Foaki Fakamakai Mai he Loto
KE HE puhala foaki atu, ne tohi he aposetolo ko Paulo: “Kia takitokotaha mo e foaki tuga e fifili ke he hana loto,” ti lafi e ia: “Aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.” (2 Kori. 9:7) Nakai fakaohooho e Iehova ha tagata ke lalago e tapuakiaga meā. Kua fakaatā e ia e tau fekafekau haana ke fakakite ha lautolu a fakamooli he puhala he foaki noa mo e fakamakai ha lautolu. Tali mai he fakamauaga tuai, ne talia fiafia he tau tagata haana. Fakatutala la ke he tolu e fakafifitakiaga.
He mole e takitaki e Iehova e tau Isaraela mai i Aikupito, ne poaki e ia ke talaga e lautolu e faituga uta fano. Kua manako lahi ma e tau koloa, ti uiina ke he tau tagata ha Isaraela ke foaki ai. He tali atu, ne tamai e “lautolu oti kua omoi ki ai ha lalu tau loto” e tau auro mo e ario, tau koloa fakamanaia, mo e falu a koloa. Ne lahi mahaki e fakamokoi he tau tagata ati ogo atu ki a lautolu ke nakai liu tamai ha koloa.—Esoto 35:5, 21; 36:6, 7.
Magaaho ne talaga e faituga he tau senetenari fakamui, ne liliu e tau tagata he Atua ke moua e magaaho ke fakakite e lalago ha lautolu ma e tapuakiaga meā. Ne lahi mahaki e foakiaga fakatagata he Patuiki ko Tavita ke he matagahua, mo e uiina ke he falu ke kauauloa ke foaki atu. Nukua foaki fakamakai a lautolu. Ti ko e tau auro mo e tau ario hokoia ne foaki kua molea e 100 piliona talā (US) ko e 157 e piliona talā he lahi he tupe mogonei! Ne fiafia lahi e tau tagata he foaki noa e lautolu e tau mena fakaalofa ki a Iehova.—1 Nofo. 29:3-9; 2 Nofo. 5:1.
Nukua fakakite foki he tau tutaki fakamua atu ha Iesu Keriso e aga fiafia he foaki atu. He aho he Penetekoso 33 V.N., ne kavi ke he 3,000 ne papatiso, ti tokologa ne nakai ko e tau tagata nonofo i Ierusalema. Ke maeke ia lautolu ne mativa ke nonofo hifo he maaga ke ako fakalahi hagaao ke he tua foou ha lautolu, ne fakaputu auloa ai e tau tupe ke he magaaho kū. Ne fakafua he tau matakainaga e tau fonua mo e tau koloa ti ta atu e tau tupe ke he tau aposetolo ke lagomatai aki a lautolu ne nofogati. Ati fiafia mooli a Iehova ke kitia e tua mo e fakaalofa pihia!—Gahua 2:41-47.
Kua matutaki agaia e tau Kerisiano he vahā nei ke lalago e tapuakiaga meā he fakamokoi mo e foaki fakamakai e tau magaaho, tau malolō, mo e tau tupe ha lautolu. Haia he puha he vala nei e falu puhala kua maeke ia koe ke taute pihia.
[Puha he lau 18, 19]
TAU PUHALA KUA FIFILI E FALU KE FOAKI
TAU MENA FAKAALOFA KE HE GAHUA HE LALOLAGI KATOA
Tokologa ne tuku kehe, po ke fatifati e lahi he tupe ka tuku e lautolu he tau puha tuku mena fakaalofa ne leipolo “Tau Mena Fakaalofa ma e Gahua he Lalolagi Katoa—Mataio 24:14.”
He tau mahina takitaha, ne ta atu he tau fakapotopotoaga e tau tupe nei ke he la ofisa he Tau Fakamoli a Iehova ne leveki e tau motu ha lautolu. Ko e tau fakatokaaga tupe foaki noa kua maeke foki ke ta atu fakahako ke he Treasurer’s Office, Watchtower Bible and Tract Society of New Zealand, PO Box 75142, Manurewa, Manukau 2243, po ke la ofisa he Tau Fakamoli a Iehova ne leveki e motu ha mutolu. Ko e tau koloa fakamanaia (jewelry) po ke falu koloa uho kua maeke ke foaki foki. Ko e tohi kū kua talahau ko e mena fakaalofa katoa ia kua lata ke tuku fakalataha mo e tau foakiaga nei.
FAKAHOLOAGA FOAKI FAKAALOFA NOA
Kua foaki e tupe puhala he fakaholoaga pauaki, kaeke ke fai manako lagomatai e tagata ne foaki ai, maeke ke manamanatu ke he tuaga fakatupe haana. Ma e falu vala tala foki, fakamolemole matutaki ke he Treasurer’s Office he tohi atu ke he kaina ne tū i luga.
PULEGA KE FOAKI
Lafi ke he tau mena fakaalofa katoa he tau tupe mo e tau tupe foaki fakaalofa noa (charitable), fai puhala foki ke foaki ke lagomatai e gahua he Kautu he lalolagi katoa. Putoia he tau mena nei:
Inisua: Maeke e Watchtower Society ke fakahigoa ko e beneficiary he fakatokaaga inisua he moui po ke pulega ma e tupe fuakau.
Stocks mo e Bonds: Kua maeke e stocks mo e bonds ke foaki ke he Watchtower Society ko e mena fakaalofa katoa.
Real Estate: Maeke he vala kaina ne mukamuka ke fakafua, he foaki e tau mena fakaalofa katoa tuga e kaina nofo po ke, he fakamau hifo e koloa ke he tagata ne foaki, ko ia ka matutaki ke nofo i ai he moui katoa haana. Matutaki ke he la ofisa he motu haau ato taute ha maveheaga ma e real estate.
Wills mo e Trusts: Maeke e koloa po ke tupe ke foaki ke he Watchtower Society he puhala he fakamauaga (will) ne tohia matafakatufono, po ke fakahigoa e Watchtower Society ko e beneficiary he fakamooliaga he trust.