“Fakaalofa e Atua kia Ia kua Foaki mo e Fakamakai”

Ko e mena fakaalofa fēfē ka loto fakaaue mooli a koe ki ai? Nakai noa, laulahi ia tautolu kua fiafia ke moua e mena fakaalofa ka atu he tagata ne omoomoi he fakaalofa, ka e nakai ha ko e kotofa po ke matagahua. Ke foaki atu ko e mena kua lata ke hake mai he loto. Kua aoga lahi ai ki a tautolu. Ka e mua atu, kua aoga lahi ai ke he Atua. Manamanatu ke he tau kupu ne omoomoi he agaaga e aposetolo ko Paulo ke fakamau hifo ia 2 Korinito 9:7.

Ko e ha ne tohi e Paulo e tau kupu ia? Ne manako a ia ke fakamafana e tau Kerisiano i Korinito ke lagomatai e gahua foaki mena fakaalofa ma e tau matakainaga Iutaia ha lautolu ne nakai fai koloa. Lali nakai a ia ke fakaohooho e tau Korinito ke foaki? Nakai pihia, ne tohi e ia: “Kia takitokotaha mo e foaki tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.” Onoono fakalahi la a tautolu ke he tomatomaaga ia.

“Tuga e fifili ke he hana loto.” Ko e Kerisiano mooli ne foaki e ia ha kua fifili “ke he hana loto” ke taute pihia, he talahau e Paulo. He magaaho taha, kua manamanatu lahi e Kerisiano ke he manako he tau matakainaga tapuaki haana. He vagahau fakamua ko e kakano he kupu “fifili” “kua hagaao ke he fitā e mauokafua,” he talahau he taha pulotu. Ti kua manamanatu fakahokulo e Kerisiano ke he manako he tau matakainaga talitonu ti hūhū hifo ki a ia ni ko e heigoa haana ka taute ke lagomatai e tuaga ia.​​—1 Ioane 3:17.

“Aua neke foaki mo e momoko, po ke foaki he ole fakafi.” Talahau e Paulo hagaao ke he ua e vahega foaki ne nakai lata ke he tau Kerisiano mooli​​—foaki ka e nakai manako mo e foaki ha kua fakaohooho. Ko e tagata ne foaki mo e momoko po ke nakai manako, kua foaki e ia “mai he loto kua fakaatukehe he manamanatu ke galo e tupe haana,” he fakamaama he taha tohi. Ko e tagata ne foaki ha kua fakaohooho, ne age e ia he logona hifo kua peehi a ia ke taute pihia. Ko hai ia tautolu ne fiafia ke he mena fakaalofa ne mai he tagata ne ai manako ke foaki po ke fakaohooho ke foaki?

“Kua fakaalofa e Atua kia ia kua foaki mo e fakamakai.” Ka fifili mogoia e Kerisiano ke foaki, ti lata ni ia ia ke age mo e fakamakai, po ke fiafia, he talahau e Paulo. Mooli ai, kua moua e fiafia ha ko e foaki atu ne omoomoi he loto mitaki. (Gahua 20:35) Na kitia maaliali e fiafia he tagata foaki mo e fakamakai. Ti ko e kupu “fakamakai” kua fakamaama ke he logonaaga he loto mo e kitia ke he foliga he tagata ne foaki. Kua hokotia ke he loto ha tautolu e aga he tagata foaki mo e fakamakai. Ti fakamafanatia foki e ia e loto he Atua. Pehē foki taha fakaliliuaga: “Fiafia e Atua ke he tau tagata ne fiafia ke foaki.”​​—Contemporary English Version.

Ko e tau kupu he aposetolo ko Paulo ne omoomoi he agaaga ko e matapatu fakaakoaga ke takitaki e puhala foaki faka-Kerisiano. He foaki e tautolu e tau magaaho, malolō, po ke tau koloa ha tautolu, kia foaki ai mai he manako mooli mo e ha kua fiafia lahi a tautolu ke fakamokoi ke he falu, mua atu ki a lautolu kua manako ke he lagomatai. Ko e foaki pihia to fakafiafia a tautolu mo e ofania foki he Atua a tautolu, ha kua “fakaalofa e Atua kia ia kua foaki mo e fakamakai.”