Ha Lautolu a Muhu Mena ke Lata mo e Nofogati
KO E tau 49 V.N. Ko Peteru, Iakopo, mo Ioane—“kua talahaua ko e tau pou”—ne age e matagahua ke he aposetolo ko Paulo mo e haana matakainaga gahua ko Panapa. Kua lata ia laua ke tokaloto e tau Kerisiano nonofogati he fakamatala a laua ke he tau motu. (Kala. 2:9, 10) Maeke fēfē e matagahua nei ke fakakatoatoa?
Fakakite he tau tohi ha Paulo e mataala haana ke he matagahua nei. Ma e fakatai, ke he tau Kerisiano i Korinito, ne tohi e ia: “Ko e tanakiaga he koloa ke uta ke he tau tagata fakatapu, tuga he poaki atu au ke he tau ekalesia i Kalatia, kia eke pihia foki a mutolu. Ko e aho fakamua he taha fahi tapu mo e taha fahi tapu, kia takitokotaha mo e tuku age ai hana mena, ke fakalata hana mena ke taute mo e monuina hana; neke eke e tau tanakiaga ke he vaha ka fina atu ai au. Ka fina atu au, ti fakafano atu ai e au mo e tau tohi a lautolu kua fifili e mutolu, ke uta ai ha mutolu a tau mena fakaalofa ki Ierusalema.”—1 Kori. 16:1-3.
He tohi omoomoi haana ke he tau Korinito, ne liu a Paulo fatiaki e kakano he tanakiaga. Kua kakano ai ke “eke fakatatai, kia lagomatai he muhu mena ha mutolu he vaha nai ke he ha lautolu a nonofogati.”—2 Kori. 8:12-15.
Magaaho ne tohi a Paulo ke he tau Kerisiano i Roma kavi he 56 V.N., ne kua teitei oti tuai e tanakiaga mena fakaalofa. Pehē a ia: “Kua fina atu nai au ki Ierusalema ke fekafekau atu ai ke he tau tagata tapu; Ha kua loto a Maketonia mo Akaia ke taute ha mena fakaalofa ma e tau tagata tapu kua nonofogati ha ha i Ierusalema.” (Roma 15:25, 26) Nakai leva he mole ti fakamooli e Paulo e poakiaga ia, ko e magaaho ne liu a ia ki Ierusalema ti tapaki a ia i ai, ne tala age a ia ke he Kovana Roma ko Feliki: “Ati fano ai au ke ta atu e tau mena fakaalofa katoa mo e tau poa ke he haku a motu.”—Gahua 24:17.
Ko e aga ne fakakite he tau Kerisiano he senetenari fakamua kua maaliali ai mai he talahauaga ha Paulo hagaao ke he tau Maketonia. Ne pehē a ia “kua ole mai mo e fakamakamaka kia mautolu, kia talia ai e mautolu e mena fakaalofa [totonu].” Ne fakamalolō he aposetolo e tau Korinito ke mumuitua ke he fakafifitakiaga ia. Pehē a ia: “Kia takitokotaha mo e foaki tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.” Ko e heigoa ne omoomoi e tau fakapotopotoaga ke fakakite e fakamokoi pihia? Ko e manako ki ai kua nakai fakavē katoatoa ni ke he “moua ai he tau tagata fakatapu e tau mena kua nonofogati ai a lautolu, ka e nakai kuenaia, ka kua fakalahi ai foki e fakahekeaga ke he Atua he loga e tau fakaaue.” (2 Kori. 8:4; 9:7, 12) Ko e fakamokoi ha tautolu kua liga pihia foki e foliaga. To fakamonuina mooli e Iehova ko e Atua e aga mitaki lahi mo e nakai lotokai pihia—ti ko e fakamonuina haana to maukoloa mooli ai e tagata.—Fakatai 10:22.
TAU PUHALA KUA FIFILI E FALU KE FOAKI MENA FAKAALOFA KE HE GAHUA HE LALOLAGI KATOA
Tuga ni he vahā he aposetolo ko Paulo, tokologa he vahā nei ne “tuku age ai hana mena,” po ke fatifati e vala tupe ti tuku he tau puha mena fakaalofa he fakapotopotoaga ne leipolo “Gahua he Lalolagi Katoa.” (1 Kori. 16:2) He tau mahina takitaha, ne ta atu he tau fakapotopotoaga e tau tupe nei ke he ofisa he Tau Fakamoli a Iehova ne leveki e motu ha lautolu. Kua maeke foki a koe ke fakafano atu fakahako e tau mena fakaalofa ke he matakau ne kua fakatū matafakatufono ne fakaaoga he Tau Fakamoli a Iehova he motu ha mutolu. Ke iloa e matahigoa he matakau nei ne fakaaoga he Tau Fakamoli a Iehova he motu haau, fakamolemole matutaki atu ke he la ofisa ne leveki e motu. Ko e matahigoa he kaina he la ofisa kua maeke ke moua he www.pr418.com. Ko e tau mena fakaalofa kua maeke a koe ke fakafano fakahako atu hanei:
TAU MENA FAKAALOFA PAUAKI
Foaki e tau tupe, tau koloa fakamanaia (jewelry), po ke falu koloa uho he tagata.
