi. Ne kitia e ia “e taha fifine takape kua nofogati, kua tolo . . . ua e tupe ikiiki” ke he mena ne toka ai e tau tupe he faituga. Fiha e lahi he mena ne tuku e ia? Kavi ke he 1.5 e pasene he totogi he aho. Ka e pehē a Iesu kua talia e lautolu e tupe tote nei.—Luka 21:1-4.

Kua Lata Kia he Tau Kerisiano ke Tuku e Tupe Kotofa Pauaki?

Ko e tau Kerisiano ne nakai ha ha i lalo he maveheaga he Fakatufono ne age ki a Isaraela. Ti kua nakai lata a lautolu ke age e tupe kotofa pauaki ke he Atua. Ka e i loto he fakapotopotoaga Kerisiano mooli ko e foaki atu ko e punaaga he olioli lahi. Ne talahau ai e Iesu Keriso: “Kua mua e [fiafia] hana ke foaki atu, ke he [fiafia] hana ke talia mai.”—Gahua 20:35.

Ne lalago he Tau Fakamooli a Iehova e gahua fakamatala ha lautolu he lalolagi katoa ha ko e tau tupe foaki noa. Ko e tau tupe nei ne tuku kua fakaaoga ke lomi aki e tau tohi tuga e tau mekasini hane totou e koe, mo e talaga mo e leveki aki e tau matakavi he tapuakiaga ne iloa ko e Tau Fale he Kautu. Nakai fai fakatokaaga oko tupe ne fakaaoga mo totogi. Falu ne foaki noa e tau magaaho ha lautolu ke he gahua taute tutaki ne moua e lagomataiaga tote ke lata mo e totogi he tau fakamoleaga he tau puhala ō fenoga ha lautolu mo e falu he tau mena fakatagata. Ka e nakai fai tagata ne poaki ke moua e lagomatai fakatupe pihia. Laulahi he tokologa he Tau Fakamoli a Iehova ne nakai moua ha lalagoaga fakatupe ke lagomatai aki e gahua fakamatala ha lautolu. Ka e laulahi ne gahua tupe ke leveki aki a lautolu, tuga ne taute e Paulo he magaaho ne gahua a ia ke talaga fale ie.—2 Korinito 11:9; 1 Tesalonia 2:9.

Ka manako e tagata ke foaki mena fakaalofa ke he gahua ne taute he Tau Fakamoli a Iehova, kua lata ke lahi fēfē e mena ka tuku e ia? Ne tohi he aposetolo ko Paulo: “Kia takitokotaha mo e foaki tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.”—2 Korinito 8:12; 9:7.

[Matahui Tala]