Vala 11

Ko e Matapatu he Lalolagi Fou kua Fakatu he Magaaho Nei

1, 2. Ke he fakamoliaga he perofetaaga he Tohi Tapu, ko e heigoa e mena ne tupu ki mua he ha tautolu a tau mata?

KO E taha mena ne homo ue atu ko e matapatu he lalolagi fou he Atua ke he magaaho tonu nei kua fakatu tuai, pete ni he kelea e lalolagi tuai ha Satani. Ki mua he tau mata ha tautolu kua tamai he Atua e tau tagata mai he tau motu oti mo e fakatu a lautolu mo matapatu he fakalatahaaga he lalolagi fou ne tata lahi mai ke hukui aki e nakai kau fakalataha he lalolagi he vaha nei. He Tohi Tapu ia 2 Peteru 3:13, ko e kaufakalatahaaga fou nei kua fakahigoa ai ko e “lalolagi fou.”

² Kua talahau foki he perofetaaga he Tohi Tapu: “To hoko ni ke he tau aho a mui [ko e magaaho nei ne nonofo ai a tautolu], . . . To o mai foki e tau motu kehe loga, mo e pehe age a lautolu, O mai a, kia o hake a tautolu ke he mouga a Iehova [ko e tapuaga moli hana], . . . to fakaako mai foki e ia a tautolu ke he hana tau puhala, ti o ai a tautolu ke he hana tau puhala.”—Isaia 2:2-3.

3. (a) Hagaao ki a hai e perofetaaga ha Isaia kua fakamoli? (e) Talahau fefe he tohi fakahiku he Tohi Tapu ke he mena nei?

³ Ko e perofetaaga ia kua fakamoli tuai ki a lautolu ne omaoma ke he ‘Atua ke o mai ke he hana a tau puhala.’ Ko e tohi fakahiku he Tohi Tapu kua vagahau ke he fakaalofa mafola he kaufakalatahaaga he lalolagi katoa he tau tagata “ko e moto tagata tokologa, . . . mai he tau motu oti, mo e tau faoa, mo e tau tagata kehekehe, mo e tau vagahau kehekehe,” ko e tau matakainaga moli he lalolagi katoa ne tapuaki fakalataha ke he Atua. Ti pehe foki e Tohi Tapu: “Ko lautolu na kua o mai mai he matematekelea lahi.” Ti to hao mai a lautolu he fakaotiaga he fakatokatokaaga ke he tau mena kelea nei.—Fakakiteaga 7:9, 14; Mataio 24:3.

Tau Matakainaga Moli he Lalolagi Katoa

4, 5. Ko e ha kua maeke ai e Tau Fakamoli a Iehova mo tau matakainaga ke he lalolagi katoa?

⁴ Miliona e Tau Fakamoli a Iehova kua lali fakamoli ke nonofo fakatatai ke he tau hatakiaga mo e tau puhala he Atua. Kua fakamau taula ha lautolu a tau momoui ke he amaamanakiaga he moui tukumuitea ke he lalolagi fou he Atua. Ke taute ha lautolu a tau momoui he tau aho takitaha ke omaoma ke he tau fakatufono he Atua, kua fakakite e lautolu ki a ia e manako ke omaoma ke he hana a tau puhala he pule ke he magaaho nei mo e ke he lalolagi fou. Ke he tau mena oti pete ne tau motu kehekehe po ke kili, kua omaoma a lautolu ke he tau tuaga ia—ko e tau mena ne fakatoka mai he Atua he hana a Kupu. Ko e mena ha ia ne ko e tau matakainaga moli he lalolagi katoa a lautolu, ko e kaufakalatahaaga he lalolagi fou ne taute he Atua.—Isaia 54:13; Mataio 22:37, 38; Ioane 15:9, 14.

⁵ Kua nakai uta he Tau Fakamoli a Iehova e fakahekeaga ha ko e ha lautolu a kehe fakamatakainaga he lalolagi katoatoa. Kua iloa e lautolu ko e fua nei he agaga malolo he Atua kua fakagahuahua ke he tau tagata ne omaoma ke he hana a tau matafakatufono. (Gahua 5:29, 32; Kalatia 5:22, 23) Ko e gahua he Atua. Ha kua talahau e Iesu, “ko e tau mena nakai maeke ke he tau tagata, kua maeke ni ke he Atua.” (Luka 18:27) Ti ko e Atua ne taute e lagi mo e lalolagi katoatoa ke he fakauka ko ia ha ia foki ne maeke ke taute e kaufakalatahaaga he lalolagi fou ke he fakauka.

