Fakamonuina Lahi e Iehova e Aga Makai
KUA fakalilifu he Tufuga ha tautolu e tau tagata he foaki e mena fakaalofa ko e atāina ke fifili. Lafi ki ai, fakamonuina lahi e ia a lautolu ne fakaaoga fakamakai e atāina ha lautolu ke fakalaulahi e tapuakiaga mooli mo e taute e vala ha lautolu ke fakatapu e higoa tapu Haana mo e lalago e finagalo homo ue atu Haana. Nakai manako a Iehova ke he omaoma teao ne fakaohooho he tau fakamatakutaku mo e peehi malolō. Ka e uho lahi mahaki ki a ia e fakamooliaga fakamakai ne omoomoi he fakaalofa mooli mo e loto fakaaue hokulo.
Ma e fakatai, he mogo ne haia e tau Isaraela he tutakale ko Sinai, ne poaki a Iehova ki a lautolu ke talaga e matakavi he tapuakiaga. Pehē a ia: “Kia eke a e mutolu e poa kia Iehova, takitaha e tagata mo e mena kua makai ki ai ke he hana loto kia ta mai e ia e poa kia Iehova.” (Esoto 35:5) Igatia e Isaraela mo e foaki e mena fakaalofa foaki noa kua fahia a ia—pete ni ko e heigoa po ke fiha—ne maeke ke fakaaoga he puhala tonu ke taute aki e finagalo faka-Atua. Ko e heigoa e fua?
“Ko lautolu oti kua omoi ki ai ha lalu tau loto,” mo “lautolu oti kua makai ki ai ha lalu tau loto,” ne taute e tau poa foaki noa, “ko lautolu oti ni kua makai ki ai ha lautolu a tau loto.” Ne tamai fakamakai he tau tagata taane mo e tau fifine e taha mena ke lata ma e gahua ha Iehova: tau fakamau, tau mena tau teliga, tau mama, auro, ario, apa kula, filo lanu, kula uhi mo e kula momoho, ie lino, tau fulu koti, tau kili mamoe taane kua vali kula, tau kili takesa, akau sitima, tau maka soama, mena manogi, mo e lolo. Fakahiku ai, “ko e tau mena kua eke, kua lata ia mo e gahua oti ke eke aki, ti toe ni.”—Esoto 35:21-24, 27-29; 36:7.
Ko e mena ne mua atu e fiafia ha Iehova ne nakai ko e tau poa fakatino ka ko e aga makai ha lautolu ne lalago e tapuakiaga meā. Ne fakalagalaga foki a lautolu ke foaki ha lautolu a tau magaaho mo e tau gahua. “Ko e tau fifine oti foki kua iloilo, kua filo e lautolu ke he tau lima ha lautolu,” ne talahau he tala. Mooli ai, “ko e tau fifine oti foki kua omoi ai he tau loto ha lautolu mo e iloilo, kua filo e lautolu e tau fulu koti.” Lafi ki ai, ne tuku age e Iehova ki a Pesaleli e “iloilo mo e pulotu, mo e maama, ke eke ai e tau gahua oti kana.” Ti fakapuke he Atua a Pesaleli mo Aliavu aki e iloilo kua lata ke taute aki e tau gahua oti ne poaki ki ai.—Esoto 35:25, 26, 30-35.
He mogo ne uiina e Iehova e tau Isaraela ke foaki e tau mena fakaalofa, ne mauokafua katoatoa a ia kua “takitaha e tagata mo e mena kua makai ki ai ke he hana loto” ke lalago e tapuakiaga mooli. Fakahiku, ne fakamonuina fakalahi e ia a lautolu ne aga makai aki e takitakiaga mo e olioli lahi mahaki. Fakakite e Iehova he mogo ka fakamonuina e ia e aga makai he tau fekafekau haana, to mauokafua a ia to nakai nonofogati po ke iloilo ke fakamooli aki e finagalo haana. (Sala. 34:9) He fekafekau fakamakai a koe ki a Iehova, to fakamonuina mooli e ia e aga fakamakai haau.