“Kia Nonofo Fakamitaki mo e Tau Tagata Oti Kana”
1. Ko e heigoa e fakatonuaga he Tohi Tapu kua lata ia tautolu ke fakagahua ka feleveia mo e tau tagata he kaina kua nakai fiafia?
1 Ko e tau tagata ha Iehova ko e tau tagata fiafia ke he mafola po ke nonofo fakamitaki, ti ko e fekafekauaga monuina mo e mafola ha tautolu. (Isaia 52:7) Ka e he falu magaaho kua feleveia a tautolu mo e tau tagata ne nakai fiafia ha kua ahiahi atu a tautolu ke he tau kaina ha lautolu. Ko e heigoa ka lagomatai a tautolu ke nonofo mafola he tau tuaga pihia?—Roma 12:18.
2. Ko e ha kua aoga ma tautolu ke maama e tuaga?
2 Maama e Tuaga: Pete kua vale mai e falu ha kua totoko ke he kupu mooli, ko e falu kua liga fakakite e nakai fiafia ha ko e tau kakano ne kua kehe mai mo e ogo ha tautolu. Liga aahi atu a tautolu he magaaho kua nakai hagahaga mitaki. Kua liga nakai fiafia e tagata he kaina ha ko e tau lekua fakatagata. Ti pete foki kaeke ko e ogo he tala mitaki ne fakaita aki a ia, kua lata ia tautolu ke manatu kua liga tali pihia ai ha kua fakahehē a ia. (2 Kori. 4:4) Ko e maama he tuaga ka lagomatai a tautolu ke fakatotoka fakamitaki mo e mailoga kua nakai ita a ia ki a tautolu.—Fakatai 19:11.
3. Liga maeke fēfē ia tautolu ke fakakite e fakalilifu ke he tagata he kaina?
3 Fakakite e Fakalilifu: Tokologa he fonua ne kua malolō lahi e tau taofiaga. (2 Kori. 10:4) Ha ha ia lautolu e tonuhia ke fifili ke fanogonogo po ke nakai. Nakai manako a tautolu ke onoono fakateaga ke he tau taofiaga he tagata he kaina ke tuga kua mua hake e iloilo ha tautolu ki a ia. Kaeke kua ole mai ki a tautolu ke ō kehe, kua lata ni ia tautolu ke talia fakalilifu.
4. Ko e heigoa e kakano ke vagahau mo e fakaalofa?
4 Vagahau mo e Fakaalofa: Pete foki ka vagahau kelea mai ki a tautolu, ko e tali ha tautolu kua lata ke molū mo e fakaalofa. (Kolo. 4:6; 1 Pete. 2:23) He nakai putoia ke he taufetoko, lali ke moua taha manatu kua fetataiaki. Liga mitaki ke hūhū fakatotonu atu ke iloa e tau kakano ne nakai fiafia ai e tagata he kaina. Ke ua fakaauatu e ita haana, ko e falu magaaho kua mitaki ke fakaoti e fakatutalaaga.—Fakatai 9:7; 17:14.
5. Ko e heigoa e aoga ka moua mai kaeke kua fekafekau mo e mafola?
5 Ka mafola a tautolu, to liga manatu he tagata he kaina e tali mitaki ha tautolu ti fanogonogo ke he taha foki ka lali ke fakamatala ki a ia. (Roma 12:20, 21) Pete ni kua mauokafua e totoko haana, ka e liga to eke a ia mo matakainaga ha tautolu a taha aho. (Kala. 1:13, 14) He fiafia a ia ke he kupu mooli po ke nakai, to fakaheke e tautolu a Iehova mo e fakalilifu e puhala fakaako ha tautolu ka fakatumau e manako fakalatalata mo e fakakite e mafola.—2 Kori. 6:3.