Fakakite e Loto Fakaaue ke he Fakamokoi ha Iehova

KO E Atua fakamokoi a Iehova. (Iakopo 1:17) Maeke a tautolu ke kitia e mahani fakamokoi haana ke he tau mena oti kana ne tufugatia e ia. Fakapuke e ia e lagi mo e lalolagi katoatoa aki e tau fetū, ti ufitia e kelekele aki e tau akau fulufuluola.—Salamo 65:12, 13; 147:7, 8; 148:3, 4.

Ne loto fakaaue lahi a ia ne tohia e Salamo 104 ke he tau mena oti kana ne tufugatia e Iehova, ti tohi e ia e lologo ke fakaheke aki a Ia. Ka totou ai e koe, loto fakaaue nakai a koe ke tuga e salamo? Pehē a ia: “To lologo atu au kia Iehova ke he haku a mouiaga nai; to uhu lologo au ke he haku Atua ka kua moui au.” (Salamo 104:33) Manako nakai a koe ke taute pihia foki?

FAKAFIFITAKIAGA MUA UE ATU HE MAHANI FAKAMOKOI

Kua manako a Iehova ke fifitaki e tautolu e mahani fakamokoi haana. Ti foaki e ia ki a tautolu e tau kakano mitaki ke mahani fakamokoi. Ne omoomoi e ia e aposetolo ko Paulo ke tohi: “Kia tala age ke he tau maukoloa he mouiaga nai, aua neke fakatokoluga a lautolu, aua foki neke tua ke he koloa nakai tumau, ka ko e Atua moui kua foaki fakalahi mai e tau mena oti ke fiafia ai; Kia mahani mitaki atu a lautolu, kia maukoloa a lautolu ke he tau gahua mitaki, kia fakamokoi, mo e ta atu noa e lautolu ha lautolu a tau mena, Kia tauteute e lautolu e koloa ma lautolu ni ko e fakaveaga mitaki mo e tau aho ne tatali, kia toto atu e lautolu ke he moui tukulagi.”—1 Timoteo 6:17-19.

He tohi ha Paulo ke uaaki ke he tau Korinito, ne fakamaama e ia e puhala kua lata he tau fatuakiloto ha tautolu ka foaki atu a tautolu ke he falu. Ne pehē a ia: “Kia takitokotaha mo e foaki tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.” (2 Korinito 9:7) Ko hai ka lagomatai e tautolu ka mahani fakamokoi a tautolu? Ne talahau e Paulo kua lagomatai e tautolu e falu he foaki ki a lautolu e tau mena ne lata mo lautolu, ka e lagomatai foki ne tautolu a tautolu ha ko e mena to fakamonuina e Iehova a tautolu.—2 Korinito 9:11-14.

Hagaao mogoia a Paulo ke he fakamooliaga mua ue atu he mahani fakamokoi he Atua, he mogo ne pehē a ia: “Fakaaue ke he Atua he hana mena kua foaki noa nakai maeke ke fakamatala.” (2 Korinito 9:15) Ko e mena “foaki noa” ha Iehova kua putoia e tau mena mitaki oti ne foaki e Ia ki a tautolu puhala ia Iesu Keriso. Nakai fai kupu ke fakamaama e uho lahi he mena fakaalofa nei.

Maeke fēfē a tautolu ke fakakite kua loto fakaaue a tautolu ke he tau mena oti kua taute mo e ka taute e Iehova mo Iesu ma tautolu? Taha puhala ko e fakakite e mahani fakamokoi ka foaki ha tautolu a magaaho, malolō, mo e tau koloa fakatino ke tapuaki a Iehova mo e lagomatai e falu ke fakaako hagaao ki a Ia. Maeke a tautolu ke taute e mena nei ka loga po ke nakai loga e koloa ha tautolu.—1 Nofoaga he Tau Patuiki 22:14; 29:3-5; Luka 21:1-4.