Tuku e tohi i ai ke fakakite ko e tupe po ke tau koloa ko e tau mena fakaalofa pauaki.
TAU MENA FAKAALOFA NE FAI MAVEHEAGA
Ko e tau tupe foaki kua fai maveheaga ke maeke ke liuaki age ka manako ki ai e tagata ne foaki.
Tuku e tohi i ai ne talahau ko e mena fakaalofa kua fai maveheaga.
FAKATOKA FOAKI MENA FAKAALOFA
Lafi ke he tau mena fakaalofa ko e tau tupe mo e tau koloa uho he tagata, kua ha ha i ai e falu puhala foaki ke aoga ai e gahua he Kautu he lalolagi katoa. Kua tohi e tau puhala nei i lalo. Ko e ha puhala ni ka manako a koe ke foaki, fakamolemole matutaki atu fakamua ke he la ofisa ne leveki e motu haau ke iloa e tau puhala kua fakaaoga he motu. Ha kua kehekehe e tau matafakatufono mo e tau fakatufono tukuhau, kua aoga ke tutala fakamua ke he tau tagata fifili pauaki ke he faahi tukuhau mo e fakatonutonu matafakatufono to fifili e puhala mitaki ke foaki.
Inisua: Ko e mena fakaalofa ne foaki ka tohi fakatonu e matakau ne fakaaoga he Tau Fakamoli a Iehova ke moua (beneficiary) e fakavēaga inisua he moui po ke fakatokaaga tupe ka litaea po ke fuakau.
Tau Tohi Tokaaga Tupe: Ko e tau tohi tokaaga tupe, tau fakamauaga ke he tau tupe fakahū, po ke tau tokaaga tupe litaea ne kua fakatū i loto he trust po ke tohi ai kaeke kua mate ke totogi atu ke he matakau kua fakaaoga he Tau Fakamoli a Iehova ne lagotatai mo e tau fakatokaaga he pege he matakavi.
Stocks mo e Bonds: Ko e stocks mo e bonds kua foaki ke he matakau kua fakaaoga he Tau Fakamoli a Iehova, ko e mena fakaalofa pauaki po ke he maveheaga he Transfer on Death.
Tau Fale mo e Tau Fonua: Ko e fale mo e fonua kua maeke ke fakafua kua foaki fakaalofa ke he matakau ne fakaaoga he Tau Fakamoli a Iehova, ko e mena fakaalofa pauaki po ke tau kaina nonofo, he fakamau hifo e kaina ke he tagata ne foaki, ti matutaki ke nofo he fale he moui katoa haana.
Tau Mena Fakaalofa Lagataha he Tau (Annuity): Ko e tau tupe po ke tau koloa kua foaki fakaalofa ke he taha matakau ne fakaaoga he Tau Fakamoli a Iehova i lalo hifo he fakaholoaga he tagata ne foaki, po ko ia ne fifili he tagata ne foaki, ke moua e totogi nei ne lagataha he tau he tau tau oti he haana moui. To mutu e tupe tukuhau he tagata ke lata mo e tau ne kamata ai ke fakatū e mena fakaalofa nei.
Wills mo e Trusts: Ko e koloa po ke tupe ka toka hifo ke he matakau ne fakaaoga he Tau Fakamoli a Iehova puhala he fakamauaga (will) ne tohia matafakatufono po ke tohi hifo e higoa he matakau ka moua e totogi ke lata mo e maveheaga ne taute mo e trust. Liga maeke e fakaholoaga nei ke fai lagomatai ke he tau tupe tukuhau.
Tuga ni e kakano he “pulega ke foaki,” ko e tau puhala foaki mena fakaalofa nei kua lata ke fai fakatokatokaaga e tagata ne foaki e mena fakaalofa. Ke lagomatai e tau tagata kua manako ke foaki ke he gahua he Tau Fakamoli a Iehova he lalolagi katoa he falu puhala foaki mena fakaalofa, kua taute ai e porosua ne mataulu Charitable Planning to Benefit Kingdom Service Worldwide he vagahau Peritania mo e Sepania. Kua tohi e porosua ke tuku atu e tau vala tala hagaao ke he tau puhala kehekehe kua maeke ke foaki e tau mena fakaalofa he mogonei po ke a mui, ka mate. Ko e tau vala tala i loto he porosua nei to liga nakai lauia katoatoa ke he tuaga haau ha ko e tau fakatokaaga tukuhau po ke falu matafakatufono he motu haau. Ko e mena ia, ka oti he totou e koe e porosua, kua lata mogoia ke tutala ke he tau tagata fakatonutonu matafakatufono po ke tukuhau he motu haau. He fakaaoga e tau puhala foaki mena fakaalofa ia, kua tokologa ne maeke ke lagomatai ke lalago ha tautolu a tau matagahua fakalotu mo e levekiaga ke he tau tagata he lalolagi katoa ti aoga foki ma e tau tukuhau ha lautolu. Ka fai he motu haau, kua maeke ke moua e porosua he ole ke he tohikupu he fakapotopotoaga haau.
Ma e falu vala tala foki, maeke ia koe ke matutaki he tohi po ke vilo atu ke he la ofisa ne leveki e motu haau.