6. Ko e ha ne fakahigoa ai e tau matakainaga he Tau Fakamoli a Iehova ko e mana he vaha fou nei?

⁶ Ti ko e puhala ha Iehova he pule ke he lalolagi fou kua fita he kitia e mena ka taute, matapatu he fakaveaga aki e lalolagi fou ne kua fita e fakatu he magaaho nei. Ti ko e mena ne taute e ia ma e hana Tau Fakamoli, ke he puhala he mana he vaha nei. Ko e ha? Kakano kua ati e ia e Tau Fakamoli a Iehova ke he tau matakainaga moli he lalolagi katoa, ko e mena ke nakai mamutu ha ko e taha matakau fakamotu, kili kehekehe, po ke ha fiafia fakalotu. Ha ko e Tau Fakamoli kua loga ai ke he tau miliona mo e nonofo ke he molea e 200 he tau motu, kua lili fakalataha a lautolu ke he pipiaga nakai mamutu. Ko e tau matakainaga he lalolagi katoa nei kua kehe lahi ke he tau fakamauaga tala tuai, kua moli lahi ko e mana he vaha nei—gahua he Atua.—Isaia 43:10, 11, 21; Gahua 10:34, 35; Kalatia 3:28.

Kitiaaga he Tau Tagata he Atua

7. Ko e ha ne talahau e Iesu ko e hana a tau fekafekau moli to kitia ai?

⁷ Fakamalolo atu fefe ko e tau tagata ne fakaaoga he Atua ko e matapatu he hana a lalolagi fou? Ka ko hai ne fakamoli e tau kupu ha Iesu ia Ioane 13:34, 35? Ne fakakite e ia: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia fe­ofa­naki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” Ko e Tau Fakamoli a Iehova kua tali tonu ke he tau kupu ha Iesu mo e fakagahua ki ai. Ha kua hataki mai e Kupu he Atua, kua “fakaalofa lahi ko e taha kia taha.” (1 Peteru 4:8) Ne “fakatapulu [a lautolu] ke he fakaalofa, ha ko e pipiaga mitaki katoatoa haia he fefakalatahaaki.” (Kolose 3:14, NW) Ti ko e fakaalofa fakamatakainaga ko e “pili” ke taofi fakalataha e lalolagi katoa.

8. Kitia fakalaulahi fefe e 1 Ioane 3:10-12 e tau tagata he Atua?

⁸ Ti pihia foki, kua talahau mai ia 1 Ioane 3:10-12: “Ko e mena ia kua iloa ai e fanau he Atua mo e fanau he tiapolo. Ko lautolu gotoa kua nakai eke e mahani tututonu, nakai mai he Atua ­a lautolu, katoa mo lautolu kua nakai fakaalofa ke he tau matakainaga ha lautolu. Ha ko e poaki hanai kua fanofonogo ki ai a mutolu tali mai he kamataaga, kia feofanaki a tautolu. Nakai tuga a Kaino ne mai ia ia ne mahani kelea, ne kelipopo foki e ia hana matakainaga.” Ka ko e tau tagata he Atua nakai vale, tau matakainaga he lalolagi katoatoa.

Taha Puhala Kitiaaga

9, 10. (a) Ke he gahua fe he tau fekafekau he Atua kua kitia ai ke he tau aho fakahikuhiku? (e) Fakamoli fefe he Tau Fakamoli a Iehova e Mataio 24:14?

⁹ Ko e taha puhala ke kitia aki e tau fekafekau he Atua. Ke he hana a perofetaaga hagaao ke he fakaotiaga he lalolagi, kua talahau tuai e Iesu e loga e tau mena ke fakamailoga aki e magaaho nei ko e tau aho fakahiku. (Kikite e Vala 9.) Ko e falu vala he perofetaaga kua talahau he hana a tau kupu ia Mataio 24:14: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”

