Fifitaki ke he Tau Perofeta—Iona
1. Ko e heigoa e tau aga mitaki ha Iona?
1 Ko e heigoa haau ne manatu ka manamanatu a koe ke he perofeta ko Iona? Liga onoono falu ki a ia ko e tagata hopoate po ke loto maō. Pete ia, ne fakakite mooli e ia e fakatokolalo, malolō, mo e aga foaki noa. Maeke fēfē ia tautolu ke “fifitaki” e tau mahani mitaki ha Iona?—Iako. 5:10.
2. Fifitaki fēfē e tautolu e fakatokolalo ha Iona?
2 Fakatokolalo: Fakamua, ne hola a Iona ke he taha faahi ka e nakai fano ke he matakavi ne kotofa a ia ki ai. Nakai ofo he mena nei, ne mua e tau Asuria he favale, ati fakahigoa ai a Nineva ko e “maga keli tagata.” (Nahu. 3:1-3) Pete ia, ne akonaki e Iehova a Iona ti fakakite e ia e fakatokolalo ke talia e kotofaaga ke liu foki. (Fakatai 24:32; Iona 3:1-3) Pete ne fakauaua a ia he kamataaga, ka e taute e ia e finagalo ha Iehova. (Mata. 21:28-31) Eketaha pihia nakai a tautolu ke fakamatala e tala mitaki, pete ka akonaki po ke uka e matakavi he fonua ha tautolu ne kotofa ki ai?
3. Ha e fe e tau tutūaga he gahua he fonua kua lata ia koe ke moua e loto malolō mo e foaki noa?
3 Loto Malolō mo e Foaki Noa: Magaaho ne mailoga e Iona ko e fifiliaga kelea haana ne kua fakahagahaga kelea e tau momoui he tau tagata gahua toga, ati makai a ia ke foaki haana moui. (Iona 1:3, 4, 12) Mogo fakamui ne fakamooli e ia e kotofaaga haana ki Nineva, ne fina atu a ia ke he lotouho he maaga, liga ke kumi taha mena hagahaga mitaki ke fakapuloa e fakafiliaga ha Iehova. Ko e tau gahua a ia, nakai he tagata hopoate ka ko e perofeta loto malolō he Atua! (Iona 3:3, 4) Ka e kua a tautolu he vahā nei? Kua lata ke moua e loto malolō mai he Atua ke maeke ke fakamatala fakamalolō ka fehagai mo e totokoaga. (Gahua 4:29, 31) Kua lata ke moua e aga foaki noa ke fakaaoga e magaaho mo e tau koloa ke he gahua he fonua.—Gahua 20:24.
4. Ko e ha kua lata ia tautolu ke fakaaoga taha magaaho ke manamanatu ke he tau fakafifitakiaga mitaki ne fakatoka he tau perofeta ha Iehova?
4 Ko e tau magaaho takitaha ka totou e koe e tala hagaao ke he taha he tau perofeta a Iehova, to aoga ki a koe ka lali ke kitia e koe a koe he tau tutūaga pihia. Hūhū hifo ki a koe: ‘To fēfē la e tali haaku? Fifitaki fēfē e au e tau mahani mitaki haana he moui haaku?’ (Hepe. 6:11, 12) To ha ha i loto he Ha Tautolu a Fekafekauaga he Kautu he tau mogo i mua e tau vala tala ka fakamaama e tau fakaakoaga aoga ka ako e tautolu mai he falu perofeta tua fakamooli ha Iehova.