‘Tamai e Tautolu e Poa ki a Iehova’
KA FAI tagata ne taute taha mena mitaki ma haau, fakakite fēfē e koe e loto fakaaue haau? Manamanatu ke he puhala ne fakakite he tau takitaki kau i Isaraela e loto fakaaue ha lautolu he mole e tau atu ke he tau Mitiana. Ne hoko e tauaga he mole e agahala ha Isaraela ha ko Paala-peoro. Ne foaki he Atua ke he tau tagata haana e kautū, ti vehevehe ai e tau mena ne fofō ke he 12,000 e kautau mo Isaraela katoa. Fakatatau ke he poakiaga ha Iehova, ne age he tau kautau e vala he tufaaga ha lautolu ke he tau ekepoa, mo e age he tau Isaraela ne toe e vala pihia foki ke he tau Levi.—Nume. 31:1-5, 25-30.
Ka kua manako e tau takitaki kau ke taute falu mena foki. “Kua totou tuai hau a tau fekafekau ko lautolu kua lata ke totou he tau tagata ne o atu mo mautolu ke he tau; kua nakai galo foki ha tagata taha ia mautolu,” he tala age e lautolu ki a Mose. Ne fifili a lautolu ke foaki e tau auro mo e tau koloa kehekehe mo tau poa ha Iehova. Ko e katoatoa he mamafa he tau koloa ke he auro ne molea e 500 e pauna (190 e kilokuleme).—Nume. 31:49-54.
He vahā nei kua tokologa e tagata ne omoomoi ke fakakite e loto fakaaue ha lautolu ma e tau mena ha Iehova ne taute ma lautolu. Mua atu, kua nakai fakakaupā e tau logonaaga pihia ke he tau fekafekau tukulele he Atua. Ma e fakatai, manamanatu ke he tagata fakaholo pasi ne uta mo e tamai e matakau he tau tagata ne o ke he mena ne fono ai he lalolagi katoa ne fakahoko i Bologna, Italia, he 2009. Ha ko e tagata fakaholo mitaki lahi mo e totonu, ne fifili a lautolu ne heke he pasi haana ke tohi fakaaue atu mo e age e mena fakaalofa tupe ki a ia fakalataha mo e tohi Ko e Heigoa ne Fakaako Moli he Tohi Tapu? Ne tali atu ai e tagata fakaholo pasi: “Talia fiafia e au e lautohi mo e tohi, ka e liuaki atu e tupe he manako au ke tuku ke he gahua fa e taute e mutolu. Pete he nakai ko e taha he Tau Fakamoli a Iehova au, manako au ke tuku e tupe nei ha kua kitia e au na omoomoi e tauteaga mena ha mutolu he fakaalofa.”
He omoomoi he loto fakaaue ke he tau mena kua taute e Iehova ma haau, taha puhala ke fakakite e loto fakaaue haau ko e foaki e tau mena fakaalofa ke he gahua he Tau Fakamoli a Iehova he lalolagi katoa. (Mata. 24:14) Ko e tau puhala kua fifili e falu ke foaki kua tohi ai he puha ne mui mai.