¹⁰ Kua kitia nakai e tautolu e perofetaaga kua fakamoli? E. Ha kua kamata e tau aho fakahiku he 1914, ko e Tau Fakamoli a Iehova kua fakamatala ai e tala mitaki he Kautu he Atua ke he lalolagi oti ke he puhala ne fakatoka e Iesu, mua atu ke he tau kaina he tau tagata. (Mataio 10:7, 12; Gahua 20:20) Kua miliona e Tau Fakamoli kua ahi atu ke he tau tagata he tau motu oti ke tutala ki a lautolu hagaao ke he lalolagi fou. Ko e mena ia ne takitaki atu a koe ke moua e tohi tote fakailoa nei, ha ko e gahua he Tau Fakamoli a Iehova kua putoia ai e lolomiaga mo e tufatufa ai ke he tau pili­ona he tau valavala he tohi hagaao ke he Kautu he Atua. Kua iloa nakai e koe ha tagata kua fakamatala hagaao ke he Kautu he Atua he taha fale ke he taha fale he lalolagi? Mo e ia Mareko 13:10 kua fakakite mai ko e gahua fakamatala mo e fakaako nei kua taute “fakamua” ato hoko mai e fakaotiaga.

Tali ke he Matakupu Lahi ke Ua Aki

11. Ko e heigoa foki kua fakakatoatoa he Tau Fakamoli a Iehova ha kua omaoma ke he pule he Atua?

¹¹ Ke omaoma ke he tau fakatufono mo e tau poakiaga he Atua ko e Tau Fakamoli a Iehova kua fakakatoa foki e taha mena. Kua fakakite e lautolu ko Satani ko e pikopiko he magaaho ne talahau e ia kua nakai fakamoli e tau tagata ke he Atua ka kamatamata, ko e tali ke he matakupu lahi ke ua aki kua putoia e tua malolo he tagata. (Iopu 2:1-5) Ke he kaufakalatahaaga he miliona he tau tagata mai he tau motu oti, kua fakatata he Tau Fakamoli, ko e tino taha, fakamoli ke he pule he Atua. Pete ni ko e tau tagata nakai mitaki katoatoa a lautolu, kua tumau a lautolu ke he fahi he Atua he matakupu he pule malolo he lalolagi katoa­toa, pete ni ha ko e tau kamatamata fakasatani.

12. Ke he tua ha lautolu, ko hai he Tau Fakamoli ne fifitaki?

¹² He vaha nei, kua miliona he Tau Fakamoli a Iehova kua lafi ke he ha lautolu a fakatataiaga e falu a fakamoli ke he vaha fakamua ke he Atua. Ko e falu ia lautolu ia ko Apelu, Noa, Iopu, Aperahamo, Sara, Isaako, Iakopo, Tepora, Ruta, Tavita, mo Tanielu, ke fakahigoa e falu. (Heperu, veveheaga 11) Ko lautolu haia ne talahau he Tohi Tapu, “ha kua lahi mahaki tuga e tau aolu e tau tagata fakamoli.” (Heperu 12:1, NW) Ko lautolu nei mo e falu fakalataha mo e tau tutaki ha Iesu kua tumau e tua mo e malolo ke he Atua. Ti ko Iesu ni ne fakakite mai e fakataiaga kua mua atu ha kua fakatumau ke he tua malolo katoa.

13. Ko e tau kupu fe ha Iesu kua hagaao ki a Satani kua moli?

¹³ Kua fakamoli e mena nei ke he mena ne talahau e Iesu hagaao ki a Satani ke he tau takitaki lotu kua moli: “Ka kua kolo ainei a mutolu ke kelipopo au ko e tagata ne talahau atu kia mutolu e mena moli ne fanogonogo ai au mai he Atua, . . . Ko mutolu, mai he matua ha mutolu ko e tiapolo ti kua fia eke e mutolu e tau mena kua manako ki ai e matua ha mutolu. Ko e keli tagata a ia tali mai he kamataaga, ti nakai tumau ni a ia ke he mena moli, ha kua nakai tokai i loto ia ia e mena moli; ka vagahau a ia ke he vagahau pikopiko, ko e hana ni a ia ke vagahau aki, ha ko e pikopiko a ia, mo e matua he pikopiko.”—Ioane 8:40, 44.

Ko e Heigoa Hau a Fifiliaga?

14. Ko e heigoa e mena ne tupu ke he matapatu he lalolagi fou he magaaho nei?

¹⁴ Ko e matapatu he lalolagi fou he mogonei kua fakatu he Atua ke he kaufakalatahaaga he tau atu motu he Tau Fakamoli a Iehova kua malolo lahi mo e malolo lahi ni. Ke he tau tau takitaha kua teau e tau afe he tau tagata kua fakaaoga ha lautolu a finagalo tokanoa, fakave ai ke he lotomatala hako, ke talia e pule he Atua. Kua eke a lautolu mo taha vala he kaufakalatahaaga he lalolagi fou, tumau ai ke he fahi he Atua he matakupu he pule malolo he lalolagi katoatoa, ti fakamoli ai ko Satani ko e pikopiko.

