Fakamalolō, ka e Mafola
1 Tokologa e tagata ne fakamatala a tautolu ki ai kua fakakite e tau taofiaga mooli ne nakai tatai ke he kupu mooli he Tohi Tapu. Ha kua lata a tautolu ke fakamatala mo e fakamalolō, kua manako foki a tautolu ke “tumau ai e mafola mo e tau tagata oti.” (Roma 12:18, NW; Gahua 4:29) Maeke fēfē a tautolu ke fakamalolō ka e mafola foki he talahau e tautolu e fekau he Kautu?
2 Kumi e Tau Mena ne Fetaliaaki: Ne kalo kehe e tagata mafola he taufetoko. Ka nakai totoko teao e tau taofiaga malolō ne ha ha ai he tagata he kaina to taute a ia ke fanogonogo. Ka hepe e talahauaga haana, liga maeke ia tautolu ke talahau fakailoilo e manatu ne liga ke moua e fetaliaaki. Ke atihake e mena ne fetataiaki ki ai a tautolu, liga maeke ia tautolu ke utakehe e tau logonaaga kelea ti hokotia ke he loto haana.
3 Ka tokanoa e tautolu e manatu hepe he tagata he kaina, kua fakahui po ke fakavala vai kia e tautolu e kupu mooli? Nakai. Ko e matagahua ha tautolu ko e tau fekafekau Kerisiano, ke nakai totoko e tau manatu hepe oti ne logona e tautolu, ka ko e fakamatala he tala mitaki he Kautu he Atua. (Mata. 24:14) He nakai ita ke he manatu hepe ne talahau, maeke a tautolu ke onoono ki ai ko e magaaho haia ke iloa e tautolu e manamanatuaga he tagata.—Fakatai 16:23.
4 Puipui e Fakalilifu: Ha ha i ai e tau magaaho kua lata ke fakamalolō mo e mauokafua a tautolu ka totoko e tau fakaakoaga hepe. Ko e tau tagata mafola, mogoia, kua fakamamao a tautolu mai he vaiga ti pihia mo e fakaaoga e tau kupu ekefakakelea ke fakamaama aki a lautolu ne nakai hako e talitonu mo e fakaakoaga. Ko e aga fakaikaluga kua fuluhi kehe ai, ka ko e mahani molū mo e totonu kua hafagi e tau manamanatuaga he tau tagata ne ofania e kupu mooli. He fakakite e fakalilifu ke he tau tagata fanogonogo mo e ke he tau taofiaga ha lautolu kua puipui e lilifu ha lautolu, ti mukamuka lahi a lautolu ke talia e fekau ha tautolu.
5 Ne manamanatu e aposetolo ko Paulo ke he tau taofiaga ha lautolu ne fakamatala a ia ki ai ti lali ke talahau e tala mitaki ke he puhala ka futiaki ke he tau loto ha lautolu. (Gahua 17:22-31) Ne makai a ia he eke mo “tau mena oti ke he tau tagata oti” ke maeke ke “momoui ai ni falu” ha ko ia. (1 Kori. 9:22) Maeke ia tautolu ke taute pihia he mafola ka e fakamalolō he fakamatala e tala mitaki.