Fiafia Nakai a Koe he Foaki Mena Fakaalofa?
KO E tau Kerisiano fakamua atu i Filipi kua talahaua ha ko e ha lautolu a lalago fakamokoi ke he tapuakiaga mooli. He tohi omoomoi haana ki a lautolu, ne tohi he aposetolo ko Paulo: “Kua fakaaue atu au ke he Atua haku, ke he haku a tau manatu oti kia mutolu. Nakai noa haku a ole mo e fiafia ha ko mutolu oti kana ke he haku a tau liogi oti. Ha ko e ha mutolu a fakafetui fakalataha ke he tau mena he vagahau mitaki, tali mai he aho fakamua, kua hoko mai ke he vaha nai.” (Filipi 1:3-5) Ne manatu mitaki e Paulo e mogo ne papatiso a Litia mo e magafaoa haana ti tala age fakamokoi a Litia ke nonofo a Paulo mo e haana tau hoa fakamatala he kaina haana.—Gahua 16:14, 15.
Nakai leva he mole, ko e fakapotopotoaga fakatū foou i Filipi ne fakafano lagaua e tau koloa ki a Paulo he tau faahi tapu ne nofo a ia mo e tau matakainaga talitonu i Tesalonia, teitei ke 160 e kilomita he mamao. (Filipi 4:15, 16) He falu tau gahoa kua mole, mogo ne lauia e tau matakainaga Filipi mo e falu i Maketonia he matematekelea mo e “nonofogati lahi,” ne logona e lautolu e manako lagomatai he tau Kerisiano ne favale ki ai i Ierusalema ti loto ke lagomatai a lautolu. Ne talahau e Paulo ko e mena nei “kua mua foki ke he tau mena ha lautolu.” Ka e tohi e ia: ‘Kua ole mai mo e fakamakamaka kia mautolu, kia talia ai e mena fakaalofa.’—2 Kori. 8:1-4; Roma 15:26.
Kavi ke he hogofulu e tau he mole e talia fakamua he tau Filipi e lotu faka-Kerisiano, kua fakakite agaia e lautolu e aga fakamokoi ia. He logona kua tuku a Paulo he fale puipui i Roma, ne fakafano e lautolu a Epaferoti ke he 1,287 e kilomita, ki luga he kelekele mo e tahi, ke uta e tau koloa ke he aposetolo. Maaliali ai, kua manako e tau Filipi ke foaki atu ki a Paulo ke maeke ia ia ke fakamalolō tumau e tau matakainaga mo e fakamatala, he mogo ne nofo foki a ia he fale puipui.—Filipi 1:12-14; 2:25-30; 4:18.
He vahā nei, kua mailoga he tau Kerisiano mooli ko e kotofaaga lilifu ke lalago e gahua fakamatala he Kautu mo e taute tutaki. (Mata. 28:19, 20) Kua fakatupu ki mua e lautolu e tau mena he Kautu he foaki e magaaho, malolō, mo e tau tupe. Ko e puha ne mui mai kua foaki falu puhala ke maeke ia koe ke fai vala he lalago e matagahua nei ne foaki he Atua.
[Puha he lau 22, 23]
TAU PUHALA KUA FIFILI E FALU KE FOAKI
TAU MENA FAKAALOFA KE HE GAHUA HE LALOLAGI KATOA
Tokologa ne tuku kehe, po ke fatifati e tupe ka tuku e lautolu he tau puha tuku mena fakaalofa ne leipolo “Gahua he Lalolagi Katoa.”
He tau mahina takitaha, ne ta atu he tau fakapotopotoaga e tau tupe nei ke he la ofisa he Tau Fakamoli a Iehova ne leveki e tau motu ha lautolu. Ko e tau fakatokaaga tupe foaki noa kua maeke foki ke ta atu fakahako ke he Watch Tower Bible and Tract Society of New Zealand, PO Box 75142, Manurewa, Auckland 2243, po ke la ofisa he Tau Fakamoli a Iehova ne leveki e motu ha mutolu. Ko e tau tieke ne fakafano atu ke he kaina ne tū i luga kua lata ke tohi ke totogi ke he “Watch Tower.” Tau koloa fakamanaia (jewelry) po ke falu koloa uho ka foaki foki. Ko e tohi kū kua talahau ko e tau mena fakaalofa katoa ia kua lata ke tuku fakalataha mo e tau foakiaga nei.
FAKATOKAAGA TUPE FOAKI NOA PO KE FOAKI TUPE NAKAI FAI MUKA
Maeke e tupe ke tuku he trust ke fakaaoga i Niu Silani po ke lalolagi katoa. Ka manako a ia ne foaki, kua maeke e tau tupe nei ke liuaki age ka ole. Ma e falu vala tala foki, fakamolemole matutaki ke he Treasurer’s Office he tohi atu ke he kaina ne tū i luga.
PULEGA KE FOAKI
Lafi ke he tau mena fakaalofa katoa he tau tupe, fai puhala foki ke foaki ke lagomatai e gahua he Kautu he lalolagi katoa. Putoia ki ai:
Inisua: Maeke e Watch Tower Bible and Tract Society of New Zealand ke fakahigoa ko e beneficiary he fakatokaaga inisua he moui po ke pulega ma e tupe litaea/fuakau.
Stocks mo e Bonds: Kua maeke e stocks mo e bonds ke foaki ke he Watch Tower Society ko e mena fakaalofa katoa.
Real Estate: Maeke e real estate ne mukamuka ke fakafua he foaki ko e mena fakaalofa katoa po ke, kaeke ko e kaina nofo, he fakamau hifo e vala kaina ke he tagata ne foaki, ka matutaki ke nofo i ai he moui katoa haana. Matutaki ke he la ofisa he motu ha mutolu ato taute ha maveheaga ma e real estate.
Wills mo e Trusts: Maeke e koloa po ke tupe ke foaki ke he Watch Tower Bible and Tract Society of New Zealand puhala he fakamauaga (will) ne tohia matafakatufono, po ke liga fakahigoa e Watch Tower Society ko e beneficiary he fakamooliaga he trust. Ko e trust ne lagomatai ke he matakau fakalotu kua liga fai aoga ke he falu puhala tukuhau.
Ma e falu vala tala foki, maeke ia mutolu ke matutaki ke he Treasurer’s Office, he tohi po ke hea telefoni atu ke he kaina ne tū i luga, po ke la ofisa ne leveki e motu ha mutolu.