Tau Puhala Kua Fifili E Falu Ke Foaki Mena Fakaalofa Ke He Gahua He Lalolagi Katoa

Tuga e tau Kerisiano he senetenari fakamua, tokologa he vahā nei ne toka kehe e taha tupe ke lata ma e gahua he lalolagi katoa ti tuku ai he puha mena fakaalofa he fakapotopotoaga ha lautolu. (1 Korinito 16:2) He tau mahina takitaha, ne ta atu he tau fakapotopotoaga e tau tupe nei ke he ofisa he Tau Fakamoli a Iehova ne leveki e motu ha lautolu. Kua maeke foki a koe ke fakafano atu fakahako e tau mena fakaalofa ke he matakau ne kua fakatū matafakatufono ne fakaaoga he Tau Fakamoli a Iehova he motu ha mutolu. Ke iloa e matahigoa he fakatokatokaaga ia, fakamolemole fano ke he www.pr418.com mo e matutaki atu ke he la ofisa he Tau Fakamoli a Iehova. Ko e tau mena fakaalofa kua maeke a koe ke fakafano fakahako atu hanei:

TAU MENA FAKAALOFA PAUAKI

Foaki e tau tupe, tau koloa fakamanaia (jewelry), po ke falu koloa uho he tagata.
Tuku e tohi i ai ke fakakite ko e tupe po ke tau koloa ko e tau mena fakaalofa pauaki.

FAKAHOLOAGA FOAKI MENA FAKAALOFA

Maeke ke foaki e tupe ke he taha fakaholoaga pauaki, ka manako e tagata ne foaki e tupe, to fai tauteaga ke foaki ai. Ma e falu fakailoaaga, fakamolemole matutaki ke he Treasurer’s Office he tohi atu ke he kaina ne fakakite i lalo.

FAKATOKATOKA KE FOAKI

Lafi ke he tau mena fakaalofa ko e tau tupe mo e tau foakiaga mena fakaalofa, kua ha ha i ai e falu puhala foaki ke aoga ai e gahua he Kautu he lalolagi katoa. Kua tohi e tau puhala nei i lalo. Ko e ha puhala ni ka manako a koe ke foaki, fakamolemole matutaki atu fakamua ke he la ofisa ne leveki e motu haau ke iloa e tau puhala kua fakaaoga. Ha kua kehekehe e tau matafakatufono mo e tau fakatufono tukuhau, kua aoga ke tutala fakamua ke he tau tagata fifili pauaki ke he faahi tukuhau mo e fakatonutonu matafakatufono to fifili e puhala mitaki ke foaki.

Inisua: Ko e mena fakaalofa ne foaki ka tohi fakatonu e matakau ne fakaaoga he Tau Fakamoli a Iehova ke moua (beneficiary) e fakavēaga inisua he moui po ke fakatokaaga tupe ka litaea po ke fuakau.

Stocks mo e Bonds: Ko e stocks mo e bonds kua foaki ke he matakau kua fakaaoga he Tau Fakamoli a Iehova, ko e mena fakaalofa pauaki po ke maveheaga he hiki ke he mate.

Tau Fale mo e Tau Fonua: Ko e fale mo e fonua kua maeke ke fakafua kua foaki fakaalofa ke he matakau ne fakaaoga he Tau Fakamoli a Iehova, ko e mena fakaalofa pauaki po ke tau kaina nonofo, he fakamau hifo e kaina ke he tagata ne foaki, ti matutaki ke nofo he fale he moui katoa haana.

Wills mo e Trusts: Ko e koloa po ke tupe ka toka hifo ke he matakau ne fakaaoga he Tau Fakamoli a Iehova puhala he fakamauaga (will) ne tohia matafakatufono po ke tohi hifo e higoa he matakau ka moua e totogi ke lata mo e maveheaga ne taute mo e trust.

Ma e falu vala tala foki, maeke ia koe ke matutaki ke he Watchtower Bible and Tract Society of Australia, he tohi po ke vilo atu ke he la ofisa ne leveki e motu haau.