15. Ko e heigoa e gahua vehevehe kua uta e Iesu ke he ha tautolu a vaha?

¹⁵ Ha kua fifili e pule he Atua, kua lata a lautolu ke tuku ke he “fahi matau” ha Keriso ka e vevehe e ia e “tau mamoe” mai he “tau koti.” He hana a perofetaaga kua hagaao ke he tau aho fakamui, kua talahau tuai e Iesu: “To fakapotopoto ki mua hana e tau motu oti kana; ati vevehe kehekehe ai e ia a lautolu, tuga e leveki mamoe kua vevehe e tau mamoe mo e tau koti; To tuku e ia e tau mamoe ke he hana fahi matau, ka ko e tau koti ke he fahi hema.” Ko e tau mamoe ko e tau tagata ne tokolalo kua feoaki mo e ati hake e tau matakainaga ha Keriso, omaoma ke he pule he Atua. Ko e tau koti ko e tau tagata ulu kafilo ne tiaki e tau matakainaga ha Keriso mo e nakai fai mena ne taute ke ati hake e pule he Atua. Ko e heigoa e fua? Kua pehe mai a Iesu: “Ati o atu ai a lautolu [tau koti] ke he fakahala tukulagi; ka ko e tau tagata tututonu [tau mamoe] ke he moui tukulagi.”—Mataio 25:31-46.

16. Ko e heigoa hau ka taute ke maeke ke nofo he Parataiso ne hau?

¹⁶ Moli, kua leveki he Atua a tautolu! Tata lahi mai to taute e ia e lalolagi parataiso ke he kolikoli lahi. Manako nakai a koe ke nofo he Parataiso ia? Ka pihia, fakakite e fakaaue hau ki a ­Iehova ma e tau fakamonuina ke fakaako hagaao ki a ia mo e taute e mena ne fakaako e koe. “Kia kumi e mutolu a Iehova ka kua maeke he moua e mutolu a ia; kia tauui atu ā mutolu kia ia ka kua tata mai a ia; Kia tiaki e ia ne mahani kelea hana mahani, mo e tagata mahani hepehepe kia tiaki e ia hana tau manatu; ti liu atu a ia kia Iehova, ti fakaalofa mai a ia kia ia.”—Isaia 55:6, 7.

17. Ko e ha ne nakai fai magaaho ne toe ke moumou ko hai ka fekafekau ki ai?

¹⁷ Nakai fai magaaho ke moumou. Ko e fakaotiaga he fakatokatokaaga nei kua tata lahi mai. Kua hataki mai e Kupu he Atua: “Aua neke fakaalofa a mutolu ke he lalolagi, po ke tau mena ha ha he lalolagi; kaeke kua fakaalofa taha ke he lalolagi, nakai nofo e fakaalofa ke he Matua ke he loto hana. . . . Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”—1 Ioane 2:15-17.

18. Ko e heigoa e matagahua kua fakamalolo aki a koe ke onoono atu mauokafua ke nofo ke he lalolagi fou homo ue atu he Atua?

¹⁸ Ko e tau tagata he Atua he magaaho nei kua fakaako ma e moui tukulagi ke he lalolagi fou. Kua fakaako a lautolu fakaagaga ke he falu a tau puhala ke fakatolomaki e parataiso. Kua fakaohooho e mautolu a koe ke fifili e Atua ko e Pule mo e ati e gahua fakamoui ne kua taute ai ke he lalolagi oti he vaha nei. Fakaako e Tohi Tapu mo e Tau Fakamoli a Iehova, mo e hau ke iloa e Atua ne leveki moli ki a koe mo e to tamai e fakaotiaga ke he matematekelea. Ke he puhala nei to eke foki a koe ko e taha vala he fakaveaga he lalolagi fou. Ti mauokafua a koe ke onoono atu ke moua e taliaga he Atua mo e nofo ai ke he lalolagi fou homo ue atu tukulagi tukumuitea.

[Fakatino he lau 31]

Ko e Tau Fakamoli a Iehova ko e tau matakainaga he tau atu motu

[Fakatino he lau 32]

Ko e matapatu he lalolagi fou he Atua kua fakatu he magaaho nei