‘Kia Fakaalofa ke he Tau Matakainaga Oti Kana’

Ko e tau kupu omoomoi he mataulu tala nei ne tohi hifo ai kavi ke he teitei ua e afe tau kua mole. (1 Pete. 2:17) Ka kua lata ia tautolu ke fakagahua fakalahi ai he vahā nei! Maeke fēfē a tautolu ke fakaalofa ke he taha mena lahi mahaki tuga e fakatokatokaaga ha tautolu he lalolagi katoa? Mo e he lalolagi nei ne nakai fakaalofa, maeke fēfē ia tautolu ke fakatumau e fakaalofa ha tautolu neke galo ai? (Mata. 24:12) Lali la a koe ke tali e tau hūhū i lalo ka kitekite ke he vitiō Our Whole Association of Brothers.

(1) Magaaho fe ne eke a tautolu mo vala he fakatokaaga Kerisiano? (2) Ko e heigoa e tau gahua tolu kua fa fakalataha a tautolu mo e tau matakainaga ha tautolu he lalolagi katoa ke taute? (3) Fakakite fēfē he tau matakainaga ha tautolu e fakamakutu ke fakamatala (a) he tutakale i Alasaka, (e) he tau uaafo lalahi i Europa, mo e (i) he tau uho vao i Peru? (4) Ko e ha kua nakai lata ia tautolu ke logona hifo ko e gahua fakamatala ko e gahua noa ni? (5) Talahau e tau fakafifitakiaga ke he tau puhala he Tau Fakamoli a Iehova ne kua fefakamafanaaki mo e felagomataiaki (a) he mole e mafuike, (e) he mole e afā, mo e (i) he magaaho ne felatauaki he motu? (6) He tau puhala aoga fe kua maeke ia tautolu oti ke fakatātā e fakamailoga lahi nei he ha tautolu a fakatokaaga Kerisiano? (Ioane 13:35) (7) Ko e heigoa e tau mena aoga he gahua auloa ke talaga ha tautolu ni a tau Fale he Kautu? (8) Tumau fakaagaaga fēfē e tau matakainaga ha tautolu i Europa Uta mo Rusia he mogo ne pā ai e gahua? (9) Ko e heigoa e tau laliaga ofoofogia ne taute he tokologa he Tau Fakamoli ke fakalataha atu ke he tau fonoaga, mo e ko e ha? (10) Fakamalolō fēfē he vitiō nei e fakamakamaka haau ke (a) tapuaki ki a Iehova he tau feleveiaaga Kerisiano he kaufakalataha mo e tau matakainaga haau, (e) ke lagomatai falu he tau magaaho kua manako lagomatai, mo e (i) ke fakamatala tua fakamooli he ha matakavi mo e he ha puhala kua maeke ia koe? (11) Puhala fe mo e magaaho fe kua maeke ia tautolu ke fakaaoga e vitiō nei he fekafekauaga?

Ko e matapatu kakano ha tautolu he eke mo vala he fakatokaaga Kerisiano ko e fakaalofa ha tautolu ma Iehova. Ti kua fiafia a tautolu ke fakaako hagaao ki a ia mo e ke fakaako e falu hagaao ki a ia. Ti fakaalofa foki a tautolu ke he tau tagata ne fakaalofa a Iehova ki ai. Ka lagomatai e tautolu a lautolu he tau magaaho ne manako lagomatai, kua nakai amanaki a tautolu ke fakaaue e Atua ki a tautolu. Ka kua fakaaue a tautolu ke he Atua ha kua onoono a tautolu ke he fakatokaaga Kerisiano ha tautolu ko e mena fakaalofa uho mai ia ia. He fakahikuhiku e tau aho fakamui he lalolagi nakai fakaalofa nei, kia matutaki a tautolu ke fakatātā e fakaalofa ke he tau matakainaga oti kana!